စၠန်ထဝ် – နကဵုအမိန်သမ္မတ ဂွံသၠးဒုဟ်ဒါဏ်တုဲ မဗၠးတိတ်ကၠုၚ်ထံၚ် ကောန်သ္ဂံၚ်ဗော်ဍုၚ်မန်တၟိ ၂ တၠဂှ် နူကနေအ်ဏံ ဂကောံသၟတ်မန် နူဒေသနာနာတံ သ္ပပေဲါဒုၚ်တၠုၚ် ပ္ဍဲဍုၚ်မတ်မလီု ဒၞာဲဇြပ်သဘၚ်ဓဝ်မန်ရ။
နာဲယက္ခ ဟီုဂလာန်တၚ်ဂုဏ်ကု သၟတ်မန်ဂမၠိုၚ်
ဂကောံသၟတ်မန် ပွိုၚ်ဍုၚ်မတ်မလီု၊ ပွိုၚ်ဍုၚ်မုဟ်ဍုၚ်၊ ပွိုၚ်ဍုၚ်ဇြပ်ဗု ကေုာံ နူဒေသနာနာ ၜိုတ် (၁၀၀) တၠပြၚ်ၚ်တံ ဒုၚ်တၠုၚ်ကဵုဍာ်စၠန်တံကီု၊ ဟီုဂလာန်တၚ်ဂုဏ်တံကီု ကၠောန်သ္ပလဝ်အခန်ကၞာရ သာ်ဝွံ ညးက္ဍိုက်က္ဍိုပ်ဂကောံသၟတ် နာဲဟံၚ်ဍုၚ် ဟီုရ။
“အတိုၚ်ပိုဲစၟဳစလဝ် လၟုဟ်ဗၠးတိတ်ကၠုၚ်ဂှ် ပိုဲတံ မိပ်စိုတ်ဗွဲမလောန်ရ၊ တုဲပၠန် နကဵုညးထမံက်ရုပ်ရဴပရေၚ်ၜိုဟ်လလမ်တံ အတိုၚ်ဂတိပါၚ်ညးတံ ထၜးကဵုသက်သဳမာန်ဂှ်ရ လတူအလဵုအသဳတၟိဏံလေဝ် ကောန်ဂကူမန်ပိုဲတံ ပဵုတုဲပတှေ်ကၠုၚ်ကီုရ” သာ်ဝွံ နာဲဟံၚ်ဍုၚ် ဟီုရ။
ပ္ဍဲအခန်ကၞာဒုၚ်တၠုၚ်ဂှ် ဥက္ကဌဗော်ဍုၚ်မန်တၟိ နာဲထဝ်မန် ကဵု ညးရေၚ်တၠုၚ်ဖဵုပရေၚ်ၜိုဟ်လလမ်တံလေဝ် ဗက်ကၠုၚ်ကရောံဂှ်ကီုတုဲ ဟီုဂလာန်ကဵု ဂကောံသၟတ်မန်တံကီုရ။
ဥက္ကဌဗော်ဍုၚ်မန်တၟိနာဲထဝ်မန်ဂှ် “ဆဵုမံၚ်ပုၚ်ကလောအ်သၟးဟွံဂွံပုဟ် လေံဒုက်လေဝ် ဒးစွံသတိကီု၊ ပရေၚ်ဒေံါပန်ထာဝရ ဟွံသေၚ်ဏီပုဟ်၊ ဒးသောၚ်ကလးပရေၚ်ဍုၚ်ကွာန် နွံတၟာကလိုၚ်ဏီ” သာ်ဝွံ ဟီုဏာဂလာန် ပ္ဍဲအခန်ကၞာဒုၚ်တၠုၚ်ဂှ်ရ။
နာဲယက္ခကဵု နာဲဆဳဂကူတံဂှ် ဂိတုအေပရဴ (၃၀) ၜိုတ်အခိၚ်တ္ၚဲစေၚ် (၂း၃၀) နာဍဳဂှ် ဝန်ဇၞော်ဓါတ်လလဳ ဥူဇြဝ်မေန် ပအပ်ပြာပ်ကဵု ဥက္ကဌဇၞော်ဗော်ဍုၚ်မန်တၟိ နာဲထဝ်မန်တုဲ အခိၚ်သဝ်တ္ၚဲဂှ် ဂကောံသၟတ်မန် နူဒေသနာနာတံ သ္ပပေဲါဒုၚ်တၠုၚ် ကဵုပရၚ်တဲအိုတ်ရ။
“ဒုၚ်တၠုၚ်ကဵုပိုဲ ဗီုဗီုဏံဂှ် မိပ်စိုတ်ဗွဲမလောန်ရ၊ အကာဲအရာလၟုဟ် ကမၠောန်သွက်ဂကူပိုဲ နွံပၟိက်မံၚ်တံဂှ် ပိုဲတံ သတ္တိနွံနွံ ဂစာန်ကၠောန်ကဵုအာကဵုဏောဝ် မိက်ဂွံဟီုသာ်ဏံရ” သာ်ဝွံ နာဲယက္ခ ဟီုဏာဂလာန် ပ္ဍဲအခန်ကၞာဒုၚ်တၠုၚ်ဂှ်ရ။
ကောန်သဂံၚ်ဗော်ဍုၚ်မန်တၟိ ဒးဒုၚ်လဝ်ထံၚ်မွဲအယုက် မဒှ်နာဲယက္ခကဵု နာဲဆဳဂကူတံဂှ်ဝွံ အဃောယိုက်ဂၠေၚ်မံၚ်တာလျိုၚ် ပ္ဍဲဗော်ဍုၚ်မန်တၟိဂှ် အလဵုအသဳပၞာန်ဗၟာတံ ဟိုတ်နူဖျေံဗီုကၠောန်လဝ်ဒၞက်ဂှ်ရ ပ္ဍဲသၞာံ ၂၀၀၃ ဂှ် ဒးဒုၚ်ရပ်အာတုဲ ဒးဒုၚ်ဖျေံထံၚ်မွဲအာယုက်ရ။
