မာံလုၚ် – အပ္ဍဲကဵုကၠောနှ်ဗဒှ်လေဝ် ကောံဓရီုဇၞော်ပရေၚ်ဂကူမန် အပ္ဍဲဂိတုသေပ်တေမ်ပါ ၃၀ ဂှ်တုဲ စပ်ကဵုသ္ဂောံပံၚ်တောဲ ဗော်မန်ၜါဗော်ဂှ် သဳကၠဳလဝ်ညိညမာန်ကီုလေဝ် အတိုၚ်ဆန္ဒ ခမဳသၚ်မန်တံကေုာံ ကောန်ဂကူမန်တံမ္ဂး သွက်ဗော်မန်ၜါဗော်တံ ဂွံပံၚ်တောဲအာမာန်ဂှ် ဒးဆက်ပညဳပညပ်အာပၠန်ရောၚ် သာ်ဝွံ ဥက္ကဌဗော်ဒဳမဝ်ကရေဇြဳအလုံရးမန် နာဲဇၞူမန် ဟီုရ။

နာဲဇၞူမန် ဆက်ဟီုဂှ်“အပ္ဍဲကဵုကောန်ဂကူမန်ဂှ် ဗော်မန်ဒှ်မံၚ်ၜါဗော်တုဲ မိက်သ္ဂောံသ္ပထောံမွဲဗော်ဂှ် ပိုဲတံလေဝ် နွံပၟိက်မံၚ်ကီုရ၊ တၚ်ရန်တၟံ သီုဗော်ၜါဗော်တံဂှ် အခေါၚ်အရာတုပ်သၟဟ်၊ အခေါၚ်ကံကုသဵုဇကု ဇကုဇကုဖန်က်ကေတ်၊ သွက်ဂွံဒက်ပ္တန်ဍုၚ်ဖေဝ်ဒရေဝ်တံဂှ်တုပ်တုပ်ရ၊ ဆဂး နဲကဲပရေၚ်ကမၠောန်ဂှ်တှေ် တၞဟ်ခြာမံၚ်နွံရ၊ အေဂှ် ဒးပညဳပညပ်အာသိုက်က်တှေ် အကာဲအရာပရေၚ်ပံၚ်တောဲဂှ် ဍေံခိုဟ်ကၠုၚ်မာန်ရ” သာ်ဝွံ ဟီုရ။

ဖက်ဆောညးအုပ်ကာ (၁) ဗော်ဒဳမဝ်ကရေသဳမန် အစာသဝ်ဟံၚ်ဍုၚ်ဟီုဂှ်“စပ်ကဵုဗော်မန်ၜါဗော် ဂွံပံၚ်အာဂှ် အပ္ဍဲကဵုကောံဓရီုဇၞော်ပရေၚ်ဂကူမန်ဂှ်လေဝ် နကာတၟေၚ်သဳကၠဳလဝ်ဟွံမွဲပုဟ်၊ ဆဂး နူကၠာဟွံဂွံကၠောန်ဗဒှ်ကောံဓရီုဇၞော်ဂှ်ရ စပ်ကဵုပရေၚ်ပံၚ်တောဲဗော်ၜါဗော်ဂှ် ခမဳသၚ်မန်တံကဵု ဗော်မန်ပိုဲၜါဗော်တံ ဆဵိုဂဗသဳကၠဳလဝ်တုဲမံၚ်ရ” သာ်ဝွံ ဟီုရ။

ပေဲါဆဵုဂဗသဳကၠဳခမဳသၚ်တံကဵု ဗော်မန်ၜါဗော်တံသဳကၠဳလဝ်ဂှ် သွက်ဂွံဗော်ၜါပံၚ်အာဂှ် ၃ ဂိတုပၠန်မ္ဂး ဗော် AMDP တံ ကလေၚ်ကဵုပရိုၚ်ပၠန်ရောၚ်ဟီုတုဲ ခမဳသၚ်မန်တံကဵု ညးဍုၚ်ကွာန်မန်တံ မၚ်စၟဳဗဵုမံၚ်ရ သာ်ဝွံ အစာသဝ်ဟံၚ်ဍုၚ် ဆက်ဟီုရ။

တၚ်ရန်တၟံဂကောံညဳသၟဟ်ဗော်မန်ၜါ ခမဳသၚ်မန်တံဒက်ပ္တန်လဝ်ဂှ် (၁) ဗော်မန်ဒးဒှ်မွဲဗော် ကေုာံ ညံၚ်ဂွံဒှ်မွဲရမျှာၚ်၊ (၂) သွက်သ္ဂောံဂွံအခေါၚ်အရာကောန်ဂကူမန်တံဂှ် ဆက်လုပ်အာပေဲါဗတိုက်မာန် သာ်ဝွံ တၠဂုန်ပုပ္ဖ ဟီုမြော်ရ။

တၠဂုန်ပုပ္ဖ ဆက်ဟီုမြော်ဂှ်“နကဵုမူတၠဂုန်တံတှေ် သ္ပသဇိုၚ်ကဵု ဗော်မန်ၜါဗော်တံတုဲ ဆက်ပညဳပညပ်အာဏောၚ်၊ အပ္ဍဲဂိတု အေဗရဴ စၟတ်တ္ၚဲ ၁၉ သၞာံ ၂၀၁၂ တုဲကၠုၚ်တေံဂှ် ဗော်မန်ၜါဗော်တံကဵု တၠဂုန်တံ သဳကၠဳလဝ်တုဲ သီုဂွံလဝ်တၚ်တုပ်စိုတ် သွက်ဂွံပံၚ်အာရ၊ အတိုၚ်တၚ်တုပ်စိုတ်တံဂှ်ရ မွဲဂိတုမွဲအလန် ဆဵုဗဂသဳကၠဳလဝ်ဂှ် လၟုဟ် ၁၈ ဝါ ဆဵုဂဗလဝ်တုဲရ” သာ်ဝွံ ညးဆက်မြော်ရ။

ဗော်ဒဳမဝ်ကရေသဳမန်ကောန်ဂကူမန် MNDF ဝွံ အပ္ဍဲသၞာံ ၁၉၉၀ ဂှ် လုပ်ပြိုၚ်လဝ်ပေဲါရုဲမာဲကီုလေဝ် အပ္ဍဲပေါဲရုဲစှ်မာဲ သၞာံ ၂၀၁၀ ဟွံလုပ်ဒုၚ်ရုဲမာဲဂှ် က္ဍိုပ်သ္ကိုပ်ပရေၚ်ဍုၚ်ကွာန်မန်လ္ၚဵု ဒက်ပ္တိုန်ဗော်အလုံဒေသမန် AMDP မံက်ဂတဝ်ကၠုၚ်၊ စိုပ်အပ္ဍဲသၞာံ ၂၀၁၁ ပၠန် ဗော် MNDF ဂှ် ပြံၚ်ထောံယၟု ဗော်ဒဳမဝ်ကရေသဳမန် MDP ပၠုပ်စရၚ်စၟတ်သမ္တီကုအလဵုအသဳတံတုဲ ဗော်မန်ဒှ်ကၠုၚ်ၜါဗော်ဂွံတီရ။