မာံတဵုလွဳ – နူဂကောံကံက်စရၚ်အၚ် သုတေသန ဂကောံကမၠောန်သြောံသ္ၚုဍုၚ်ဗၟာဂှ် ကံက်မံၚ်စရၚ်အၚ် သၟာဗ္ၚ ပွိုၚ်ဍုၚ်မုဟ်ဍုၚ် တွဵုရးမန်တုဲ သၟာဗ္ၚတံ ဂွံသှ်တၚ်နၚ်ချိုတ်ချိုတ်ပၠိုတ်ပၠိုတ်ဂှ် ဖေက်လကိုတ်မံၚ်အိုတ်ရ။
“ကံက်စရၚ်အၚ်ဏောၚ် မိၚ်ဗက် သၟာဗ္ၚတံ ဖေက်လကိုတ်မံၚ်၊ ဟွံဂံၚ်ဟီု အခက်အခုဲပုဟ်။ ဂကောံသၟာဗၞိက်သြောံသ္ၚုတံ၊ ကုမ္ပဏဳတံဂှ် သီမံၚ်ဗ္ၚ မွဲနှေံမွဲနှေံတုဲ သၟာဗ္ၚတံ ဖေက်လကိုတ်မံၚ်ဏောၚ်” သာ်ဝွံ သၟာဗ္ၚ နူကွာန်တာ ပွိုၚ်ဍုၚ်မုဟ်ဍုၚ်မွဲတၠ ဟီုရ။
သွက်သ္ဂောံကံက်စရၚ်အၚ်ဂှ် ၜိုန်ရဆဝ်မ္ၚုဟ်လဝ် သၟာဗ္ၚတံကီုလေဝ် သၟာဗ္ၚလ္ၚဵုတံ ဟွံကၠုၚ်တုဲ လ္ၚဵုတံဟေၚ် ကၠုၚ်စိုပ်အိုတ်ရောၚ်ဂှ် သၟာဗ္ၚလတူဂှ် ဟီုရ။
“နူဂကောံကံက်စရၚ်အၚ်ဂှ် သြောံတိတ်ဂလိုၚ်လဵုရော သၟာန်တှေ် ဟွံဂံၚ်သှ်ဍာံဍာံပုဟ်။ ဟီုဂလိုၚ်ပတိုန်ရနွံ၊ ယဝ်ရသြောံတိတ်အောန်တှေ် ကုမ္ပဏီတံဂှ် ညံၚ်ဂွံတိတ်ဂၠိုၚ် ကၠောန်ထ္ၜးဏောၚ် ဟီုတုဲ ဂွိၚ်ဖေက်သီထောံဝါဗ္ၚ” သာ်ဝွံ ကောန်ကွာန်မယျာန် ပွိုၚ်ဍုၚ်မုဟ်ဍုၚ်မွဲတၠ ဟီုရ။
ဂကောံကံက်စရၚ်အၚ်ဂှ် စှေ်ဒဵုကဵုဝါတုဲ သၟာန်သၟုက် ကံက်ကေတ်စရၚ် တၚ်နၚ်ဆေၚ်စပ်ကဵု ပရေၚ်တဵုလွဳတုဲ ကာလဟွံဆဵုတၠဗ္ၚတံမ္ဂး သၟာန်သၟုက်ကောန်လိၚ်တံတုဲ ချူသမ္တီဏာ စရၚ်အၚ်တၚ်နၚ်တံလေဝ် နွံရောၚ်ဂှ် သၟာဗ္ၚလတူဂှ် ဟီုရ။
“ပြဟ်ပြဟ်ဏံ ပ္ဍဲမုဟ်ဍုၚ်ဂှ် ကုမ္ပဏဳ သ္ပတၟေၚ်ကဵုသြောံသ္ၚု နွံမံၚ်၊ ကုမ္ပဏီ နွံၜါတုဲ ကုမ္ပဏဳတံဂှ် လိၚ်ကဵုမံၚ် စက်ခရဳသြောံ မွဲဨက ၃၀၀၀၀ ဒကေဝ်” သာ်ဝွံ သၟာဗ္ၚ နူကွာန်မယျာန် ကေၚ်လိၚ်လဝ်စက်ဂှ် ဟီုရ။
ဂကောံကံၚ်စရၚ်အၚ်တၚ်နၚ်တံဂှ် နူဂိတုဒဳဇြေမ်ပါ ၂၈၊ စဵုစိုပ်ဂိတုဂျာန္နဝါရဳ ၁ စှေ်ဖလာတ်တုဲ ကံက်ကေတ်မံၚ် ပ္ဍဲကွာန်မယျာန်၊ ကွာန်တာ၊ ဝၚ်ဒုန်၊ ဝက်ဒါ၊ ကမာဝက်တံရောၚ်ဂှ် ညးယိုက်ဝန် နူကမၠောန်ပရေၚ်တဵုလွဳ မွဲတၠ ဟီုရ။
ဂကောံကမၠောန်သြောံသ္ၚုဍုၚ်ဗၟာဂှ် ရန်ကဵု မပ္တံအကာဲအရာပိုန်ဒြပ် သၟာဗ္ၚ၊ ပရေၚ်ပတိတ်သြောံသ္ၚု အပ္ဍဲဍုၚ်တံတုဲ ရေၚ်တၠုၚ်ကၠောန်မံၚ် သွက်သ္ဂောံဒှ်အထံက်အပၚ်ရောၚ်ဂှ် သၞာဲဒါ မပါလုပ် ပ္ဍဲဂကောံကံက်စရၚ်အၚ်တၚ်နၚ် မွဲတၠ ဟီုရ။
