မာံသုတ – ကမၠောန်ကၟိတ် ပ္ဍဲဍုၚ်မန် အောန်တုဲ မိမတံ ဒးအာကၠောန်စမံၚ် ပ္ဍဲဍုၚ်သေံဂှ်ရ လၟိဟ်ကောန်ၚာ် ဒးသာဲခြာကဵုမိမ ဂၠိုၚ်ကၠုၚ်ဒၟံၚ်ရောၚ်ဂှ် ဒံက်တာအံၚ်နာၚ်ဥူ နူပွိုၚ်ဍုၚ်ၜါသွာၚ် ညးမဒှ်ညးစၞးကၠတ်ထဝ် တွဵုရးမန် ဟီုရ။
သၟာကမၠောန်မန်ဗၟာ လတူဍုၚ်ကျာ်ပိဂမၠိုၚ် ဃောစဴနူကဵုကၠောန်ကမၠောန် ( ဗီု - ဌာန်ပရိုၚ်ဗၠးၜးမန် )
“ဒေသလ္ၚဵုဂှ်တှေ် ကမၠောန်ကၟိတ် နွံကီုလေဝ် လှုဲလုပ်ကဵု လှုဲတိတ် ဟွံကိတ်ညဳတုဲ ပြဿနာ စသုၚ်ဟွံရုမ်ဂပ်လေဝ် နွံမံၚ်ဏီ။ ဟိုတ်ဂှ်ရ ဒးအာကၠောန်စ ပ္ဍဲဍုၚ်သေံတံ။ မိနော် အပါနော်တံဂှ် ဒးရံၚ်စံၚ် ကောန်စဴညးတံ” သာ်ဝွံ ညးဟီုရ။
ကောန်ၚာ်သၟဝ်အာယုက် ၁၇ ဗွဲမဂၠိုၚ် သာဲခြာကဵု မိမတုဲ ဒးဇၞော်ဂေါဝ်ကၠုၚ်ဂှ် ဒှ်နူတွဵုရးမန် မညောန်ကြပ်ကဵု ဍုၚ်သေံရောၚ်ဂှ် သကိုပ်စၞောန်ပျး ဌာနချူဓဇက် ကိုန်စဳဇန် ဒဝ်တိုဲတိုဲချေတ် ဟီုဂးလဝ်ကဵု မုက်လိက်အောန်တာနိတ် ပရိုၚ်ပဝ်ပျူဠာ ရ။
သအာၚ်နူဂှ်ပၠန် ဂၠိုၚ်မရနုက်ကဵုၜါဂှ် ဒှ်ရးတၞၚ်သဳ ကေုာံ တွဵုရးကရေၚ်တုဲ အောန်အိုတ်ဂှ် တွဵုရးကယျာ ကေုာံ တွဵုရးယခေၚ်တံ မဒှ်အိုတ်ရောၚ်ဂှ်လေဝ် ဆက်ဓမံက်ထ္ၜးလဝ် ပ္ဍဲမုက်လိက်ပရိုၚ်ပဝ်ပျူဠာ ဂှ်ရ။
“ပ္ဍဲတွဵုရးမန် ကွာတ်ဗ္ၜိုတ်တှေ် ဂၠိုၚ်အိုတ် မွဲတ္ၚဲ ဂွံၜိုတ် ပန်လ္ၚဳဒကေဝ်ရ။ ကၠုၚ်ကွာတ်ဗ္ၜိုတ် ပ္ဍဲဍုၚ်သေံဏံတှေ် မွဲမွဲတ္ၚဲ ဂွံၜိုတ် ပန်ကၠံၝာတ်၊ တော်ကဵုလှုဲဗၟာတှေ် ဂွံၜိုတ်မွဲဠက်ပြၚ်ဏောၚ်” သာ်ဝွံ နာဲလ္ဂန်အိန် ညးမကွာတ်ဒၟံၚ်ဗ္ၜိုတ် ပ္ဍဲခရိုၚ်ပြဇွောပ် ရးဍုၚ်သေံဂှ် ဟီုရ။
“လၟုဟ် ပ္ဍဲဍုၚ်သေံ ဍာ်ဇၞော်တုဲ မၞိဟ်စဴမံၚ်တံဂှ် စဴမွဲချိုန်ခဏရဏောၚ်။ ဍာ်စှေ်တုဲဗက် ကလေၚ်အာဍုၚ်သေံပၠန်ရဏောၚ်။ ညးတံ ကလေၚ်ကၠောန်စ ပ္ဍဲကၠတ်ဗ္ၜိုတ် ဍုၚ်ပိုဲဏောၚ်ဂှ် အဲဟွံခယျပုဟ်။ ကၠအ်ဗ္ၜိုတ် ပ္ဍဲဍုၚ်မန်ပိုဲဂှ် ကောန်ကမၠောန် နူဗ္ဂေါတေံ ကေတ်လဝ်ဒၞာဲအိုတ်ရ” သာ်ဝွံ ဒံက်တာအံၚ်နာၚ်ဥူ ဟီုရ။
ဗွဲတၟေၚ် ပ္ဍဲပွိုၚ်ဍုၚ်ဇြပ်ဗု၊ မုဟ်ဍုၚ် ဒၞာဲတဵုတၞံဗ္ၜိုတ်ဂၠိုၚ်အိုတ် ပ္ဍဲဍုၚ်မန်တံဂှ် ကောန်ကမၠောန် နူရးဗ္ဂေါတေံ ပြံၚ်စှေ်ကၠုၚ် သီုကောန်ဇာတ်အိန်ထံၚ်တုဲ လုပ်ကၠောန်ဒၟံၚ် ပ္ဍဲကမၠောန်ကွာတ်ဗ္ၜိုတ်အိုတ်ဂှ် ဂွံဆဵုကေတ်ရ။
တုပ်တဴသာ်ဂှ်ကီု ညးဒေသကောန်ဂကူမန်တံလေဝ် ပြံၚ်လုပ်အာ ဍုၚ်သေံတုဲ အာကၠောန်စကမၠောန်အိုတ်ရ။
မိမ ကောံကောံဟွံမွဲကီု၊ မိမ သီုၜါ ဟွံမွဲကီုဂှ် ကောန်ၚာ်အကြာအာယုက် ၁၀ သၞာံကဵု ၁၇ သၞာံတံ ကတဵုဒှ်ဂၠိုၚ်အိုတ်ရောၚ်ဂှ် ဌာနဝန်ဇၞော် ပရေၚ်ထတ်ယုက်၊ ဌာနချူဓဇက် ကိုန်စဳဇန် ကေုာံ ဂကောံသြန်ဗွဝ်ကောန်ၚာ် ကုလသမဂ္ဂတံ ပံက်ကောံကံက်ကေတ်လဝ်စရၚ်တုဲ ဂွံတီကေတ် အတိုၚ်စရၚ်ဂှ်ရ။
