အာကာ – ညံၚ်သ္ဂောံနုက်တိတ် နူဗော်ကောဒေံ ကောန်ဍုၚ်အရၚ် ၅ ဗော် Brotherhood of Ethnic Parties ဂှ် ဗော်ဒဳမဵုကရေဇြဳ အလုံရးမန် (AMDP) ဒးဒုၚ်ကဵု ဇြဟတ်ဓရိုဟ်ကဵု သကိုပ်ဝန်ဇၞော် တွဵုရးမန် ဥူအုၚ်မျေတ်ရောၚ် ဂွံတီကေတ် နူဗွိုၚ်ဗော်ရ။
ကြဴနူ ဥက္ကဌ ဗော်ဒဳမဵုကရေဇြဳ အလုံရးမန် နာဲဇၞူမန် ကော် နာဲၚိုဲသိၚ် ဟီုဂးသောၚ်ကလး သၟာန်သွဟ်ကဵု ဌာန်ပရိုၚ်မ္ၚး စပ်ကဵုပတိတ်လဝ် လိက်လလောၚ်တြး လညာတ်ဗော်ကောဒေံ ကောန်ဍုၚ်အရၚ် ၅ ဗော် မပ္တံညံၚ်သ္ဂောံဗလးကဵု ကောန်ထံၚ် သၟာပရေၚ်ဍုၚ်ကွာန်တံတုဲ ဒးဒုၚ်ကဵုဇြဟတ်ဓရိုဟ်ရ။
“ညံၚ်ဂွံနုက်တိတ် နူဗော်ကောဒေံ ကောန်ဍုၚ်အရၚ် ၅ ဗော်ဂှ်ကီု၊ ညံၚ်ဂွံဒေံါဇူ ဆက်ဆောံ သၟာန်သွဟ်မံၚ်ကဵု ဌာန်ပရိုၚ်မ္ၚးကီု ဥူအုၚ်မျေတ် ဟီုလဝ်ကဵု ဝန်ဇၞော်မန်တံ နွံမံၚ်” သာ်ဝွံ ညးမစုက်လုက်ကဵု ဝန်ဇၞော်မန် ၂ တၠဂှ် ဟီုရ။
နူဝန်ဇၞော် တွဵုရးမန် ၂ တၠ မတွံဂး ဝန်ဇၞော်ပရေၚ်ဘဏ္ဍာ ကေုာံ အခေါန်ၚာၚ် ဒံက်တာမာံနဲသဵု ကေုာံ ဝန်ဇၞော်ကွတ်တဲကွက်စက် ကေုာံ ဓါတ်လလဳ နာဲလွဳအံၚ် မွဲကဆံၚ် သကိုပ်ဝန်ဇၞော် ဥူအုၚ်မျေတ် ကဵုကၠုၚ်ဇြဟတ်ဓရိုဟ်ရောၚ်။
ဇၟာပ်ပ်ကောံဓရီုဝန်ဇၞော် တ္ၚဲအဒိုတ်ဂှ် ဥူအုၚ်မျေတ် ဟီုဂးကဵု ဝန်ဇၞော်ဂမၠိုၚ် ဗွဲမကြံၚ်မ္ၚိုဟ် သကာတ်မြဟ်တုဲ လက်ချဴမံၚ် ဂကောံဒစဵုဒစးတံ ဗွဲမရုန်မဵုရောၚ်ဂှ်လေဝ် ညးမကြပ်ကဵု ဝန်ဇၞော်မန်ဂှ် ဟီုရ။
“ၝဏံ ဟီုဍေံ ဟွံဂွံတှေ် ဖဳထောံဍာ်ဏောၚ်” ဂှ်လေဝ် ရန်ကဵု နာဲဇၞူမန်တုဲ ဥူအုၚ်မျေတ် ဟီုလဝ် ပ္ဍဲကောံဓရီု ဝန်ဇၞော်ကီုရောၚ်ဂှ် ညးဆက်ဟီုရ။
သာ်လဵုကဵုကၠုၚ်ဇြဟတ်ဓရိုဟ်ကီုလေဝ် ဟွံနုက်တိတ် နူဗော်ကောံဒေံ ကောန်ဍုၚ်အရၚ်ရောၚ်ဂှ် ဥက္ကဌဗော်မန် နာဲဇၞူမန် ဟီုရ။
“ဟီုကၠုၚ်ကဵုပိုဲ တိုက်ရိုက် ဟွံမွဲဏီပုဟ်။ ကမၠောန်ကၠောန်ထေက်ဂှ် ဒးကၠောန်ရ။ သက်ဒးဖေက် ဟွံမွဲပုဟ်။ မၞိဟ်ဖေက်တံဂှ် တိတ်လေဝ်” သာ်ဝွံ နာဲဇၞူမန် ဟီုရ။
ဟိုတ်နူဝန်ဇၞော်တွဵုရးမန် ဥူအုၚ်မျေတ် ကဵုကၠုၚ်ဇြဟတ်ဓရိုဟ်တုဲ လၟုဟ် ပ္ဍဲဗော်မန် ဂကောံဝန်ဇၞော်ၜါတၠ မိက်ဂွံကဵုနုက်တိတ် နူဗော်ကောဒေံ ကောန်ဍုၚ်အရၚ် ကေုာံ ဂကောံဥက္ကဌဗော် မိက်ဂွံဒစဵုဒစး ပ္ဍဲစၠတ်ထဝ် လညာတ်ပါ်ခြာ ဒှ်မံၚ်ၜါလွးရောၚ်ဂှ် ဂွံတီကေတ် နူဗွိုၚ်ဗော်ဂှ်ရ။
ပ္ဍဲဗော်ကောဒေံ ကောန်ဍုၚ်အရၚ် ၅ ဗော်ဂှ် ဗော်ဒဳမဵုကရိတ်တေတ် ကောန်ဍုၚ်အရၚ်သေံ၊ ဗော်ဒဳမဵုကရေဇြဳ အလုံရးမန်၊ ဗော်တဴတက် ကောန်ဍုၚ်အရၚ် ယခေၚ်၊ ဗော်ဒဳမဵုကရိတ်တေတ် ဖလုၚ်-သဝဝ် ကေုာံ ဗော်ကောန်ဂကူချေၚ်တံ ပါလုပ်အိုတ်ရ။
ပ္ဍဲဂိတုအဝ်ဂါတ် ၃ ဂှ်လေဝ် သွက်ပရေၚ်ၜိုဟ်လလမ် အပ္ဍဲကၟိန်ဍုၚ် ဗော်ကောဒေံ ကောန်ဍုၚ်အရၚ် ၅ ဗော်တံ ပံၚ်ကောံပတိတ်လဝ် လိက်လလောၚ်တြးမွဲတၞး ပါလုပ်တၚ်နၚ် ၅ တၚ်ရ။