စၠန်ထဝ် – ရုၚ်ဆက်ဆောံ ဗော်ဍုၚ်မန်တၟိ ကၟာတ်လဝ်တံဂှ် ပဲါနူရုၚ်တၞဟ်ဟ်တုဲ ရုၚ်ဍုၚ်မတ်မလီုဂှ် ပ္ဍဲဂိတုဖေဖဝ်ဝါရဳ ၂၆ ဏံ ကလေၚ်ပံက်ယျရောၚ် ဂွံတီကေတ်ရ။
ပ္ဍဲရုၚ်ဆက်ဆောံ ဍုၚ်မတ်မလီု အရာပ်ၚာၚ်ဒဵုဂှ် လၟုဟ်မ္ဂးဒုသ္ကိုပ်ဗိုလ်ဇၞော် ဗညာဆာန်နန် နကဵုယာယဳကေတ်လဝ် တာလျိုၚ်ရ။
ရုၚ်ဆက်ဆောံ လ္တူဍုၚ်ဇြပ်ဗု
ဗော်ဍုၚ်မန်တၟိကဵု ဂကောံအလဵုအသဳတံ ကေတ်ဂွံတၚ်တုတ်စိုတ်ထပက်စၟတ်တဲ ပရေၚ်ဒေံါပန်ပှော်တုဲ မွဲတ္ၚဲပၠန်ဂှ် ကလေၚ်ပံက်ကၠုၚ် ရုၚ်ဆက်ဆောံဍုၚ်မတ်လလီုရောၚ် ညးရေၚ်တၠုၚ်ဖဵုပရေၚ်ၜိုဟ်လလမ်မန် နာဲတေန်အံၚ် ဟီုရ။
“ရုၚ်ဒးဒုၚ်ကၟာတ်လဝ်တံဂှ်လေဝ် ကလေၚ်ပံက်အာဏောၚ်၊ သီုဂွံလဝ်အခေါၚ် ပံက်ရုၚ်တၟိပၠန်ဏောၚ်၊ ဂွံကလေၚ်ပံက်အာရုၚ်ဆက်ဆောံပၠန်တှေ် မန်ပိုဲ ပရေၚ်အာကၠုၚ် ပဵုတုဲပြေပြံၚ်အာမာန်မံၚ်ဏောၚ်” သာ်ဝွံ နာဲတေန်အံၚ် ဟီုရ။
ရုၚ်ဆက်ဆောံတြေံ ဗော်ဍုၚ်မန်တၟိ ၄ ဒၞာဲဂှ် ဍုၚ်မတ်မလီု၊ ဍုၚ်ဇြပ်ဗု၊ ဍုၚ်ရေဝ်၊ ဍုၚ်ကျာ်ပိတံတုဲ ရုၚ်တၟိ သွက်ဂွံပံက်အာဂှ် ဍုၚ်မုဟ်ဍုၚ်၊ ဍုၚ်ကျာ်မြဟ်၊ ပွိုၚ်ဍုၚ်ပံၚ် ကွာန်ဇိုၚ်ကျာ်၊ ရးတၞၚ်သဳ ပွိုၚ်ဍုၚ်ဍာ်ဗု၊ ကွာန်ဍာ်တဴ ကေုာံ ဍုၚ်ဗိက်တံ ထပ်ပံက်အာရောၚ် ညးရေၚ်တၠုၚ်ဖဵု ပရေၚ်ၜိုဟ်လလမ်တံ ဟီုရ။
ဗော်ဍုၚ်မန်တၟိဝွံ သၞာံ ၁၉၉၅ ဂိတုဂျောန် ၂၉ ဂှ် ဒေံါကၠုၚ်ပန်ပှော်လဝ်ကဵု အလဵုအသဳပၞာန် (နဝတ) တံတုဲ ဂွံကၠုၚ်အခေါၚ်ပံက်ရုၚ်ဆက်ဆောံ ၄ ဒၞာဲရ။
တုဲပၠန်ဟိုတ်နူ အတိုၚ်အလဵုအသဳနဝတတံဖျေံအစဳဇန် သွက်ဂွံပြံသၠာဲထောံ နကဵုဒပ်မၚ်ကွာန်၊ ဒပ်ပၞာန်မၚ်ပယျဵုဂှ် ဗော်ဍုၚ်မန်တၟိဟွံဒုၚ်တဲတုဲ သၞာံ ၂၀၁၀ ဂိတုဨပြဳ သတ္တဟလက္ကရဴအိုတ်လောန်ကၠုၚ်တေံ ဒေံါပန်ပှော်လီုလာ်အာဂှ် ရုၚ်ဆက်ဆောံမဆေၚ်စိုပ်ကဵု ဗော်ဍုၚ်မန်တၟိတံဖအိုတ် ကၟာတ်ကၠေံထောံအိုတ်ရ။
