ဂျူရဳဆာဲ – ဗော်တဴတက်ကောန်ဂကူကရေၚ်ဍာဲ (KNPP) ဝွံ ပ္ဍဲစၟတ်တ္ၚဲ (၂၅)၊ ဂိတုဂျူလာၚ် ပယျာံနူဂယးဂှ် ပံက်ဏာရုၚ်ဆက်ဆောံကိုပ်ကၠာအိုတ် ပ္ဍဲဍုၚ်လွိုၚ်ဂဝ် (လွိုၚ်ကော်)၊ တွဵုရးကရေၚ်ဍာဲရ။
ရုၚ်ဆက်ဆောံပံက်ဏာလၟုဟ်ဝွံဂှ် သ္ပနဒဒှ်ရုၚ်ဆက်ဆောံဗဟဵု မဒှ်တုဲ ပ္ဍဲဒေသဍုၚ်လွိုၚ်ဂဝ်ဂမၠိုၚ်ဂှ်လေဝ် ထပ်ပံက်ရုၚ်ပါ်ဂမၠိုၚ်ရောၚ်ဂှ် ညးအုပ်ကာ (၁) KNPP “ဃူဥူယေဝ်” ဟီုရ။
ယၚ်ဝွံ “ ဣဏံဂှ် ရုၚ်ဆက်ဆောံတမ်ရ။ ရုၚ်ဇၞော်ဗီုဏံဂှ် ပိုဲတံရန်တၟံလဝ် သွက်ဂွံပံက် (၃) ဒၞာဲရ။ ဂိတုဏံအိုတ်တှေ် ဆက်ပံက်အာ ဒၞာဲသှေ်မံၚ်တံဂှ်ရောၚ်” ညးဟီုရ။
ပ္ဍဲအခန်ကၞာပံက်ရုၚ်ဆက်ဆောံ ပယျာံနူဂယးတ္ၚဲဏံဂှ် လ္ပာ်အလဵုအသဳဗၟာဝွံ ဂကောံဝန်ဇၞော် အလဵုအသဳ တွဵုရး ဝန်ဇၞော်ဥူသိုဝ်မျ က္ဍိုက်က္ဍိုပ်ဂမၠိုၚ်၊ ကမ္မတဳဗဟဵု (၈) တၠ နူ KNPP ကေုာံ သၞာဲဒဴဌာနမဆေၚ်စပ် ပ္ဍဲဍုၚ်လွိုၚ်ဂဝ်ဂမၠိုၚ်တံ တိုန်စိုပ်ရ။
ပ္ဍဲစၟတ်တ္ၚဲ (၇)၊ ဂိတုမာတ်တုဲကၠုၚ်တေံဝွံ နူလ္ပာ်အလဵုအသဳတံဂှ် ဒု – ဥက္ကဌ ဂကောံကမ္မတဳကမၠောန် ဓမံက်ရုပ်ရဴ ပရေၚ်ၜိုဟ်လလမ်ကၟိန်ဍုၚ် ဥူအံၚ်မေန်၊ သ္ကိုပ်ဒပ်ဌာနပၞာန်ဇၞော်ရးဗၟံက် ဇမၞော်ဗဵုသိုဝ်ထောဋ် ကေုာံ သ္ကိုပ်ဍိုက်ဍိုပ်ပၞာန် ဇမၞော်ဗဵု ဗဳထူ၊ ညးအုပ်ကာ (၁) ဃူဥူယေဝ် ကီု သီုညးစၞး (၉) တၠ နူ KNPP တံဂှ် ဆဵုဂဗညးသ္ကအ် ပ္ဍဲဍုၚ်လွိုၚ်ဂဝ်၊ တွဵုရးကရေၚ်ဍာဲရ။
ပ္ဍဲပေဲါဆဵုဂဗဂှ်ဝွံ သွက်ဂွံဒေံါပန်ပှော်၊ သွက်ဂွံပံက်ရုၚ်ဆက်ဆောံ ကေုာံ သွက်သ္ဂောံဆက်ရေၚ်တၠုၚ်အာ ပရေၚ်သဳကၠဳၜိုဟ်လလမ် ကဆံၚ်ကၟိန်ဍုၚ်ဂှ် သီုၜါလ္ပာ် ထ္ပက်လဝ်စၟတ်တဲ တုပ်စိုတ်ရ။
KNPP အာတ်မိက်လဝ်ဂှ် သွက်ဂွံဒေံါပရေၚ်ထ္ပက်ပၞာန် အပ္ဍဲကၟိန်ဍုၚ်သီုဖအိုတ်၊ လ္ပထပ်သၠောဲ ဒပ်အလဵု အသဳဂမၠိုၚ် အပ္ဍဲတွဵုရးကရေၚ်ဍာဲ၊ သွက်ဂွံဒေံါကဵု ပွမပ္ကတ်ပ္ကေၚ်ပရေၚ်ပၞာန်ဂမၠိုၚ်ကဵု ပွမဒက်ပ္တန်ဘာပ္ကတ် ပ္ကေၚ် ပရေၚ်ပၞာန်ဂမၠိုၚ် ကေုာံ သွက်ဂွံဒေံါကဵု ပွမဗ္တိုက်မံၚ်ပၞာန် ပ္ဍဲဒေသကောန်ဍုၚ်အရၚ်တၞဟ်ဟ်ဂမၠိုၚ်ကီု သီုတၚ် (၂၀) တၚ်ဂှ်ဝွံ နကဵုမူဟေၚ် လ္ပာ်အလဵုအသဳတံ တုပ်လဝ်စိုတ်တုဲ တၚ်လ္ၚဵုဂမၠိုၚ်တံဂှ် ဒးဆက်ပ္တိုန် ထ္ၜးကဵု ဇရေၚ်သမတကၟိန်ဍုၚ်ရောၚ် ဥူအံၚ်မေန် ဟီုရ။
ဗော်တဴတက်ကောန်ဂကူကရေၚ်ဍာဲ KNPP ကဵု အလဵုအသဳဗၟာတံဝွံ ပ္ဍဲသၞာံ (၁၉၉၅)၊ ဂိတုမာတ်ဂှ် တုပ်လဝ်စိုတ် ပရေၚ်ဒေံါပန်ပှော်ကီုလေဝ် ပ္ဍဲသၞာံ (၁၉၉၅)၊ ဂိတုဂျောန် အခိၚ်လအ်ဂွံ ၜိုတ် (၃) ဂိတုဂှ် ပရေၚ်ဒေံါပန်ပှော် ကလေၚ်လီုအာရ။