မာံလုၚ် – ဒဒန်ကၠောံၜဳဇၞော် ဆက်စၠောံလဝ် ဍုၚ်မတ်မလီုကဵု တ္ကအ်ခၟိုၚ် (ပွိုၚ်ဍုၚ်ၜါသွာၚ်) မဒှ်ဒၞာဲကမၠောန်ကွတ်တဲဂမၠိုၚ် ဒယှ်တှ်ဂှ် တုဲဒှ်အာမ္ဂး အပ္ဍဲဒေသ သာတုဲတဴတက်ကၠုၚ်ဂှ် စၟဳကေတ်လဝ်ရောၚ် ညးစၞးစၠတ်ထဝ်တွဵုရး၊ ပွိုၚ်ဍုၚ်ၜါသွာၚ်၊ ဒံက်တာအံၚ်နာၚ်ဥူ ဟီုရ။

ညးဝွံ “လ္ပာ်လက္ကရဴ(အနောက်ဘက်)တ္ကအ်ခၟိုၚ်ပိုဲဂှ် စုက်လုက်မံၚ်ကဵု ၜဳရ။ လ္ပာ်ကၠောန်ပ္တိတ်ကဂှ် သာတုဲတဴတက်ကၠုၚ်ရ။ ဒဒန်ဟွံမွဲတုဲ သွက်ဂွံအာပလံၚ်ဍုၚ်မတ်မလီုဂှ် ခက်ခုဲနွံဗွဲမဂၠိုၚ်ရ။ ဒဒန်ဏံတုဲတှေ် ပ္ဍဲကမၠောန်ရပ်ကကီု၊ ကမၠောန်ကွတ်တဲတၞဟ်ဂမၠိုၚ်တံကီု ပြေပြံၚ်ကၠုၚ်ရ” သာ်ဝွံ ညးဟီုရ။
နကဵုပထဝဳတိဍာ်မ္ဂး လ္ပာ်ပလိုတ်တ္ကအ်ခၟိုၚ်ဂှ် မဒှ်မံၚ်ပြၚ်ၜဳတုဲ ဒဒန်ဇၞော်ဏံတုဲမ္ဂး ကမၠောန်တမ္ၚာတံ သာတုဲတဴတက်ကၠုၚ် နူကၠာတေံဏီရောၚ်ဂှ် ညးထေၚ်ကေတ်ရ။

“အကာဲအရာဍုၚ်မတ်မလီုဂှ် ခဒမ်သ္ၚိမၞိဟ်မံၚ်တံ ဂၠိုၚ်ကၠုၚ်တုဲ ကြေပ်ဂြတ်ကၠုၚ်သိုက်က်ရ။ သွက်သ္ဂောံဇၞော်သၠဲဍုၚ်ဂှ် တတ်ဒဒန်အတ္ထရာန်တုဲ ဇၞော်သၠဲကၠုၚ် လ္ပာ်ဒေသဂအုံကွတ်စက် တေံဂှ် ညးဂမၠိုၚ်တံ တီမံၚ်ရ။ ဟိုတ်ဂှ်ရ ဒဒန်ဇၞော်ဏံတုဲမ္ဂး လ္ပာ်တ္ကအ်ခၟိုၚ်တေံဂှ်လေဝ် ဇၞော်သၠဲကၠုၚ် ဒေသဂအုံကွက်စက်မွဲမံက်တိုန်မာန်ရ” သာ်ဝွံ ညးဆက်ဟီုရ။

ပ္ဍဲကဵုတ္ကအ်ခၟိုၚ်ဝွံ ကမၠောန်တိဗုကဵု လေံဂစုန်ထံက်၊ ကမၠောန်ခၟံက်၊ ကမၠောန်ဇုက်သတ်ဗြဴ ကေုာံ ကမၠောန်ကၠောန်ဂတာတၟံဂမၠိုၚ်တံဂှ် ကမၠောန်ကၠောန်ကၠုၚ် နူကၠာတေံအဆက်က်ဂမၠိုၚ် ဒှ်တုဲ စဵုကဵုတ္ၚဲဏံ ဆက်ကၠောန်မံၚ်ဖိုဟ်ရောၚ် ဂွံတီကေတ်ရ။

ဒဒန်ကၠောံၜဳသြၚ်လောန် (တ္ကအ်ခၟိုၚ် – ဍုၚ်မတ်မလီု) မဆက်စၠောံကဵု ဍုၚ်မတ်မလီု – တ္ကအ်ခၟိုၚ် (ပွိုၚ်ဍုၚ်ၜါသွာၚ်) ဂှ် စသိုၚ်ခၞံ ပ္ဍဲတမ်သၞာံ (၂၀၁၄) မဒှ်ရောၚ်ဂှ် ဝန်ဇၞော်ပရေၚ်ဘဏ္ဍာ ကေုာံ ပရေၚ်ပိုန်ဒြပ်တွဵုရးဍုၚ်မန် ဒံက်တာခေန်မာၚ်တွေန် ဟီုကဵုဌာနပရိုၚ်ဂမၠိုၚ်ရ။

ယၚ်ဒဒန်ဂှ်ဝွံ နူအရာပ်မုဟ်ပန်၊ ဍုၚ်မတ်မလီုဂှ် ဆက်စၠောံသိုၚ်ခၞံကဵု ကွာန်မဟေဲ၊ တ္ကအ်ခၟိုၚ် (ပွိုၚ်ဍုၚ်ၜါသွာၚ်) တေံ မဒှ်တုဲ ပ္ဍဲသၞာံသြန်ဘဏ္ဍာ (၂၀၁၄ – ၂၀၁၅) ဂှ် စသိုၚ်ခၞံ နကဵုသြန်ဘဏ္ဍာ ကၟိန်ဍုၚ်ရောၚ်ဂးရ။

ဒဒန်တ္ကအ်ခၟိုၚ် – ဍုၚ်မတ်မလီုဝွံ သွက်ဂွံသိုၚ်ခၞံ ဇမၠိၚ် (၄၅၀၄) ပေပြၚ်ၚ်၊ သၠုၚ်လ္တူဗလးမုက်ဍာ် (၄၂) ပေဂှ် ခရိတ်အိုတ် ၜိုတ် (၃၀) လ္ၚီအသၚ်ဃဲယံၚ်ဒကေဝ် (ၚွေကျပ် ၃၀ Billion) ရောၚ် ဂွံတီကေတ်ရ။