နာဲမာန် – စပ်ကဵုပရေၚ်ပံၚ်တောဲ ဗော်ပရေၚ်ဍုၚ်ကွာန် ဗော်ဒဳမဝ်ကရေဇြဳကောန်ဂကူမန်ကဵု ဗော်ဒဳမဝ်ကရေဇြဳအလုံရးမန် ၜါဗော်ဂှ် ဒှ်ဒၟံၚ်အခက်ခုဲဖိုဟ်ရောၚ် ညးလျိုၚ်ကမ္မယှေန်သွက်ဂွံပညဳပညပ် ပရေၚ်ပံၚ်တောဲဗော်ၜါတံ ဟီုဓမံက်ရ။
ကြဴနူ ဗော်ဒဳမဝ်ကရေဇြဳကောန်ဂကူမန် ကလေၚ်ဗပေၚ်ဇြဟတ်၊ ချပ်ဇန် သွက်ဂွံကလေၚ်ပံက်ဗော်ပရေၚ်ဍုၚ်ကွာန် ပ္ဍဲသၞောဝ်အလဵုအသဳရောၚ်ဂှ်တုဲ ပရေၚ်ပံၚ်ဗ္စပ် ဗော်မန်ၜါဗော်ဂှ် ညးဍုၚ်ကွာန်ဂမၠိုၚ်ကီု ကျာ်ဇၞော်အ္စာဂမၠိုၚ်ကီု ဒုၚ်တဲနွံကီုလေဝ် နဇိုၚ်နတဲ ဂွံဒှ်ပရေၚ်ပံၚ်ဗ္စပ်ဍာံဍာံဂှ် ပြဟ်ဟ်ဏံ ဒှ်ဟွံမာန်ဏီတုဲ သီုၜါဗော်ဂှ် ပံက်လဝ်ဂကောံကမ္မယှေန် သွက်ဂွံပညဳပညပ်နွံမံၚ်ရ။
ညးက္ဍိုပ်ဂကောံကမ္မယှေန် လ္ပာ်ဗော်ဒဳမဝ်ကရေဇြဳအလုံရးမန် မွဲတၠဟီုဂှ် “နကဵုမူဂှ် ပရေၚ်ပံၚ်ဗ္စပ်ဗော်ၜါဂှ် ဗော်ပိုဲ သက်ဒးဒစဵုဒစးဟွံမွဲ၊ ဆဂး ခိုဟ်အိုတ်ဂှ်တှေ် ဗော်ပိုဲလၟုဟ်ဂှ် ဒှ်မံၚ်ဗော်ပရေၚ်ဍုၚ်ကွာန်ပ္ဍဲသၞောဝ်တုဲ ယဝ်ရ ဗော်ဒဳမဝ်တံ လုပ်ပံၚ်ကဵု ဗော်ပိုဲတှေ် ၜိုတ်ဏံ ဒှ်မာန်၊ ဗီုဂှ်ဟွံသေၚ် ယဝ်ရ ဒးဒုၚ်ပလီု ယၟု ဗော်မွဲမွဲတှေ် ဗော်အလုံရးမန်ဂှ် ဒုၚ်ပလီုကဵုဟွံမာန်တှေ် ဂွံပံၚ်ညးကအ်ဂှ် ဍေံဝါတ်ညိ” သာ်ဏံ ညးဟီုရ။
လ္ပာ်ဗော်ဒဳမဝ်ကရေဇြဳကောန်ဂကူမန်ဝွံ သွက်ဂွံပညဳပညပ် လ္တူဗော်ပရေၚ်ဍုၚ်ကွာန် ဂွံဒှ်မွဲဗော်ဓဝ်ဂှ် ကဵုလဝ်တာလျိုၚ် ဂကောံကေၚ်ကာ(၂၁)တၠရ။ ဆဂး ဂကောံကေၚ်ကာဂှ် ဒဵုတ္ၚဲဏံ နလုပ်သၞောဝ် ဟွံဂွံကၠောန်သ္ပပေဲါကောံဓရီုကီု ဟွံဂွံကၠောန်သ္ပပေဲါဆဵုထ္ဗဏီရ။
ဂကောံကေၚ်ကာ ဗော်မန်ဒဳမဝ်မွဲတၠဂှ် “ဂွံဒှ်ဗော်ပရေၚ်ဍုၚ်ကွာန် သ္ပစၞးကဵုဂကူဍာံဍာံတှေ် လ္ပာ်ညး လ္ပာ်အဲ တံၚ်ဂြဲလ္ပာ် ဗော်ညး ဗော်အဲ ဟွံဂွံပုဟ် အကာဲအရာ ဒးပလီုယၟုဗော်ဇကုနွံတှေ် ဗော်လဵုဟွံရုဲ ဒးပလီုတှေ် ဒးပလီုရ၊ ဗော်တေံ လုပ်သၞောဝ် ဗော်ဏံ ဟွံလုပ်သၞောဝ်ဟီုဂှ် ဟွံသေၚ်ပုဟ်၊ ကလေၚ်ပံၚ်ညးကအ်တုဲ ကလေၚ်ပ္တိုန်အခေါၚ်တၟိလေဝ် မုအခက်ခုဲဟွံမွဲပုဟ် အဲညာတ်” သာ်ဏံ ညးဟီုရ။
ပရေၚ်ပံၚ်ဗ္စပ်ဗော်ဒဳမဝ်ကရေဇြဳကောန်ဂကူမန်ကဵု ဗော်ဒဳမဝ်ကရေဇြဳအလုံရးမန် ၜါဗော်ဂှ် နူကဵုဗော်မန်ဒဳမဝ် သ္ပပေဲါ ကောံဓရီု ပ္ဋဲစၟတ်တ္ၚဲနဝ်ဝေန်ဗါ(၂၀)ဂှ်တုဲ ပ္တိတ်ကၠုၚ်လိက်လောၚ်တြး ဗော်ပရေၚ်ဍုၚ်ကွာန်မန် ဒးဒှ်မွဲဗော်ဓဝ်ရောၚ်ဂှ်တုဲ ဗော်အလုံရးမန်တံလေဝ် ပ္ဍဲ စၟတ်တ္ၚဲနဝ်ဝေန်ဗါ(၂၇)ဂှ် ဒုၚ်တဲဗော်ပရေၚ်ဍုၚ်ကွာန် ဂွံဒှ်မွဲဗော်ဓဝ်ရောၚ်တုဲ ပ္တိတ်လိက်လလောၚ်တြးမွဲတၞးကီုရ။
ဆဂး စပ်ကဵု လိက်လလောၚ်တြး ဗော်ဒဳမဝ်ကရေဇြဳအလုံရးမန် ပ္တိတ်လဝ်ဂှ်တုဲ လိက်လလောၚ်တြးဂှ်ဝွံ ဟွံဒှ် လိက်လလောၚ်တြး စၞးဗော်ညးတံရောၚ် ဥက္ကဌနာဲၚိုဲတုၚ် ဒစဵုဒစး ဗက်ဆက်စၠောံလဝ်ပရိုၚ်နွံရ။
“ဗီုလဵုဒှ်ဒှ်ရ ဗော်ပရေၚ်ဍုၚ်ကွာန်ၜါဗော်ဏံ ညံၚ်ဂွံဒှ်မွဲဗော်မာန်တှေ် ခိုဟ်ရ ယဝ်ရဒှ်ၜါဗော်တှေ် ဗော်ညးတၞဟ်စဏာဏောဝ်၊ ပရေၚ်ပရူသောဲသောဲဗြောဲဗြောဲ ညိညဇြိုၚ်သာဂှ် ညးဗက်ညိ အဲယှအ်ညိတှေ် ပညဳဟွံဝါတ်ပုဟ် အဲညာတ်” သာ်ဏံ သၟာချဳဒရာၚ်ပရေၚ်ဂကောံ လိက်ပတ် ယေန်သၞာၚ် လ္တူဍုၚ်မတ်မလီုမွဲတၠ ဟီုရ။
ဆက်တုဲ “ဍေံခက်ညိဂှ် ဝန်ဇၞော်ၜါတၠဂှ်ရ ဝန်ဇၞော်တံဂှ် ယဝ်ရဗော်ၜါပံၚ်တှေ် ညးတံဒးရုဲဂၠံၚ်မွဲဟေၚ်ရ။ ယဝ်ရလုပ်ပ္ဍဲဗော်တှေ် ဒးတိတ်နူဝန်ဇၞော်ဏောဝ်၊ ယဝ်ရ ပဝန်ဇၞော်တှေ် ဒးနုက်တိတ်နူကဵုဗော်ပရေၚ်ဍုၚ်ကွာန်ဏောဝ် ဟိုတ်ဂှ်ရ ဒးကေတ်အခိၚ်ပညဳညးကအ်ညိ” သာ်ဏံ ညးဟီုရ။
One reply on “ပရေၚ်ပံၚ်တောဲ ဗော် ၁၉၉၀ ကဵု ဗော် ၂၀၁၀ ဂှ် ဒှ်ဒၟံၚ်အခက်ခုဲဖိုဟ်”
We must do the right way for our people. If you are leading our people, party name is not important for you all. Please! The time is up!