မိလျးထဝ် – ပ္ဍဲသၞာံဗတောန်လိက် သွက်၂၀၁၂-၂၀၁၃ ဏံ ကောန်ကွးဘာတန်မူလတံ ဟွံဒးအိုတ်စရိတ်အပ်ဘာမွဲသာ် မပ္တံလိက်အုပ်တံလေဝ် ဂွံမးမးဖအိုတ်ရောၚ် ဂွံတီကေတ်နူမိမကွးဘာတံရ။

စနူဂိတုမေ ၂၅ ဒဵုစိုပ် ဂိတုမေအိုတ်ဂှ် အလုံဍုၚ်ဗၟာမွဲစပအပ်မံၚ်ဘာတုဲ အတိုၚ်နူဌာနပရေၚ်ပညာအလဵုအသဳတံ လလေၚ်လဝ် ကဵုအခေါၚ်ကဵု ကောန်ကွးဘာတန်မူလတံ ပအပ်ဘာမးမးကီု ကဵုလိက်အုပ်မးမးကီုဂှ် စထမံက်မံၚ်ရုပ်ရဴယျရောၚ်။

ကွးဘာတန်မူလ စနူ (၁) တန် ဒဵုကဵုစိုပ် (၄) တန် စရိတ်ပအပ်ဘာကီု ကေုာံ လိက်အုပ်ဘာမွဲစုံကဵု လိက်ဗလာ ၆ အုပ်ဂှ် နူကဵုဘာ ကဵုဒၟံၚ်မးမးရောၚ်။ ဆဂှ်သၟးဟွံက သွက်ကွးဘာတန်လဒေါဝ် တန်သၠုၚ်တံဂှ်လေဝ် စပ်ကဵု ဒးကဵုဒၟံၚ်စရိတ်နာနာ အပ္ဍဲဘာဂှ် သၞာံဏံ ဟွံဒးကဵုရပုဟ်ရောၚ် မိမကွးဘာ မိညေတ်ဟီုရ။

“နူကနေံဏံ အာပအပ်ဘာဂှ် စရိတ်မုစိလေဝ် ဟွံဒးကဵုပုဟ်၊ စရိတ်လိက်အုပ်ဘာကဵု လိက်ဗလာတံဂှ်လေဝ် ဟွံဒးအိုတ်လှုဲပုဟ်၊ တ္ၚဲတိုန်ဘာဂှ်တှေ်လေဝ် မပ္တံ ထိုၚ်၊ က္ဍိုၚ် ကေုာံ ကပေါတ်သုၚ်စောဲဘာတံဂှ်လေဝ် ထပ်ပရအ်ကဵုမံၚ်ဏီ အ္စာဘာတံ ဟီုလဝ်ဟဂှ်ရ” သာ်ဝွံ မိမကွးဘာတန်မူလ ပွိုၚ်ဍုၚ်ရေဝ် မိညေတ်ဟီုရ။

ပွမ ပအပ်ဘာ ဟွံဒးကဵုစရိတ်မွဲသာ်ဂှ် နူဌာနပရေၚ်ပညာအလဵုအသဳတံ စထမံက်ကၠုၚ်ရုပ်ရဴ နူသၞာံ ၂၀၁၁-၂၀၁၂ ဒှ်ကၠာလေဝ် ဘာဗွဲမဂၠိုၚ်တံဂှ် ကံက်ကေတ်မံၚ်လှုဲစရိတ်ဘာ နူကွးဘာတံနွံကၠုၚ်ရ။

မိမကွးဘာ လ္တူဍုပ်ဇြပ်ဗုမွဲတၠဂှ်လေဝ် “သၞာံတုဲကၠုၚ်တေံဂှ် ကွးဘာ ၄ တန် မွဲတၠတှေ် ဒးကဵုအကြာ ၄၅၀၀ ဒကေဝ် ကဵု ၆၅၀၀ ဒကေဝ်၊ သၞာံဏံဂှ်တှေ် မွဲဒကေဝ်လေဝ်ဟွံဒးကဵုလှုဲတှေ် သက်သာကၠုၚ်တၟာဂလိုၚ်”

သၞာံတုဲကၠုၚ်တေံဂှ် တန်တဴကဵုပွိုၚ်ဍုၚ်တုဲ စရိတ်ပအပ်ဘာတံလေဝ် တၞဟ်ခြာနွံရ။ လ္ပာ်ပွိုၚ်ဍုၚ်မုဟ်ဍုၚ်ဂှ်မ္ဂး ကွးဘာတန်ကောန်ၚာ်မွဲတၠ ဒးကဵုစရိတ်ပအပ်ဘာ အကြာ ၃၅၀၀ ကဵု ၈၅၀၀ ဒကေဝ်၊ ပွိုၚ်ဍုၚ်ဇြပ်ဗုဂှ်တှေ် နူ ၄၅၀၀ ဒဵုကဵု ၆၅၀၀ ဒကေဝ်၊ ပွိုၚ်ဍုၚ်ရေဝ်ဂှ်မ္ဂး အကြာ ၃၀၀၀ ကဵု ၆၂၀၀ ဒကေဝ် ဒးကဵုအိုတ်ရ။

စပ်ကဵု ပရေၚ်ပအပ်ဘာမးမးတုဲ ယဝ်ခါရ အ္စာဘာလဵုမွဲဂး ဗက်ဒးသြန်ကွးဘာတံမ္ဂး မိမကွးဘာတံ တေၚ်ကဵု ဝန်ဇၞော် ဌာနပရေၚ်ပညာကဆံၚ်လ္တူတံမာန်တုဲ သွက်အ္စာဘာဂှ် မပ္တံ ဖျေံကဆံၚ်ပြံၚ်ဘာ ဟွံသေၚ် ဒဵုကဵုပတိတ်ထောံနူဘာ ကဵုဒုဟ်ရေၚ် ဝန်ဇၞော်ပရေၚ်ပညာကၟိန်ဍုၚ် ဒံက်တာမြအေဟီုလဝ် ပ္ဍဲပေဲါသဳကၠဳ ပ္ဍဲဂိတုမေ ၂၅ ဂှ်ရ။

ပ္ဍဲဂိတုမေ ၂၅ လောန်ကၠုၚ်ဏံဂှ်ဝွံ နူကဵုဝန်ဇၞော်ဌာနပညာ အလဵုအသဳတံ ကၠောန်ဗဒှ်အခန်ကၞာ တ္ၚဲပအပ်ဘာ ပ္ဍဲဘာတန်သၠုၚ် (အမှတ် ၆) ဍုၚ်မတ်မလီု ပ္ဍဲတွဵုရးဍုၚ်မန်ဂှ် ဥူအုန်မျေတ်လေဝ် တိုန်စိုပ်ကီုရ၊ နူကဵုအ္စာဘာ ကေုာံ မိမကွးဘာတံ ကဵုလဝ်ဒါန်သြန် လၟိဟ်သြန်အထံက်ဗၚ် ၃၃၈.၅ ပြကောတိကိုဋ် နွံရ။

ပ္ဍဲကဵုဂိတု မေ ၂၆ သၞာံ ၂၀၁၁ လောန် ကၠုၚ်တေံဂှ်ဝွံ အတိုၚ်သၞောဝ်ပရေၚ်ပညာ သွက်ကွးဘာတန်မူလတံ ကဵုလိက်အုပ်မးမးဂှ် သၞာံဗတောန်ပညာ ၂၀၁၁ – ၂၀၁၂ မ္ဂး စထမံက်ရုပ်ရဴတုဲ နူကဵုဌာနပရေၚ်ပိုန်ဗၟာ ကၟိန်ဍုၚ်တံ ပတိတ်လဝ်ကဵုသြန် (၂၄၀၀) ပြကောတိကိုဋ်ဒကေဝ် သွက်ဂွံပရအ်လိက်အုပ်ဘာမးမး ကုကောန်ကွးဘာတန်မူလ မၞုံလၟိဟ် ၅ ပြကာတိကိုဋ်တံရ၊ ဆဂး ပ္ဍဲသၞာံ ၂၀၁၁ ဂှ် ထမံက်ရုပ်ရဴဟွံမာန်တုဲ ပ္ဍဲသၞာံ ၂၀၁၂ ဏံဂှ် စတုဲထမံက်ကၠုၚ်ရုပ်ရဴရ။