မာံသုတ – သွက်သ္ဂောံဆဵုဂဗသဳကၠဳတၟိ မွဲဝါပၠန်ဂှ် ညးစၞးအလဵုအသဳတွဵုရးမန် ကေုာံ ညးစၞးဗော်ဍုၚ်မန်တၟိတံ စိုပ်မံၚ်ဍုၚ်ရေဝ် တွဵုရးမန်အိုတ်ရောၚ်ဂှ် ညးမစုက်လုက်ကဵု ဝန်ဇၞော်မန်မွဲတၠ ဟီုလဴကဵု ဌာန်ပရိုၚ်ဗၠးၜးမန်ရ။
“တ္ၚဲဏံဟာ၊ တ္ၚဲယးဟာဂှ် သဳကၠဳဏောၚ်၊ ဗီုလဵုသဳကၠဳ မုပရူသဳကၠဳဂှ် ဟွံတီဏီပုဟ်။ ဗွဲတၟေၚ် လပါ်ဗော်ဍုၚ်မန်တၟိဂှ် သ္ပလဝ်ကာပၞုက်တုဲ ကၟာတ်လဝ်ပရိုၚ်ဏောၚ်” သာ်ဝွံ ညးဟီုရ။
လပါ်အလဵုအသဳ တွဵုရးမန်ဂှ် ဝန်ဇၞော်ပရေၚ်ဂီုကၠီု ကေုာံ ပရေၚ်ကေၚ်ကာပယျဵု သကိုပ်ဗိုလ်ဇၞော် ဌေမျေအ်အံၚ် က္ဍိုပ်က္ဍိုပ်တုဲ လပါ်ဗော်ဍုၚ်မန်တၟိဂှ် ကေၚ်ကာဗဟဵု နာဲတၠညး က္ဍိုက်က္ဍိုပ် သဳကၠဳရောၚ် ဂွံတီကေတ်ရ။ ၜိုန်ဂှ်လေဝ် နူဗဟဵုဗော်ဍုၚ်မန်တၟိ ဂွံဟီုပ္တိတ် ကိစ္စပေဲါသဳကၠဳဏံဂှ် ကယျာန်တးပဲါရ။
“သဳကၠဳ ၜိုတ်ကဆံၚ် တွဵုရးရတှေ် ကမၠောန်ဟွံတုဲဒှ်ပုဟ်။ နကဵု UNFC ယဝ်သဳကၠဳတှေ် အလုံမွဲဍုၚ်ဗၟာ ဓမံက်ပရေၚ်ၜိုဟ်လလမ်မာန်ဏောၚ်” သာ်ဝွံ ညးမကဵုကသပ် ကာပၞာန် ဗော်ဍုၚ်မန်တၟိ သကိုပ်ဗိုလ်ဇၞော်တြေံ နာဲကောတၠရတ် ဟီုရ။
သအာၚ်နူဏံပၠန် ကံၚ်ဇြဳ ဓမံက်ပတိုန် ကၟိန်ဍုၚ်ပံၚ်ကောံ ဖေတ်ဒရေဝ် UNFC ဟွံပါမွဲသာ် လ္ပတက်ကျာသဳကၠဳ ပရေၚ်ၜိုဟ်လလမ် ကုအလဵုအသဳ တွဵုရးဍုၚ်မန်ညိဂှ် ပ္ဍဲဂိတုအံက်တဝ်ပါ (၃) ဏံ ကမ္မတဳ ပံၚ်ကောံ ပရေၚ်ဂကူမန် မစိုပ်ဌာန်ဇမ္ၚောဲ (Overseas Mon Coordination Committee- OMCC) ပ္တိတ်လိက်လလောၚ်တြးတုဲ ဗတိုက်ဖအောဝ်လဝ် ဗော်ဍုၚ်မန်တၟိ ဇြိုဟ်ဇြိုဟ်နက်နက်ရ။
ဗော်ဍုၚ်မန်တၟိဂှ် နူသၞာံ ၁၉၉၅ ဒေံါကၠုၚ်ပန်ပှော် ကဵုအလဵုအသဳပၞာန်ဗၟာ ပွိုၚ် ၁၅ သၞာံပြၚ်တုဲ ပ္ဍဲသၞာံ ၂၀၁၀ ဂိတုသေပ်တေမ်ပါမံက်ဂှ် ဒေံါပန်ပှော် လီုကၠုၚ်ရ။ ၜိုန်ဂှ်လေဝ် မွဲလပါ်ကဵု မွဲလပါ် ကလေၚ်ပန်ပှော် ညးသကအ် ဟွံမွဲဏီရ။
သွက်သ္ဂောံပန်ပှော်မာန်ကၠုၚ်ဂှ် ပ္ဍဲပွိုၚ်မွဲသၞာံကပါ် ဗော်ဍုၚ်မန်တၟိ ဒးသဳကၠဳကၠုၚ်ကဵု အလဵုအသဳပၞာန်ဗၟာ ပ္ဍဲဌာန်ဂအုပ်ပၞာန်ရးဒိုဟ်အဂၞဲရောၚ် ဂွံတီကေတ် အတိုၚ်လိက်စၟတ်သမ္တီရ။