မာံအဲ – စပ်ကဵု သွက်ဂွံချူပလေဝ် ဒက်ပတိုန်သၞောဝ်ဥပဒေသဇိုၚ်ကၟိန်ဍုၚ် သမ္မတကၟိန်ဍုၚ်ဗၟာ ဥူတိၚ်သိၚ် ကၠောန်သ္ပပေဲါ ဆဵုဂဗသောၚ်ကလးပရိုၚ် ကုသၟာပရိုၚ် အပ္ဍဲဍုၚ်ကဵု သၟာပရိုၚ်ဍုၚ်သအာၚ်တအ် အလန်ပထမဂှ် ကၠောန်ဗဒှ်ဏာ ပ္ဍဲဍုၚ်နေပျဳတော် ပ္ဍဲဂိတုအံက်တဝ်ပါ စၟတ်တ္ၚဲ ၂၁ အခိၚ် ၂ နာဍဳ လ္ပာ်သဝ်တ္ၚဲ ဒၞာဲသ္ၚိဇၞော် သမ္မတကၟိန်ဍုၚ်ဗၟာရ။
ပ္ဍဲကဵုပေဲါဆဵု သောၚ်ကလးပရိုၚ်ဂှ် ဂကောံသၟာပရိုၚ်ပ္ဍဲဍုၚ်ကီု ဂကောံသၟာပရိုၚ်ဍုၚ်မ္ၚးကီု ပါလုပ် လၟိဟ်မၞိဟ် ဗၞတ်ၜိုတ် ၁၄၀ တၠပြၚ်ပြၚ် တိုန်စိုပ် ပ္ဍဲပေဲါဆဵုဂဗ သောၚ်ကလးပရိုၚ်ဂှ် ရောၚ် ဂွံဆဵုကေတ်ရ။
ပ္ဍဲပေဲါဆဵုဂဗ သောၚ်ကလးပရိုၚ် ကုသၟာပရိုၚ် အပ္ဍဲဍုၚ်ကဵု သၟာပရိုၚ်ဍုၚ်မ္ၚးဂမၠိုၚ်တအ်ဂှ် သမ္မတဥူတိၚ်တိၚ် ဟီုဂး သောၚ်ကလးဏာ ကုသၟာပရိုၚ်တအ် ဒဒှ်ရ ဂၠံၚ်တရဴ သွက်ဂွံပလေဝ်ပလေတ် ပရေၚ်ဒက်ပတိုန်သၞောဝ်ဥပဒေသဇိုၚ်ကၟိန်ဍုၚ် မချူဓဇက်လဝ် ပ္ဍဲသၞာံ၂၀၀၈ တေံ နွံမံၚ်ရောၚ် ဂးရ။
“နကဵု အလဵုဇကုအဲ လညာတ်အဲမွဲဓဝ် ပြံၚ်သၠာဲပလေဝ်ပလေတ် သၞောဝ်သဇိုၚ်ဥပဒေ ဒက်ပတိုၚ်ကၟိန်ဍုၚ်ဂှ်ဟီုကေတ်ဟွံဂွံပုဟ်။ လ္ပပလေဝ်လေဝ် ဟီုဟွံဂွံပုဟ်။ ပ္ဍဲကဵု ပရေၚ်ပလေဝ်ပလေဝ် ပြံၚ်သၠာဲသၞောဝ်ဂှ် တန်တဴမံၚ်ကဵု ညးစၞးစၠတ်ထဝ် ညးဍုၚ်ကွာန်တအ်ဂမၠိုၚ် မရုဲစှ်ပတိုန်လဝ် ညးစၞးမာတ် မၞုံပ္ဍဲစၠတ်ထဝ်တေံဏီရောၚ် ” သာ်ဝွံ သမ္မတ ဥူတိၚ်သိၚ် ဆက်ဟီုဏာရ။
ပေဲါသောၚ်ကလးပရိုၚ်ဂှ် စပ်ကဵုကိစ္စ ကောန်ဍုၚ်အရၚ်ဂကူကချေၚ်ကဵု ဒပ်ပၞာန်အလဵုအသဳတအ် မကတဵုဒှ်ဒၟံၚ် ပဋိပက္ခပၞာန် ပရေၚ်ဗတိုက်ပန်မံၚ် ညးသကအ်ဂှ် နူသမ္မတကီု နူရုၚ်ဇၞော်အလဵုအသဳ ကၟိန်ဍုၚ်ကီု တီမံၚ်ရရောၚ်ဂှ် ဟီုဂး သောၚ်ကလးဏာရ။
“ ဆက်စပ်ကဵု ပရေၚ်ပဋိပက္ခ ကုဂကောံရပ်လွဟ်ကောန်ဍုၚ်အရၚ်ဂကူကချၚ် ပ္ဍဲတွဵုရးကချေၚ်တေံဂှ် ပိုဲတီတီမံၚ်ရ။ ကၟိန်ဍုၚ်ပိုဲဏအ်ဂှ် ကောန်ဂကူကောန်ဍုၚ်အရၚ်တအ် ဂၠိုၚ်မံၚ် ၁၀၀ ဂကူ ပြၚ်မံၚ်တုဲ ပြသၞာ ကောန်ဂကူတအ်လေဝ်ဂၠိုၚ်မံၚ်ရောၚ်။ စနူကဵု ကၟိန်ဍုၚ်ပိုဲ ဂွံဗၠးၜးတုဲ ရပ်လွဟ် လုပ်ကၠုၚ်ပၠန်ဂးတး အိုတ်တုဲ စဵုကဵုအလဵုအသဳတၟိပိုဲဏအ်တိုန် သှ်ၜေက်ကၠုၚ်မံၚ်ဖိုဟ်ရ။ ဟိုတ်နူ အကာဲရာဏအ်တုဲ သွက်ဂွံကၠောန်ပရေၚ် ဖောအ်ဗြေဝ်ကၟိန်ဍုၚ်ဂှ် ဒှ်အခက်အခုဲ ကွေံကွေံဏောၚ်” သမ္မတဥူတိၚ်သိၚ် ဟီုရ။
စပ်ကဵုသမ္မတ ကၠောန်သ္ပပေဲါဆဵုဂဗ သောၚ်ကလးပရိုၚ် ကိစ္စကောန်ဍုၚ်အရၚ်ကဵု ပရေၚ်ချူပလေဝ်ပတိုန် သၞောဝ်ဥပဒေသဇိုၚ်ကၟိန်ဍုၚ်ဂှ် နကဵုလညာတ် က္ဍိုပ်သကိုပ် ဂကောံဗော်ရပ်လွဟ် ပရေၚ်ဍုၚ်ကွာန် ကောန်ဍုၚ်အရၚ်တအ် ဟီုဂးလဝ် သာ်ဏအ်ရ။
“ သွက်ဂွံပလေဝ် ဥပဒေသဇိုၚ်သၞောဝ်ဒက်ပတိုန်ကၟိန်ဍုၚ်ကီု စပ်ကဵုပရေၚ်ပေဲါဗတိုက်ကောန်ဍုၚ်အရၚ်တအ်ကီုဂှ် တန်တဴမံၚ်ကဵု အလဵုအသဳညးမဂွံလဝ်အဝဵု ပ္ဍဲကၟိန်ဍုၚ်တအ်ရ။ ယဝ်ရဒပ်ပၞာန်အလဵုအသဳတအ် ဟွံစှေ်ထ္ပက် လ္ပာ်ဒေသ ကောန်ဍုၚ်ရၚ်တအ်မ္ဂး ပေဲါဗတိုက်ဒပ်ပၞာန်အလဵုအသဳကဵု ကောန်ဍုၚ်အရၚ်ဂှ် ဒေံါဟောဲ အာတၟာလအ်ရ။” သာ်ဝွံ ညးကာနာနာ ဒပ်ပံၚ်ကောံကောန်ကောန်အရၚ် ယူအေမ်အေပ်ဇြဳ (UNFC) နာဲဟံသာ ဟီုဂးလဝ်ပ္ဍဲ ပေဲါသောၚ်ကလး ဆဵုဂဗကဵုညးဍုၚ်ကွာန်တအ်ဂှ်ရ။