မိလျးထဝ် – ပ္ဍဲကွာန်မုဟ်ဒုန် ပွိုၚ်ဍုၚ်ကအ်ခၟိုၚ်ဂှ်ဝွံ စပ်ကဵုဥက္ကဌကွာန်ဖျေံလဝ်တၚ်သ္ဂုတ်သွာတ် ပ္ဍဲကိစ္စ ကွဳလိုန်ဓါတ်ဇီုဒးတုဲ မၞိဟ်ဒးဒုၚ်ဇီုတံ သီုဒးကဵုအလေဲဂှ် ညးဍုၚ်ကွာန်တံ ဟွံပေၚ်တဴစိုတ် လ္တူတၚ်ဖျေံသ္ဂုတ်သွာတ် ဥက္ကဌကွာန်ဂှ်ရ။
ဗီုပါၚ်လုပ်ကွာန်မုဟ်ဒုန်( ဗီု - facebook : Raejae Mon)
သီုညးၜါဂှ် ရဲကွာန်တံ ပလံၚ်ဗစိုပ်ဏာရုၚ်ဂဥုဲ ကွာန်မဟေဲရ၊ ညးဗြဴဂှ် ဒးအာဝပ်ဒးဇိၚ် (၁၂) လတန်တုဲ ညးတြုံဂှ် ဒးဇိၚ်လဝ်ကၞိၚ် (၅) လတန်ကီုရ။
“ယဝ်ရအ္စာဂဥုဲတံ သၟာန်မ္ဂး ကွဳလိုန်ဓါတ်လောတ်စှေ်ကေတ်တ် အေဗီုဏံဟီု၊ ဟဂှ်ဟွံသေၚ်တှေ် အမှုဏံ ဂၠိၚ်အာဏောၚ် ကွဳလိုန်ဓါတ်ဗှေ်တံလေဝ် လာၚ်ဇြေန်ဟၟဲ ယဝ်ရအမှုဏံ မံက်အာမ္ဂး သီုဗှေ်တံ ဒးအိုတ်လှုဲ သီုကဵုဒးဒုၚ်သီထောံ ကွဳလိုန်ဓါတ်ဏောၚ် ဥက္ကဌကွာန်ဂှ် ကၟာတ်ထောံအမှုရ” သာ်ဏံ မၞိဟ်စုက်လုက်ကဵု ညးဒးဒုၚ်ဇီုလဝ်မွဲတၠ ဟီုလဴကဵုရ။
နူကဵုမၞိဟ်ဇီုဂှ် အာတ်မိက်သြန်အလေဲ ကုညးဒးဒုၚ်ဇီုလဝ် ၜါတၠဂှ် ၅ ကိုဋ် ဒကေဝ်ရ၊ ဆဂး နကဵု မာံတာန်သဵု ကဵုမိနွဲနွဲထောန်ဂှ်ဝွံ ဒဵုကဵု ၅ ကိုဋ်ဂှ် ကဵုဟွံမာန်တုဲ နူဂှ်ယှုအ်ဖျေံ သှေ် ၁ ကိုဋ်ကဵု ရ ဠက် ဒကေဝ် ဒးဒုၚ်လေဲဏာကဵုရ။
“မၞိဟ်ဒးဒုၚ်ကွဳလိုန်ဇီုၜါတၠဂှ် ဍေံတံ ကေတ်လဝ်အဆက်ကဵုအဲ နကဵုဖုၚ် ရီုဗၚ်ကဵုဍေံတံမွဲလစုတ် ဒဒှ်ရနူမၞိဟ်မွဲလ္ပာ်တေံ ကၠုၚ်ဇီုဍေံတံတုဲ သီုဍေံတံဒးကဵုသြန်အလေဲဏောၚ်၊ နကဵုအဲဂှ်လေဝ် ဟၟဲပ္ဍဲကွာန်တုဲ ပ္ဍဲစၟတ်တ္ၚဲ ၆ ဂှ် အဲဆက်ဏာဖုၚ် ကုကောန်ဂကောံပိုဲအပ္ဍဲကွာန်တေံ သွက်ဂွံ ကောံနၚ် မၞိဟ်ဒးဒုၚ်ကွဳလိုန်ဓါတ်ဇီု၊ ညးအာတ်မိက်သြန် ကဵု ဥက္ကဌကွာန်တံဂှ်တုဲ သီုပိလ္ပာ်ဂှ် ကယျာန်စာန်စးမံၚ် ညးသကအ်ဂှ်ရ ကိစ္စဏံ ဍေံဟွံပြေပြံၚ်ဏီပုဟ်၊ ညံၚ်ဂွံစှေ်ကဵု ဗဗွဲသၞောဝ်ဂှ် ဒးသောၚ်ကလးအာမံၚ်ဏီ” သာ်ဝွံ အမာတ်စၠတ်ထဝ် ဒံက်တာ အံၚ်နာၚ်ဥူ ဟီုရ။
ဥက္ကဌကွာန် နာဲညဳညဳဂှ်ဝွံ ပံက်လဝ်ဝိုၚ်ဝေၚ် (ဖဲ) ပ္ဍဲသ္ၚိညးရ၊ သုၚ်စောဲအဝဵုတုဲ စသြန်လ္တူကောန်ဍုၚ်ကွာန်၊ ဗက်စမၞိဟ်မွဲလ္ပာ်ဂှ် ကေၚ်ဒှ်ကၠုၚ်နွံဒၟံၚ်ရ၊ နကဵုရဲကွာန်တံလေဝ် ပတိုန်ထ္ၜးလဝ် သွက်ဂွံပြံၚ်လှာဲကဵု ဥက္ကဌကွာန်တၟိရ သာ်ဝွံ ညးဆက်ဟီုရ။
“ဍေံတံညးၜါဂှ် အဝဲလေဝ်ဍောတ်မံၚ် ဟီုဂးလေဝ် ဟွံလေပ်တုဲ အတိုၚ်ဥက္ကဌကွာန် ဟီုဂှ်တှေ် ဒးလေဲဏာကဵုရ၊ သီုဒးဒုၚ်ဂိ သီုဒးကဵုအလေဲဂှ် ဍေံဟွံစှေ်ဗဗွဲဓဝ်ကွေဟ်ဟ်ပုဟ်” သာ်ဏံ ရဲကွာန်မုဟ်ဒုန် ဟွံမိက်ထမံက်ယၟုမွဲတၠ ဟီုရ။
အခါရရဲကွာန်တံ အာဟီုကဵုဥက္ကဌ နာဲညဳညဳ ဒဒှ်ရ အပ္ဍဲပရေၚ်ကမၠောန်ညးကၠောန်ဒၟံၚ်လၟုဟ်ဂှ် ဗၠေတ်ဒၟံၚ်ကဵုသၞောဝ်ရောၚ်ဂှ် “နကဵုဂကောံတံ ဂရေပ်ဓရတ်အဲဏောၚ် အဲဒးကၠောန်သာ်ဏံဂှ် နကဵုအဲဂှ် သြန်မွဲဒကေဝ်လေဝ် ဟွံဂွံစလဝ်ပုဟ်” သာ်ဏံ ဟီုဏာကဵုညးဍုၚ်ကွာန်တံရ။
ခမဳသၚ်ကွာန်မုဟ်ဒုန်မွဲတၠ ဟီုဂှ်တှေ် “ဥက္ကဌကွာန် နာဲညဳညဳဂှ် ပါလုပ်ဒၟံၚ် အပ္ဍဲဂကောံအလဵုအသဳညိညကီု၊ ဇကုသုၚ်စောဲကေတ်အဝဵု နူဂကောံတံဂှ်တုဲ သ္ပမာန်၊ စမံၚ်သြန် လ္တူညးဍုၚ်ကွာန် ဗီုဗီုဏံဂှ် ဍေံဒှ်ဟွံထေက်ပုဟ်” သာ်ဝွံ ညးဟီုရ။
နာဲညဳညဳ (ခ) နာဲမျေတ်လောန်ဂှ်ဝွံ မၞံုအာယုက် (၄၀) သၞာံပြၚ်ၚ်ရ၊ လောန်ကၠုၚ် ၁၂ သၞာံတေံဂှ် နာဲညဳညဳဝွံ ညးကေၚ်ဒှ်ကၠုၚ်လဝ် ညးအုပ်ကာတုဲ လက္ကရဴဏံဂှ် ကလိဂွံကဆံၚ် ဥက္ကဌကွာန်ရ။ ညးဒှ်ကၠုၚ် ဥက္ကဌကွာန် ၜိုတ် ၅ သၞာံနွံရ။
