UNFC အာတ်မိက် သွက်ဂွံလလောၚ်ကဵု ဒေံါပန်ပှော် အလုံကၟိန်ဍုၚ်

ခတ္တာနန် – ဂကောံဓမံက်ပတိုန် ပရေၚ်ၜိုဟ်လလမ် အလဵုအသဳဗၟာ ဝန်ဇၞော်ဥူအံၚ်မေန် ဍိုက်က္ဍိုပ် ကေုာံ ကံၚ်ဇြဳဖက်ဒရေဝ် ဂကူကောန်ဍုၚ်အရၚ် ညဳသၟဟ် (UNFC) တံဂှ် ပ္ဍဲဂိတုနဝ်ဝေမ်ပါ ၉ ဏံ ဆဵုဂဗ ပ္ဍဲဍုၚ်ဇၚ်မာဲ ကၟိန်ဍုၚ်သေံတုဲ သွက်ဂွံဒေံါပန်ပှော် အလုံကၟိန်ဍုၚ် ပံၚ်ကောံချဳဒရာၚ်အာရောၚ်ဂှ် ပ္ညဳပ္ညပ်ညးသကအ်ရောၚ် ဂွံတီကေတ်ရ။

ပြသၞာပရေၚ်ဍုၚ်ကွာန်ဂှ် ညံၚ်သ္ဂောံသောၚ်ကလး ညးသကအ် နပရေၚ်ဍုၚ်ကွာန်၊ ပ္ဍဲဒေသ ဟွံဂွံဒေံါပန်ပှော်ဂှ် ညံၚ်သ္ဂောံဒေံါပန်ပှော်၊ နကဵုအလဵုအသဳ ညံၚ်သ္ဂောံလလောၚ်ကဵု ဒေံါပန်ပှော် အလုံကၟိန်ဍုၚ် ကေုာံ သွက်ဂွံဗိုၚ်ရီုဗၚ်သောၚ်ကလး ပေဲါပၞာန် မကတဵုဒှ်မံၚ် ပ္ဍဲတွဵုရးကချေၚ်တံဂှ် လပါ် UNFC ပတိုန်ထ္ၜးဏာရောၚ်ဂှ် ညးအုပ်ကာနာနာ နာဲဟံသာ ဟီုရ။

“သွက်ဂွံလလောၚ်ကဵု ဒေံါပန်ပှော် အလုံကၟိန်ဍုၚ်ဂှ် နူကဵုဥူအံၚ်မေန်မွဲကဆံၚ် ပ္တိုန်ထ္ၜးကဵု သမတဥူတိၚ်သိၚ်ဏောၚ်။ ကိစ္စဏံဂှ် သမတရ သောၚ်ကဵုမာန်ဏောၚ်။ တၚ်သၟေဟ်တံဂှ် ညးတံဒုၚ်တဲ” သာ်ဝွံ နာဲဟံသာ ဟီုရ။

နကဵု UNFC ပတိုန်ထ္ၜးကဵု ဥူအံၚ်မေန် ဂၠံၚ်ပ္ညုၚ်ပရေၚ်ဍုၚ်ကွာန် ၆ တၚ် မဖျေံလဝ် ပ္ဍဲသဘၚ်သဳကၠဳ ဂကူကောန်ဍုၚ်အရၚ်တံဂှ်တုဲ ကိစ္စဏံဂှ် ကလေၚ်သဳကၠဳအာရောၚ် နာဲဟံသာ ဟီုရ။

“အဓိကဂှ် သွက်ဂွံဒေံါပန်ပှော် အလုံကၟိန်ဍုၚ်မာန် သီုၜါလပါ် ညံၚ်ဂွံပံၚ်ကောံကၠောန်အာဂှ် ပ္ညဳပ္ညပ်ဗွဲပဏာမကဵု UNFC ဏောၚ်” သာ်ဝွံ ညးမရေၚ်တၠုၚ် ပရေၚ်ၜိုဟ်လလမ် ဥူညဵုအုၚ်မျေတ် ဟီုရ။

ပ္ဍဲပေဲါဆဵုဂဗသဳကၠဳ မကၠောန်သ္ပ ပ္ဍဲဍုၚ်ဇၚ်မာဲ ကၟိန်ဍုၚ်သေံဏံဂှ် လပါ်အလဵုအသဳ ဝန်ဇၞော်ဥူအံၚ်မေန် ဍိုက်က္ဍိုပ် ညး ၈ တၠ ကေုာံ လပါ် UNFC ညး ၉ တၠတံ ဆဵုဂဗသဳကၠဳအိုတ်ရ။

ကံၚ်ဇြဳဖက်ဒရေဝ် ဂကူကောန်ဍုၚ်အရၚ် ညဳသၟဟ် UNFC ဝွံ ဒက်ပ္တန်ကၠုၚ် ပ္ဍဲဂိတုဖေဖဝ်ဝါရဳ သၞာံ ၂၀၁၁ နကဵုဂကောံရပ်လွဟ် ကောန်ဍုၚ်အရၚ် ၁၁ ဂကောံရ။

ဝန်ဇၞော်ဥူအံၚ်မေန်ဂှ် ၜိုန်ရဂွံတၚ်တုပ်စိုတ် ဒေံါပန်ပှော် ကုဂကောံရပ်လွဟ် ကောန်ဍုၚ်အရၚ် ၁၀ ဂကောံကီုလေဝ် ပ္ဍဲအရာဒေံါပန်ပှော် ကုဂကောံဗၠးၜးကချေၚ် KIO မဒှ်ကောန်ဂကောံ UNFC ဂှ် ဟွံအံၚ်ဇၞးဏီဖိုဟ်ရ။