မာံတဵုလွဳ-သၟာဗ္ၚပ္ဍဲတွဵုရးဍုၚ်မန်တံ ဂွိၚ်ဖေက်တၠကုမ္ပဏဳ မဆက်စပ်ကဵုအလဵုအသဳတံ သီကေတ်တိဗ္ၚတုဲ ယၟုတၠဝါဍာံဂွံမံက် ကာလအာသ္ပသမ္တီ ပ္ဍဲရုၚ်စရၚ်အၚ်တိဗ္ၚကၠအ်သွဝ်ဂှ် ဒးကဵုဒၟံၚ်သြန်ရောၚ် တၠဝါတံဟီုမံၚ်အိုတ်ရ။
သၞာံအခါလံလ ၜိုန်ရဂွံဒုၚ်စကၠုၚ်လဝ် အာဲကၟာဲနူမိမဇကုတုဲ ကၠောန်ကၠုၚ်ဒၟံၚ်ဝါဗ္ၚဂှ်ကီုလေဝ် နကဵုယၟုဇကုဂွံသ္ပလဝ်စၟတ်သမ္တီ ကာလအာပြံၚ်သၠာဲယၟုတၟိမ္ဂး သြန်ဖအုံသွက်သက်သာသၠဲလးသၞာဲဒဴတံဟီုတုဲ ကံက်ကေတ်ဒၟံၚ်သြန် နူသၟာဗ္ၚတံရ။ သြန်ဖအုံသွက်သက်သာသၠဲလးသၞာဲဒဴတံဟီုဂှ် သွက်ဂွံထပ်ထံက်ပၚ်ကဵု သြန်ဂိတုဟွံရုံဂပ်တံရ။
ညးဂွံဆက်ဒုၚ်လဝ်အာဲကၟာဲနူမိမ တိဝါဗ္ၚ (၄) ဨက နူပွိုၚ်ဍုၚ်ကျာ်မြဟ် ရဲကွာန်သၞေဟ်ဍုၚ်မွဲတၠဂှ် နကဵုယၟုဇကု မိက်ဂွံမံက် ပ္ဍဲစရၚ်ရုၚ်အလဵုအသဳဂးရ။
“သွက်ဂွံပြံၚ်သၠာဲစုတ်ယၟုအဲ ပ္ဍဲတၞးလိခ်စရၚ်အၚ်တိဟီုဂှ် အတိုၚ်လၟေၚ်သၞောဝ်ဍေံ ချူဗပေၚ်စုတ်လဝ်ပ္ဍဲလိခ်ဗီုပြၚ်ဍေံတုဲ ဒးဆက်ပတိုန်ဏာ ရုၚ်ပွိုၚ်ဍုၚ်၊ ခရိုၚ်၊ ကဆံၚ်တွဵုရး ကဆံၚ်ကဆံၚ်ပၠန်ရောၚ်၊ သွက်မွဲဨက မွဲဠက်ဒကေဝ် အဲဒးစုတ်ကဵုလဝ်သြန်သက်သာသၠဲလးရုၚ်ညးတံရ” သာ်ဝွံ ဗီုပြၚ်ဒးကဵုကၠုၚ်လဝ်သြန် ကုတခဳတိဗ္ၚကွာန်ဂှ် သၟာဗ္ၚကောန်ကွာန်သၞေဟ်ဍုၚ်မွဲတၠ လဴထ္ၜးရ။
အပ္ဍဲပွိုၚ်ဍုၚ်ကျာ်မြဟ် ကွာန်သၞေဟ်ဍုၚ်မ္ဂး စပ်ကဵုပရေၚ်သီတိဝါဗ္ၚတုဲ အကြာဏံသၟာဗ္ၚတံကဵု ရဲကုမ္ပဏဳ “ဇေကမ္ဘာ”တံ မွဲလပါ်ကဵုမွဲလပါ် က္တဵုဒှ်မံၚ်ပရေၚ်ကယျာန်ထဝါတ်ညးသ္ကံဂှ် နကဵုယၟုသၟာဗ္ၚ ရဲကၠောန်ဒၟံၚ်ဝါဗ္ၚတံဟေၚ် မိက်ဂွံပိုၚ်ပြဳကီုလေဝ် နကဵုဌာနစရၚ်အၚ်တိဝါဗ္ၚကၠအ်သွဝ်ဆေၚ်စပ်တံ ဗွဲမလောဲသွာဟွံရေၚ်တၠုၚ်ကဵုတုဲ ကဵုသြန်သာ်ဏံတုဲဒးကၠောန်ဒၟံၚ်ရောၚ် သၟာဗ္ၚကောန်ကွာန်သၞေဟ်ဍုၚ် ဟီုလဴရ။
စပ်ကဵု ပရေၚ်တဵုလွဳတိဝါ၊ ကၠအ်၊ တိကၠအ်ဥဒျာန် ကေုာံ ဂအာၚ်သ္ၚိတံ လိခ်ကသုက်ပရေၚ်ပိုၚ်ပြဳ၊ အပြံၚ်အလှာဲ၊ ညးကၠောန်ဒၟံၚ်ဟေၚ်ယၟုဒးမံက်ဂတဝ်၊ နကဵုနဲကဲတၞဟ်ဟ်ညံၚ်ဂွံကၠောန်ဗဒှ်အာပရေၚ်တဵုလွဳမာန်ဟီုဂှ် ဒှ်တာလျိုၚ်တမ်မူလ ဌာနစရၚ်အၚ်တိဗ္ၚကၠအ်သွဝ်ဆေၚ်စပ်တံ ဒးရေၚ်တၠုၚ်ကဵုရ။
တုဲပၠန် နကဵုနဲကဲတၞဟ်ဟ် ညံၚ်ဂွံကၠောန်ဗဒှ်အာ ပရေၚ်တဵုလွဳတိဗ္ၚမာန် နကဵု (လ/န-၃၉) မိက်ဂွံရေၚ်တၠုၚ်မ္ဂး ဌာနစရၚ်အၚ်တိဗ္ၚကၠအ်သွဝ်ဆေၚ်စပ်တံဂှ် အတိုၚ်သၞောဝ်ဒးချူထပေၚ်စုတ်ကဵုတၚ်နၚ်နွံပၟိက်တံတုဲ နူဌာနစရၚ်အၚ်တိ ခရိုၚ်၊ တွဵုရး မွဲကဆံၚ် ဒးဆက်ဂမြၚ်ပ္တီ၊ သ္ပဒတန် ကုဇရေၚ်သ္ကိုပ်အုပ် တွဵုရး၊ ရးဒေသ ဆေၚ်စပ်တံရောၚ် ညးကေၚ်ကေတ်ကၠုၚ်လဝ်တာလျိုၚ် ပ္ဍဲဌာနစရၚ်အၚ်တိဗ္ၚကၠအ်သွဝ် မွဲတၠဟီုလဴရ။
ဗွဲတၟေၚ် သွက်ဂွံဒးကဵုအရီုဗၚ်သောၚ်ကလးကဵု ပရေၚ်သၟာဗ္ၚတံဂှ် ဆေၚ်စပ်ကဵု သၟဝ်ဌာနဝန်ဇၞော်ပရေၚ်တဵုလွဳကေုာံ ကၟိုန်ဍာ် အဓိကဒှ်တာလျိုၚ် လပါ်ဌာနစာရၚ်အၚ်တိဗ္ၚကၠအ်သွဝ်တံဟီုကီုလေဝ် ပရေၚ်ကဵုကေတ်သြန်သာ်ဏံဂှ် ရဲဗ္ၚကောန်ဍုၚ်ဗၟာတံ ဒးဆဵုဂဗဒၟံၚ်လၟိုန်ရောၚ် သၟာဗ္ၚတံဟီုမံၚ်ရ။
အပ္ဍဲတွဵုရးဍုၚ်မန် ပွိုၚ်ဍုၚ်နွံ(၁၀) ပွိုၚ်ဍုၚ်ဂှ် တိဗ္ၚမၞုံ ဨက (၁၀) ကိုဋ်ပြၚ်တုဲ ဒှ်သၟာဗ္ၚ ရ၅ က္ဍိုပ်ကၠံရ။