Categories
ပရိုၚ်

ပ္ဍဲတွဵုရးမန် သ္ဂောံရာန် သြောံကသီု သွက်သ္ၚုအရန်ကၟိန်ဍုၚ် ဟွံမွဲဏီ

မာံတဵုလွဳ – ဌာနဝန်ဇၞော်ဂမၠိုၚ် ကေုာံ ဂကောံတၠကမၠောန်သြောံသ္ၚု ဍုၚ်ဗၟာဂမၠိုၚ် ပံၚ်ကောံတုဲ ကြဴနူဂိတုနဝ်ဝေမ်ပါ ၂၀ ဏံ သွက်သ္ဂောံရာန် သြောံကသီု သ္ၚုအရန်ကၟိန်ဍုၚ်ဂှ် စဳဇန်မံၚ်ရောၚ် ဂွံတီကေတ် အတိုၚ်ဓမံက် ထ္ၜးလဝ် ပ္ဍဲလိက်ပရိုၚ်အလဵုအသဳရ။

သြောံခံက် ပ္ဍဲတွဵုရးဍုၚ်မန်
သ္ၚုအရန်တံဂှ် ရာန်ကေတ် အပ္ဍဲရးလ္ဂုၚ်၊ ဨရာဝတဳ၊ မာန္တလေဝ်၊ ဗဂေါတံတုဲ ပ္ဍဲဍုၚ်မန်ဂှ် သွက်သ္ဂောံ ရာန် သ္ၚုအရန် နူကဆံၚ်လတူတေံ ကဵုနၚ်စၞောန် ဟွံမွဲဏီရောၚ်ဂှ် ဂွံတီကေတ် နူဂကောံသြောံသ္ၚု တွဵုရးမန်ရ။

“ပြဟ်ပြဟ်ဏံ ပ္ဍဲတွဵုရးမန်ဂှ် သွက်ဂွံရာန်ကေတ် သြောံကသီု သွက်သ္ၚုအရန်ဂှ် စၞောန်နၚ် ဟွံမွဲဏီပုဟ်” သာ်ဝွံ ဥူတေန်မျေတ်ဥူ နူဂကောံသြောံသ္ၚု တွဵုရးမန် ဟီုရ။

သြောံကသီု သၞာံ ၂၀၁၂-၂၀၁၃ ဂှ် အပ္ဍဲဂိတုနဝ်ဝေမ်ပါဏံ ရာန်ကေတ်ဏောၚ် ပရိုၚ်တိတ်မံၚ်ဂှ်ရ သြောံပရဟ်တံဂှ် ၚုဟ်ညိၚ်မံၚ်တုဲ သွံရာန်မံၚ် အတိုၚ်ဓမ္မတာရောၚ်ဂှ် တၠဗ္ၚဇၞော် နူဍုၚ်မုဟ်ဍုၚ်မွဲတၠ ဟီုရ။

“သြောံပရဟ်ဂှ် စရတ်မံၚ်ယျ။ ပရေၚ်သွံရာန် သြောံတၟိဂှ် ဟွံဒှ်လှဲလှဲလးလးဏီကီုလေဝ် ၚုဟ်ဍေံနွံမံၚ် ၜိုတ်ပန်ကိုဋ် (၁၀၀ န) ရ။ သြောံတြေံသြောံဇၞော်ဂှ် ၚုဟ်ဍေံ နွံမံၚ် ၜိုတ် ၆ ကိုဋ်ပြၚ်” သာ်ဝွံ သၟာဗ္ၚဇၞော်ဂှ် ဟီုရ။

သအာၚ်နူဏံပၠန် မပ္တံကဵု သြောံဇၞော်တံဂှ် ကၠာဟွံစိုပ် အခိၚ်ရတ်ဏီဏံ ဒးမံၚ်စၟရောၚ်ဂှ်လေဝ် ဂွံတီကေတ်ရ။

“တိတဵုသြောံဇၞော်အဲ နွံၜိုတ် ၃၀ ဨကဂှ် ဒးအာစၟ ၜိုတ် ၄၀ က္ဍိုပ်ကၠံတုဲ ဒကောၚ်သြောံတံ ဗုမံၚ်အိုတ်ယျ။ ဟွံဂွံသြောံရပုဟ်။ သြောံဇၞော်ဂှ် ဂွံၚုဟ်ခိုဟ်ကီုလေဝ် ဒးဘဲစၟလေဝ် ဟွံသာပုဟ်” သာ်ဝွံ သၟာဗ္ၚဇၞော်ဂှ် ဆက်ဟီုရ။

သွက်သ္ဂောံရာန်ကေတ် သ္ၚုအရန်ဂှ် နူဌာနဝန်ဇၞော် ပရေၚ်ပိုန်ဒြပ်ကေုာံ ပရေၚ်ကူသာန်သွံရာန် ဍုၚ်ဗၟာ ဟွံဂွံကဵုစၞောန်ကဵု ဌာနစၠောံဗၞိက်ဝါဗ္ၚ ပွိုၚ်ဍုၚ်မဆေၚ်စပ်တံဏီရောၚ် ဂွံတီကေတ်ရ။

“ပ္ဍဲတွဵုရးမန်ပိုဲဂှ် ဌာနဝန်ဇၞော်ကီု၊ တွဵုရးကီု ဂွံရာန်သြောံ သွက်သ္ၚုအရန်ဂှ် ဂွံစၞောန်နၚ်ဏီပုဟ်။ ရာန်တှေ်လေဝ် နူဂကောံသြောံသ္ၚုရ ရာန်မာန်ဏောၚ်။ သၞာံအာတေံလေဝ် ဌာနစၠောံဗၞိက်ဝါဗ္ၚ ဟွံရာန်ပုဟ်” သာ်ဝွံ မာန်နေဂျာမွဲတၠ နူဌာနစၠောံဗၞိက်ဝါဗ္ၚ မုဟ်ဍုၚ် ဟီုရ။

ပရေၚ်ရာန်သ္ၚုအရန်ကၟိန်ဍုၚ် သၞာံ ၂၀၁၁-၂၀၁၂ ဂှ် အတိုၚ်ၚုဟ်မး စၟတ်သမ္တီလဝ် ရာန်ကေတ် အပ္ဍဲရးဨရာဝတဳ၊ ဗဂေါ၊ လ္ဂုၚ် ၜိုတ်ထေက်ကြိုက်မာန်ကီုလေဝ် ဟွံရာန်ကေတ် ပ္ဍဲတွဵုရးမန်ရောၚ်ဂှ် ညးဆက်ဟီုရ။

သ္ၚုအရန်ဂှ် ရာန်ကေတ် အပ္ဍဲရးလ္ဂုၚ်၊ ဨရာဝတဳ၊ မာန္တလေဝ်၊ ဗဂေါတံရောၚ် မဒှ်တုဲ အလန်ပထမ ရာန်ကေတ် နူသၟာဗ္ၚ၊ အလန်ဒုတိယ ရာန်ကေတ် အပ္ဍဲညးစၞးတုဲ အလန်တတိယ ရာန်ကေတ် နကဵုသၞောတ်တေန်ဒါ (တၚ်ဒါ) ရောၚ်ဂှ် ချူလဝ် ပ္ဍဲလိက်ပရိုၚ် အလဵုအသဳဗၟာရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.