Categories
ပရိုၚ်

ပေါဲသောၚ်ကလးဒဝ်အံၚ်သာန်သုကျဳ ဟွံဂွံအခေါၚ်လတူဍုၚ်မတ်မလီု

စၠန်ထဝ် – ပေဲါသောၚ်ကလး စှေ်ပရေၚ်စန္ဒက် ဒဝ်အံၚ်သာန်သုကျဳ ချိၚ်လဝ်သွက်ဂွံကၠောန်ဗဒှ် ပ္ဍဲဍုၚ်မတ်မလီု ဒၞာဲကၠအ်ပ္ကဴသံၚ်လောန်ဂှ် နူကဵုညးတာလျိုၚ်ဗဂဵုလဟဵုဍုၚ်ကွာန်တွဵုရးမန်တံ ဟွံကဵုအခေါၚ်တုဲ ဒးပြံၚ်ပဆုဲဒၞာဲရောၚ် ဂွံတီကေတ်ရ။

ဂိတုမာတ် ၁၁ ဏံမ္ဂး ဒဝ်အံၚ်သာန်သုကျဳ သွက်ဂွံကၠောန်ပေဲါသောၚ်ကလး ပရေၚ်စန်ဒက် ပ္ဍဲဍုၚ်မတ်မလီု အရာပ်ဗိုလ်ကုန် ဒၞာဲကၠအ်ပ္ကဴသံၚ်လောန်ရောၚ် မူလဂှ်စဳဇန်လဝ်ရ။

ဥက္ကဌဗော် NLD ဒဝ်အံၚ်သာန်သုကျဳ
“ဂွံကၠောန်ပ္ဍဲကၠအ်ပ္ကဴသံၚ်လောန်ဂှ် ရဲဆေၚ်စပ်တံဟွံကဵုအခေါၚ်ပုဟ်၊ ညးတံဟီုဂှ် သွက်ဒးပလေဝ်ပလေတ်ကၠအ်ပ္ကဴ နွံမံၚ်ဏောဝ် ထ္ၜးမံၚ်ဟိုတ်ကဵုပိုဲ ဗီုဂှ်တုဲ ဟွံကဵုအခေါၚ်အိုတ်ပုဟ်၊ လၟုဟ် ပိုဲဂွံအခေါၚ် ပ္ဍဲသၠာတ်မခၞံကျာ ပ္ဍဲကွာန်မွဲယျ” သာ်ဝွံ နူရုၚ် NLD ဍုၚ်မတ်မလီု ညးအခေါၚ်ဟီုဂး ဥူကိုဝ်ကိုဝ်ဇြဝ် ဟီုရ။

ဟိုတ်ဒှ်သာ်ဂှ်ရ ကၠောန်အာပေဲါသောၚ်ကလး ပ္ဍဲသၠာတ်မခၞံကျာ ကွာန်ကွျောဝ်ဇျှာန်ကုန်(ကျွဲခြံကုန်း) နွံဇိုၚ်ဂၠံၚ် ဍုၚ်မတ်လလီု-ဍုၚ်ကျာ်မြဟ်ရောၚ် ဥူကိုဝ်ကိုဝ်ဇြဝ် ဆက်ဟီုရ။

ဒၞာဲကၠောန်ပေဲါသောၚ်ကလး စှေ်ပရေၚ်စန္ဒက် သၠာတ်မခၞံကျာဂှ်ဝွံ သ္ၚောဲခြာနူကဵုဍုၚ်မတ်မလီု ၜိုတ် ၆ တိုၚ်ဒှ်တုဲ ညးဍုၚ်ကွာန်အာကလၚ် ပေဲါသောၚ်ကလးတံ ဒှ်အခက်အခုဲကဵု ပရေၚ်အာကၠုၚ်ညိရောၚ် ညးဆက်ဟီုရ။

“သၠာတ်ဏံဂှ် ကြပ်မံၚ်ကဵု ဂၠံၚ်ကွဳစက်ကီုရ၊ ဆဂး သ္ၚောဲမံၚ်ကဵုဍုၚ်ဏောဝ်တှေ် ပရေၚ်အာကၠုၚ် ဒှ်အခက်အခုဲညိဏောဝ်၊ ရဲနွံဒၟံၚ်လတူဍုၚ်တံတှေ် ဒးကၠုၚ်ကဵု ကွဳလိုန်ဓါတ် ကွဳစက်တံဏောဝ်” သာ်ဝွံ ဥူကိုဝ်ကိုဝ်ဇြဝ်ဟီုရ။

တုပ်ကဵုပရေၚ်ဏံကီု တရဴပေဲါသောၚ်ကလး ဒဝ်အံၚ်သာန်သုကျဳ စနူဍုၚ် ဖျာပုၚ်ဂှ် ဍုၚ်လှေဝ်ကူ၊ တွဵုရးသေံ၊ တွဵုရးကချေၚ်၊ ဍုၚ်မာန်တလေဝ်၊ ဍုၚ်စကိုၚ်၊ မိတ္ထဳလာ၊ တတာဥူ၊ နေပျဳတဝ်တံဂှ်လေဝ် ဗီုဍုၚ်မတ်မလီုဏံကီု ဒးပြံၚ်လှာဲ ဒၞာဲကၠောန်ပေဲါသောၚ်ကလးတံ အခက်အခုဲကေၚ်ဒှ်ကၠုၚ်လဝ်ရ။

ဂိတုမာတ် ၁၀ ဂှ်မ္ဂး ဒဝ်အံၚ်သာန်သုကျဳတံ စိုပ်ဍုၚ်မတ်မလီုတုဲ အခိၚ်ဗတံဂှ် ကော်ဘိက်လဝ် ဗော်ဒဳမဵုကရေဇြဳကောန်ဂကူမန် (MNDF) တံ သွက်ဂွံစပုၚ်သဝ်တ္ၚဲမွဲစွံရောၚ် ညးအုပ်ကာနာနာ (MNDF) အ္စာသဝ်စောန်တၟး ဟီုရ။

အ္စာသဝ်စောန်တၟး ဂှ် “၁၀ ဂှ် ဒဝ်သုတံတိက်ပ္ဍဲဍုၚ်မတ်မလီုဏောဝ်၊ ဂကောံညးတံ ဘိက်လဝ်ပိုဲ သွက်ဂွံစစၞအခိၚ်သဝ်တ္ၚဲကီုရ၊ ဒၞာဲလဵုရောဂှ် ဟွံတီချိုတ်ပၠိုတ်ဏီပုဟ်၊ ပေဲါသောၚ်ကလးညးတံဂှ် ၁၁ နူဂယးပြဟ်ဂှ် စဏောဝ် ဟီုလဝ်ဟဂှ်ရ၊ အစီဇန်ညးတံ တုဲဗက်ဂှ် ညးတံကလေၚ်တိုန်အာ ဍုၚ်လ္ဂုၚ်တိုက်ရိုက်ဏောဝ်” သာ်ဝွံ ဟီုရ။

ပ္ဍဲပွိုၚ်ဍုၚ်မတ်မလီုဂှ် ဂွံလုပ်ပြိုၚ်မာဲ ဒၞာဲစၠတ်ထဝ်ညးဍုၚ်ကွာန်မွဲဒၞာဲဓဝ်ကီုလေဝ် ဟိုတ်နူအသိၚ်ပေဲါသောၚ်ကလး စှေ်ပရေၚ်စန်ဒက် ဒဝ်အံၚ်သာန်သုကျဳဏံတုဲ မာဲညးဍုၚ်ကွာန်တံဗွဲမဂၠိုၚ် ထံက်အာဂလာန်ဗော် NLD တံမာန်မံၚ်ရောၚ် သာ်ဝွံသၚ်ခၟဳမန်တံ သ္ၚဳဂၠိပ်မံၚ်အိုတ်ရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.