မာံပိုန် – အလုံညးဗြဴမန်တံ ညံၚ်ဂွံဒှ်မွဲရမျာၚ် မွဲဇြဟတ်မာန် ရန်တၟံပ္တဝ်က္ဍိုပ်တုဲ စပ္တံနူစၟတ်တ္ၚဲ ၈ ဒဵုကဵုစိုပ် ၁၂ ဂိတုမာတ် သၞာံ ၂၀၁၄ ဏံမ္ဂး ကၠောန်ဗဒှ်အာ ကောံဓရီုဇၞော် ညးဗြဴမန် (Mon Women Conference) မွဲ ပ္ဍဲကဵုဘာကျာ် ဒေါဝ်သာသနာ ၂၅၀၀ လ္တူဍုၚ်မတ်မလီု ပွိုၚ်မသုန်တ္ၚဲရောၚ် ဂွံတီကေတ်ရ။

သွက်ဂွံကၠောန်ဗဒှ်အာ ကောံဓရီုဇၞော် ညးဗြဴမန်ဂှ်မာန် ပ္ဍဲစၟတ်တ္ၚဲ ၂၅-၂-၂၀၁၄ ဂှ် ပံက်ပ္တိုန်ကမ္မတဳတိုၚ် သွက်ဂွံချဳ ဒရာၚ် ဓမံက်ရုပ်ရဴကမၠောန်မွဲတုဲ အပ္ဍဲဂှ် ညးစၞးဂမၠိုၚ် နူဂကောံညးဗြဴမန် ဗဟဵု၊ ဂကောံမိစဴဗု၊ ဂကောံစေတနာ၊ ဂကောံစဳပျး၊ ဂကောံသၟတ် MYPO၊ MYEO၊ ဋ္ဌာနပရေၚ်ပညာမန်၊ ဂကောံ MSDN၊ ဂကောံညိၚ်ဖံၚ်ဒေယှေန် စပ္တံတံ ပံၚ်တောဲပါလုပ်ရ။

ဥက္ကဋ္ဌကမ္မတဳကၠောန်ဗဒှ်ကောံဓရီုဇၞော် ညးဗြဴမန် မိချေဝ်ရဳသိုဝ်ဂှ် “အကြာပိုဲညးဗြဴမန်တံတ္ၚဲဏံဂှ် ဂကောံတေံ ကၠောန်မံၚ်ဗီုလဵု၊ မၞိဟ်ဏံ နွံမံၚ်ဗီုလဵုဂှ် ပိုဲဟွံတီလဝ်ညးသ္ကံရ၊ ဇြဟတ်ပြးမံၚ်တုဲ ရမျာၚ်လေဝ် ဟွံဒှ်မွဲရ၊ ဟိုတ်ဂှ်ရ ပ္ဍဲ ကောံဓရီုဇၞော်ဂှ် အလုံညးဗြဴမန်တံ ညံၚ်ဂွံဒှ်မွဲရမျာၚ် မွဲဇြဟတ်မာန် စွံလဝ်တၚ်အဓိကရ” သာ်ဝွံ ဟီုရ။

ပ္ဍဲကဵုကောံဓရီုဇၞော် သွက်ဂွံကၠောန်ဗဒှ် ပ္ဍဲလ္တူဍုၚ်မတ်မလီု အလန်ကၠာအိုတ်ဂှ် ညးစၞးဗၞတ် ၁၅၀ တၠ ရန်လဝ်တုဲ အပ္ဍဲဂှ် ဗော်ပရေၚ်ဍုၚ်ကွာန် ကေုာံ ဂကောံမဟာဇန်မန်နာနာကီု ဂကောံညးဗြဴ အလုံကၟိန်ဍုၚ်ဗၟာ (WLB) ကဵု ဂကောံပံၚ်တောဲညးဗြဴကၟိန်ဍုၚ်ဗၟာ (WON) တံကီု ဂကောံသၟာကမၠောန် ဂၠးကဝ် (ILO) ကီု သွက်ဂွံတိုန်စိုပ်နွံရ။

သွက်ဂွံသဳကၠဳအာ ပ္ဍဲကောံဓရီုဇၞော်ဂှ် ညးဗြဴ ကေုာံ ပရေၚ်ၜိုဟ်လလမ်ကဵု ပရေၚ်ဍုၚ်ကွာန်၊ ညးဗြဴ ကေုာံ ပရေၚ်ပညာ မဒုၚ်သ္ဇိုၚ်ကဵု ဘာသာမိ၊ ညးဗြဴ ကေုာံ ပရေၚ်ထတ်ယုက်၊ ညးဗြဴ ကေုာံ သၞောဝ်၊ ဆေၚ်ကဵုပရေၚ်ပံၚ်တောဲ (Networking) ဂမၠိုၚ် ဗၞတ်မသုန်က္ဍိုပ်လိက် ဓဇက်လဝ်အစဳဇန် ဗွဲအပြောံနွံရ။

“ပ္ဍဲကဵုခေတ်တဴတက်မံၚ်အခိၚ်တ္ၚဲဏံ ညးဗြဴ ပ္ဍဲဒေသမန်တံဖၟိုတ် ဆေၚ်ကဵုပရေၚ်ဖောအ်ဗြေဝ်၊ ပရေၚ်ဍုၚ်ကွာန်၊ ပရေၚ်ပညာ ညံၚ်ဂွံပါလုပ်ဂၠိုၚ်ၚ်မာန်ဂှ် ပၟိက်ဇၞော်မံၚ်ရောၚ်” သာ်ဝွံ ညးအုပ်ကာကမ္မတဳကၠောန်ဗဒှ် ကောံဓရီုဇၞော် ညးဗြဴမန် မိလှိုၚ်နန် ဟီုရ။

စပ်ကဵုအခန်ကဏ္ဍ ဂကောံညးဗြဴမန်ပံၚ်တောဲ (Mon Women Network) တုဲလေဝ် ဗီုပြၚ်လဵုဒက်ပ္တန်ထေက်၊ အကာဲအရာလဵု ဒးမၞုံထေက်ဂှ် နူကောံဓရီုဇၞော် သွက်ဂွံသဳကၠဳ သ္ဂုတ်သွာတ်နွံရောၚ် ဥက္ကဋ္ဌကမ္မတဳကၠောန်ဗဒှ် မိချေဝ်ရဳသိုဝ် ဂးရ။

မိချေဝ်ရဳသိုဝ်ဂှ် “ဂကောံညးဗြဴမန်ပံၚ်တောဲ (MWN) ဏံဂှ် စပံက်ပ္တန်ကၠုၚ်လဝ် နူသၞာံ ၂၀၁၁ တေံရ၊ ပ္ဍဲဗွိုၚ်ညး ဗြဴမန်ပိုဲ ဂကောံဏံ နွံထေက်၊ ဟွံထေက် ချပ်သဳကၠဳတုဲတှေ် နွံမ္ဂး ဒၞဲါလဵု၊ အကာဲအရာလဵု ဒးမံၚ်ထေက်ဂှ် ဖျေံဗီုပြၚ် က္လေၚ်လးအာ ပရေၚ်ကမၠောန်တၟိရောၚ်” သာ်ဝွံ ဟီုရ။

ကရောံမကၠောန်အာကောံဓရီုဇၞော် ညးဗြဴမန် (Mon Women Conference) ဂှ် ပ္ဍဲစၟတ်တ္ၚဲ ၈ မ္ဂး အခန်ကၞာတ္ၚဲညးဗြဴ အလုံဂၠးကဝ် (International Women Day) ကီု ပ္ဍဲစၟတ်တ္ၚဲ ၁၂ ဂှ် အခန်ကၞာတ္ၚဲညးဗြဴမန်ကီု သွက်ဂွံကၠောန် ဗဒှ်အာနွံရောၚ် ဂွံတီကေတ်ရ။