မာံသုတ – နူဂကောံပံၚ်ကောံပရေၚ်ဂကူမန် Mon Affair Union-MAU က္ဍိုက်ပ်တုဲ ကၠောန်ဗ္ဒျ်လဝ် ကောံဓရီုဇၞော်ပရေၚ်ဂကူမန် အလန်ဆဌမဝွံ ပ္ဍဲဂိတုဂျန်နဝါရဳ ၂၀ အခိၚ်သဝ်တ္ၚဲ ၆ နာဍဳဂှ် တုဲဒှ်အာဗွဲမအံၚ်ဇၞးရ။

စနူဂိတုဂျန်နဝါရဳ ၁၈ အခိၚ်နူဂယးဂှ် စကၠောန်ကၠုၚ်ကောံဓရီုဇၞော်ဏံ ပ္ဍဲဒေသပွိုၚ်ဍုၚ်ကျာ်ပိ ဒၞာဲကွာန်ဗလးဒုန်ဖါ်ဒှ်တုဲ ညးစၞးကေုာံညးလ္ၚတ်နူသွာၚ်နာနာတံ ၜိုတ် ၁၀၀ တၠပြၚ်ၚ်တိုန်စိုပ်လဝ်ရ။

“ပ္ၚံက်ပရေၚ်ဍုၚ်ကွာန်အလုံဍုၚ်ဗၟာမွဲ ဗီုပြၚ်ပြံၚ်သၠာဲဒၟံၚ်ဂှ်လေဝ်ကိစ္စဇၞော်မံၚ်၊ သွက်ကောန်ဂကူမန်ပိုဲလေဝ် အကာဲအရာတၟေၚ်မွဲဒှ်မံၚ်ရောၚ်၊ ဟိုတ်ဂှ်ရ ပရေၚ်သဳကၠဳ သၠာဂတးလညာတ်ကီု တၚ်ဖျေံသ္ဂုတ်သွာတ်တံကီုဂှ် ဒးစွံဇြိုဟ်ဟ်နက်က်ရောၚ်” သာ်ဝွံ ဒါရိုက်တာ ဂကောံပံၚ်ကောံပရေၚ်ဂကူမန်MAU နာဲဥဿာဟီုရ။

စပ်ကဵုကောံဓရီုဇၞော်ဏံတုဲ ပ္ဍဲဂိတုဂျာန်နဝါရဳ ၂၂ ဂှ် ပတိတ်လဝ်လိခ်လလောၚ်တြး ပိဘာသာနွံရ။

ခြာဟွံလံဏံ ဗော်ဍုၚ်မန်တၟိသွက်ဂွံတက်ကျာကဵု အလဵုအသဳဗၟာနွံဒၟံၚ်တုဲ ဗွဲတၟေၚ်စပ်ကဵုပရေၚ်ဒေါအ်ပန်ပှော်ဂှ် စွံအာရီုသဳကၠဳအာနွံဂၠိုၚ် သာ်ဝွံညးတိုန်စိုပ်လဝ်မွဲတၠ ဟီုရ။

“ညံၚ်ဂွံသဳကၠဳအာပရေၚ်ဍုၚ်ကွာန်အလုံဍုၚ်မွဲမာန် ပိုဲဒးဂစာန်အာကၠာ” သာ်ဝွံ ညးတေံဟီုရ။

ညးအုပ်ကာကမ္မတဳပံၚ်ကောံမန်ဍုၚ်သၟာၚ် OMCC မာံဆာန်မန်ဂှ် “ဟိုတ်နူဂွံဆဵုဂဗကဵု က္ဍိုပ်သ္ကိုပ်ပရေၚ်ဍုၚ်ကွာန်တံကီု၊ သီုကဵုဂကောံသၟတ်တံကီုဂှ် အဲမိပ်စိုတ်ကွေံကွေံရ” သာ်ဝွံ ဟီုရ။

မန်စိုပ်ဍုၚ်သၟာၚ်ဂမၠိုၚ်ဒက်ဗ္တန်လဝ် ဂကောံဇြဟတ်ဇၞော်အိုတ်မွဲ ကမ္မတဳပံၚ်ကောံမန်ဍုၚ်သၟာၚ်ဂှ် ဒှ်ကောန်ဂကောံ MAU ကီုရ။

ပ္ဍဲဂကောံ MAU ဗွိုၚ်အပ္ဍဲဍုၚ်မ္ဂး မပ္တံကဵုဂကောံပရေၚ်ဍုၚ်ကွာန်မန်၊ ပရေၚ်သာသၞာ၊ ပရေၚ်မၞိဟ်၊ တၠပညာမန်ဂမၠိုၚ်တံကီုပါလုပ်ဒၟံၚ်တုဲ ဂကောံမန်ဍုၚ်သေံ၊ ဂကောံညီသၟဟ်ကောန်ဂကူမန်တံကီု MUL၊ ဗော်ဍုၚ်မန်တၟိကဵု ဂကောံ OMCC တံလေဝ် ပါလုပ်ဒၟံၚ်ကီုရ။

ဂကောံပံၚ်ကောံပရေၚ်ဂကူမန် MAU ဂှ် စနူသၞာံ ၂၀၀၂ တေံ ဒက်ပ္တန်ကၠုၚ်လဝ်တုဲ ၂ သၞာံမွဲဝါကၠောန်ကၠုၚ်ဒၟံၚ် ကောံဓရီုဇၞော်ပရေၚ်ဂကူမန်ရ။