မာံသုတ၊ နာဲမာန် – ကြဴနူအလဵုအသဳဍုၚ်ဗၟာ ကလေၚ်ပလေဝ်သၞောဝ် ပတိုန်စရၚ်ယၟု (မှတ်ပုံတၚ်) ဗော်ပရေၚ်ဍုၚ်ကွာန်တုဲ ပတိုန်စရၚ်ယၟု ထေက်/ဟွံထေက်ဂှ် ခြာဟွံလအ် ဗော်ဒဳမဵုကရေသဳ ကောန်ဂကူမန် MNDF သဳကၠဳအာ ပ္ဍဲဗွိုၚ်ဗော်ရောၚ်ဂှ် ဒု-ဥက္ကဌ ဗော်ဒဳမဵုကရေသဳ ကောန်ဂကူမန် နာဲၚိုဲသိၚ် ဟီုလဴကဵု ဌာန်ပရိုၚ်ဗၠးၜးမန် ပ္ဍဲတ္ၚဲဏံရ။
တ္ၚဲအၚာ တ္ၚဲယးတေံမ္ဂး ဗော်ဒဳမဵုကရေသဳ ကောန်ဂကူ NLD လေဝ် သ္ၚဳဂၠိပ်အာ ကိစ္စပတိုန်စရၚ် ဗော်ပရေၚ်ဍုၚ်ကွာန်တုဲ သွဟ်မတိတ်ကၠုၚ်ဂှ် ဗော်ဒဳမဵုကရေသဳ ကောန်ဂကူမန်လေဝ် သ္ၚဳဂၠိပ်အာရောၚ် ဂွံတီကေတ်ရ။
“နူတ္ၚဲတေံရ ဖျေံသ္ဂုတ်ကၠုၚ် သၞောဝ်ပတိုန်စရၚ် ဗော်ပရေၚ်ဍုၚ်ကွာန်ရ။ ဒးကလေၚ်ရံၚ် လစွံစိုတ် NLD ကဵု ဗော်ပရေၚ်ဍုၚ်ကွာန် ကောန်ဍုၚ်အရၚ်တံဏောၚ်၊ ဗော်ဇကုမွဲဓဝ် ဂွံဖျေံသ္ဂုတ်သွာတ်ဂှ် ပြဟ်မံၚ်ဏီဏောၚ်” သာ်ဝွံ နာဲၚိုဲသိၚ် ဟီုရ။
ကၠတ်ထဝ်ကၟိန်ဍုၚ်ဂှ် ပ္ဍဲဂိတုနဝ်ဝေမ်ပါ ၄ သၞာံ ၂၀၁၁ ဏံဂှ် ဖျေံသ္ဂုတ်ကၠုၚ် သၞောဝ်ပတိုန်စရၚ် ဗော်ပရေၚ်ဍုၚ်ကွာန် နကဵုပိုဒ်ဇၞော် ၆၊ ပိုဒ်ပါ် (ဂ) တုဲ သအာၚ်နူပိုဒ် “ ပွမဒ္ဂေတ်ဗက် သၞောဝ်သဇိုၚ် ဒက်ပ္တန် ကၟိန်ဍုၚ်သမတ ဗၟာ” တုဲ ပိုဒ်လိက်လ္ၚဵုဂှ်လေဝ် ပလေဝ်ပလေတ်လဝ်ကီုရ။
“ပိုဲဂှ် ဟွံဒုၚ်တဲ သၞောဝ် ၂၀၀၈ ပုဟ်၊ NLD လေဝ် နူကၠာတေံ လစွံစိုတ်တုပ်တုပ်ကဵု်ပိုဲရ။ လၟုဟ် NLD ဂှ် ဗီုလဵုကူချပ်ဂှ် ဒးဆက်သဳကၠဳကဵု ဗော်ကောန်ဍုၚ်အရၚ်တံဏောၚ်၊ ဒှ်ဗော်ပရေၚ်ဍုၚ်ကွာန် လုပ်သၞောဝ်မှ ဆက်ချဳဒရာၚ် ပ္ဍဲဗွိုၚ်သၞောဝ် အလဵုအသဳဏောၚ်၊ ဟိုတ်ဂှ်ရ သွက်ဂွံဆက်သ္ၚဳဂၠိပ်ဂှ် နွံမံၚ်တၟာဂလိုၚ်ဏီ” သာ်ဝွံ နာဲၚိုဲသိၚ် ဆက်ဟီုရ။
ပ္ဍဲဂိတုအံက်တဝ်ပါ ၂၉ ဂှ် ကေၚ်ကာဗဟဵု ဗော်ဒဳမဵုကရေသဳ ကောန်ဂကူမန်တံ သ္ပကောံဓရီု ပ္ဍဲဍုၚ်မတ်မလီုမွဲဒၞာဲတုဲ ယဝ်အလဵုအသဳတံ ကလေၚ်ပလေဝ်သၞောဝ် ပတိုန်စရၚ်ယၟုဗော်မ္ဂး ကလေၚ်သ္ၚဳဂၠိပ်ရောၚ်ဂှ် ဖျေံကၠုၚ်သ္ဂုတ်သွာတ်ရ။
“ဗော်မန်ဒဳမဵုဂှ် ဒှ်ကၠုၚ်ဗော် ပ္ဍဲဗွိုၚ်သၞောဝ်တှေ် ဗော်ပရေၚ်ဍုၚ်ကွာန်မန် ပ္ဍဲသၞောဝ် ဒှ်ကၠုၚ် ၂ ဗော်ဏောၚ်။ ပ္ဍဲပေဲါရုဲမာဲ ကဵုမာဲကဵုဗော်လဵုဂှ် ဒှ်ကၠုၚ်စိုတ်ၜါလွးဏောၚ်” သာ်ဝွံ က္ဍိုပ်သကိုပ်သၟတ်မန် မာံသိုက်ရတ် ဟီုရ။
လၟုဟ် ဗော်ဒဳမဵုကရေဇြဳ အလုံရးမန် AMDP မွဲဟေၚ် သ္ပစၞးကဵု ကောန်ဂကူမန်တုဲ လုပ်ပြိုၚ်ပကာန် ပ္ဍဲပေဲါရုဲမာဲ ၂၀၁၀ ရ။
ဗော်ဒဳမဵုကရေသဳ ကောန်ဂကူမန်ဂှ် စဒက်ပ္တန် ပ္ဍဲသၞာံ ၁၉၈၈ ဂိတု အံက်တဝ်ပါ ၁၁ တုဲ ပ္ဍဲပေဲါရုဲမာဲ ၁၉၉၀ ဂှ် ဇၞးကၠုၚ် အမာတ် ၅ ဒၞာဲရ။
ပ္ဍဲသၞာံ ၁၉၉၂ ဂိတုမာတ်ချ် ၁၉ (တ္ၚဲတွဵုရးဍုၚ်မန်) ဂှ် ဒးဒုၚ်ပလီုကၠေံ ဗော်တုဲ က္ဍိုပ်သကိုပ်ဗော်တံ ဒးဒုၚ်ရပ်ထိၚ်အိုတ်ရ
