မာံသုတ – ပ္ဍဲပေဲါဆဵုဂဗ မကၠောန်ဗဒှ် ပ္ဍဲၝောံဗဒမ်တွဵုရး ဍုၚ်မတ်မလီု နဝ်ဝေမ်ပါ ၂၅ တေံဂှ် ကၟာတ်ကဵုပေဲါဗှ်လိက်ခၞံပျူရောၚ် ဥက္ကဋ္ဌကၠတ်ထဝ်ညးဍုၚ်ကွာန် သူရဥူယှိုဲမာန် ဟီုဏာကဵု ညးမတိုန်စိုပ်တံရောၚ် ဂွံတီကေတ်ရ။
“အတိုၚ်ဗော်ပိုဲ ကဵုလဝ်တာလျိုၚ်ဂှ် အဲပတိုန်ထ္ၜး ပရူကောန်ဂကူမန်ပိုဲ ဒစဵုဒစး ပေဲါဗှ်လိက်ခၞံပျူ။ ညးကၟာတ်ကဵု ပေဲါဗှ်လိက်ခၞံဏံဏောၚ် သူရဥူယှိုဲမာန် ဟီုဏာ ပ္ဍဲဂလာန်အုပ်နိဂီုညးဗက် ညးတိုန်စိုပ်တံ သီုဖအိုတ် ထံက်ဂလာန်တုဲ ရမျာၚ်တက်တဲဂှ် ကၟိုဟ်တိုန်အာ အလုံၝောံဗဒမ်မွဲဟဂှ်ရ” သာ်ဝွံ ညးစၞးကၠတ်ထဝ်ကောန်ဂကူ ပွိုၚ်ဍုၚ်ရေဝ် ဒံက်တာဗညာအံၚ်မောဝ် ဟီုရ။
ကိစ္စပေဲါဗှ်လိက်ခၞံပျူဝွံ ကၠောန်သ္ပမံၚ် သွက်သ္ဂောံဒှ်သၠေဟ်ပၟာ ပရူဝၚ်မန် ခိုၚ်ခိုၚ်ကၠိုက်ကၠိုက်တံရောၚ်ဂှ် ကောန်ဂကူမန် ဟီုအရေဝ်မန် ဟွံလေပ်တံဂှ်လေဝ် ဒုၚ်ဂိုၚ်ကေတ်လဝ်ရောၚ် ညးဆက်ဟီုရ။
“ပ္ဍဲဂကောံချေတ်ဇြာန်ဝေန်တံ ချူကၠောန်ဗဒှ်လဝ်ဂှ် ဒးဟီုဥပမာတှေ် ပျူဟံသာဝတဳ၊ ပျူသဓီု၊ ပျူမတ်မလီု၊ ပျူမုတ္တမ၊ ပျူရေဝ်၊ ပျူဗိက်၊ ပျူထဝဲါ အေဗီုဏံ အလုံဍုၚ်မွဲဂှ် သ္ပလဝ်ပျူသီုဖအိုတ်ဂှ်လေဝ် အဲပတိုန်ထ္ၜးဏာကဵု ဥက္ကဋ္ဌကၠတ်ထဝ်ကီု” သာ်ဝွံ ဒံက်တာဗညာအံၚ်မောဝ် ဆက်ဟီုရ။
ပေဲါဗှ်လိက်ခၞံ “ဂကူပျူကေုာံ ကၟိန်ဍုၚ်ပျူ” မကၠောန်သ္ပ ပ္ဍဲဍုၚ်လ္ဂုၚ် ပ္ဍဲဂိတုနဝ်ဝေမ်ပါ ၃၀ ဏံဂှ် ဇီုကပိုက်မံၚ်ကဵု သၞောဝ်သဇိုၚ်ဍုၚ် ၂၀၀၈ ပိုဒ်ဇၞော် ၃၆၄-၃၆၅ ကီုလေဝ် သာ်လဵုဂွံဖျေံဒုဟ်ဒဏ်ဂှ် ချူဓဇက်လဝ်သၞောဝ် ဟွံမွဲဏီရ။
တၠပညာ၊ ပါမောက္ခ၊ တၠလိက်ကၞပ် ဗှ်လိက်ခၞံတံဂှ် ဒှ်ဒၟံၚ်ညးဒုၚ်ကာအလဵုအသဳ ဃောယိုက်ဂၠေၚ်မံၚ်တာလျိုၚ်ဏီဂှ်ရ ပေဲါဗှ်လိက်ခၞံဝွံ ဒှ်ကမၠောန်အလဵုအသဳ သေၚ်/ဟွံသေၚ်ဂှ်လေဝ် သၟာန်ဏာ ပ္ဍဲတၚ်သၟာန်ဂှ်ကီုရ။
“အတိုၚ်လဟီု ဥူယှိုဲမာန် ဒှ်ကၠုၚ်ဟာ ဟွံဒှ်ကၠုၚ်ဟာဂှ် ပိုဲမၚ်ကျောဝ်မံၚ်စေအ်စေအ်ရ။ ယဝ်ရဒှ်ထ္ၜးဆန္ဒတှေ် ညးလဵုဍိုက်က္ဍိုပ်ဂှ်လေဝ် နူဂကောံသုတေသနဝၚ်မန် ရုဲစှ်လဝ်မၞိဟ်တုဲယျ” သာ်ဝွံ ညးအုပ်ကာနာနာ ဗော်ဒဳမဝ်ကရေသဳမန် ဒံက်တာမေန်သဵုလေန် ကော် အာစာသဝ်စောန်တၟး ဟီုရ။