မာံသုတ – ပရိုၚ်ပလီုကၠေံ ဂကောံသုတေသနဝၚ်မန် မဒက်ပ္တန်လဝ် နူဂိတုတုဲကၠုၚ်ဏံဂှ် ဟွံဍာံပြရောၚ် ညးမဒှ်ကောန်ဂကောံ၊ ကမ္မတဳကေၚ်ကာဗဟဵု ဗော်ဍုၚ်မန်တၟိ နာဲတၠညး ဟီုရ။
“ထေက်ကဵုဒးပလီုတှေ် ကောန်ဂကောံတံ သီုဖအိုတ် ဂဇအ်ကောံဓရီုတုဲ ဖျေံသ္ဂုတ်သွာတ်ဏောၚ်၊ လၟုဟ်ဂှ် ညးအုပ်ကာမွဲဓဝ် အလဵုညး ပတိတ်ကေတ်လိက်ဂှ် ဟွံဒှ်ဗဗွဲသၞောဝ်ပုဟ်၊ လညာတ်ညးမွဲဓဝ်ရဏောၚ်၊ လညာတ်ဂကောံ ဟွံသေၚ်ပုဟ်” သာ်ဝွံ နာဲတၠညး ဟီုရ။
ပ္ဍဲလိက်ပလံၚ်ဗစိုပ် ပိုဒ် (၁) ဂှ် သွက်သ္ဂောံဒစဵုဒစး တာဒၞာကၠေံ ပေဲါဗှ်လိက်ခၞံသုတေသန ဂကူပျူကေုာံ ဍုၚ်ပျူ ဒံက်တာချေတ်ဇြာန်ဝေန် ဍိုက်က္ဍိုက်ကၠောန်ဗဒှ် အပ္ဍဲနူ ၃၀-၁၁-၂၀၁၂ စဵု ၂-၁၂-၂၀၁၂ ဂှ်တုဲ ဒက်ပ္တန်ကၠုၚ် ဂကောံသုတေသနဝၚ်မန်ရောၚ် ဒုၚ်လဝ်နိဒါန်ရ။
ဟိုတ်နူပေဲါဗှ်လိက်ခၞံ ဂကူပျူကေုာံ ဍုၚ်ပျူဂှ် ဒေံါဒေၚ်အာဂှ်ရ ကမၠောန်သုတေသနဝၚ်မန်လေဝ် တုဲဒှ်အာတုဲ မ္ဒးပလီုပလာ်ကၠေံဂကောံရောၚ်ဂှ် နကဵုစၟတ်တ္ၚဲ နဝ်ဝေမ်ပါ ၂၈ ပလံၚ်ဗစိုပ်လဝ် လိက်ကဵုသမ္တီရ။
ၜိုန်ဂှ်လေဝ် ညးအုပ်ကာနာနာ ကမ္မတဳကၠောန်ဗဒှ် တ္ၚဲကောန်ဂကူမန် ဍုၚ်လ္ဂုၚ် နာဲသဵုကျဳဂှ် “ၜိုတ်အဲတီတှေ် ပေဲါဗှ်လိက်ခၞံပျူဏံ ဍေံတံ ကၠောန်ဏောၚ်၊ ဆဂး ဒေသမန်တံ ကေၚ်ဒှ်မံၚ်ဍုၚ်ပျူဏောၚ်ဂှ် ဍေံတံဗှ်ဟွံဗှ် တီဟွံချိုတ်ပၠိုတ်ဏီပုဟ်၊ ဗီုညးတံ ဆိၚ်လဝ် ကၠောန်ပိတ္ၚဲဂှ်လေဝ် ကာလဒှ်မှ ဒှ်ဏောၚ်၊ ဍေံတံ ပြံၚ်လဝ်အစဳအဇန်ညိဏောၚ် ဂွံမိၚ်ကေတ်” ဟီုသာ်ဂှ်ရ။
ပ္ဍဲပေဲါဗှ်လိက်ခၞံပျူဂှ်မ္ဂး ဍုၚ်မန်တြေံ သုဝဏ္ဏဘုံ (သဓီု) ဂှ် လီလာန်ကၠောန်သ္ပထောံ တိဍာ်ဂကူပျူတံ လုပ်ကၠုၚ်ကၠာအိုတ်ရောၚ် ကောန်ဂကူမန်တံ ပတှေ်ကေတ်လဝ်သာ်ဂှ်ရ သွက်သ္ဂောံဒစဵုဒစးအာ ပေဲါဗှ်လိက်ခၞံဂှ် ချဳဒရာၚ်ကၠုၚ်အိုတ်ရ။
ညးစၞးကၠတ်ထဝ် ကောန်ဂကူ ဒံက်တာဗညာအံၚ်မောဝ် ဂှ်လေဝ် “ဝန်ဇၞော် ဂကောံအလဵုအသဳ တွဵုရးမန်လ္ၚဵုတံဂှ် ဟွံကၠောန် ပေဲါဗှ်လိက်ခၞံပျူဏံရပုဟ် ဟီုကၠုၚ်ကဵုအဲ။ ဆဂး ဂွံသ္ပဒတန်ဂှ် အခိၚ်ပြဟ်မံၚ်ညိဏီ။ ဒးမၚ်ရံၚ်မံၚ်ဏီ။ စဵုကဵုနူတနေံတေံ အစဳအဇန် ပေဲါဗှ်လိက်ခၞံပျူဏံ ဟွံဒေံါဏီပုဟ် အဲဂွံတီကေတ်လဝ်” သာ်ဝွံ ဟီုရ။
ပ္ဍဲပေဲါဆဵုဂဗ မကၠောန်ဗဒှ် ပ္ဍဲၝောံဗဒမ်တွဵုရး ဍုၚ်မတ်မလီု ပ္ဍဲဂိတုနဝ်ဝေမ်ပါ ၂၅ တေံဂှ် အတိုၚ်ကောန် ဂကူမန်တံ အာတ်မိက်လဝ် ကၟာတ်ကဵုပေဲါဗှ်လိက်ခၞံပျူရောၚ် ဥက္ကဋ္ဌကၠတ်ထဝ်ညးဍုၚ်ကွာန် သူရဥူယှိုဲမာန် ကဵုဏာကတိပါၚ် ကုညးဒေသတံရ။
သအာၚ်နူဏံပၠန် ပေဲါဗှ်လိက်ခၞံ သုဝဏ္ဏဘုံ မကၠောန်ဗဒှ် ပ္ဍဲၝောံဗဒမ်တွဵုရးမန်၊ ဍုၚ်မတ်မလီု အပ္ဍဲဂိတုနဝ်ဝေမ်ပါ ၃၊ ၄ ဂှ် ဍုၚ်သုဝဏ္ဏဘုံဝွံ မဒှ်သဓီု ဍုၚ်မန်တြေံရောၚ် တၠပညာဝၚ် နူဒေသနာနာ၊ သွာၚ်နာနာတံ ဟီုသ္ပဒတန်အိုတ်ရ။
ဂကောံသုတေသနဝၚ်မန်ဂှ် ပ္ဍဲဂိတုအံက်တဝ်ပါ ၂၉ လောန်ကၠုၚ်ဏံ ဒက်ပ္တန်ကၠုၚ် နကဵုညးစၞး ၃၇ တၠ မပါလုပ် သီုကျာ်ဇၞော်အာစာ ဒယှ်တှ်ဂမၠိုၚ်၊ တၠပညာလိက်ပတ်မန်ဂမၠိုၚ်၊ သုတေသဳဝၚ်ဂမၠိုၚ်၊ ညးစၞး နူဗော်ပရေၚ်ဍုၚ်ကွာန်မန်ဂမၠိုၚ် ကေုာံ ဂကောံလိက်ပတ်ယေန်သၞာၚ်မန်ဂမၠိုၚ်ရ။