ကောံဓရီုကေၚ်ကာဗဟဵု AMDP(Facebook)
ကောံဓရီုကာမံက်တိုန် ကမ္မတဳရေၚ်တၠုၚ်ကေၚ်ကာဗဟဵုဂှ် ကၠောန်ဗဒှ်လဝ်ပ္ဍဲကဵု ဂိတုအေဗရဴ ၂၇ ဒၞာဲရုၚ်ဌာန်ဂအုပ် ဗော်ဒဳမဵုကရေဇြဳအလုံးရမန် ဍုၚ်မတ်မလီုတုဲ ဖျေံဏာသ္ဂုတ်သွာတ်ဏံရ။
“ဟိုတ်နူ ဇီုကပိုက်ဒၟံၚ်ကဵု သၞောဝ်ဥပဒေဗော် ၝောံပိုဒ် ၁၉ / ပိုဒ် (ခ) တုဲ နကဵုဗော်ပိုဲပတိတ်ထောံညးၜါတၠဏံရ၊ မၞိဟ်လ္ၚဵုပါလုပ်ဒၟံၚ်ကရောံညးတံဂှ်တှေ် သွက်ဂွံကလေၚ်စဴဗော်ပၠန်ဂှ် အကာဲအရာနွံဒၟံၚ်ဏီ၊ ပိုဲလေဝ် ပံက်လဝ်ကဵုပါၚ်တြၚ်ဖိုအ်ရ” သာ်ဏံ ကမ္မတီဗဟဵုဗော်ဒဳမဵုကရေဇြဳအလုံးရမန် နာဲဝဏ္ဏဂျီ ဟီုရ။
စပ်ကဵုကိစ္စဏံတုဲ ညးဍုၚ်ကွာန်တအ်ဂွံတီကၠး ညံၚ်ဟွံဂွံဒှ်သၠေဟ်ပမာ အပ္ဍဲကဵုပတိတ်လဝ်လိက်လလောၚ်တြးဂှ် ယဝ်ရ နကဵုညးတအ်ၜါတၠ စပ်ကဵုကိစ္စဗော်အလုံရးမန် ဟီုဂးမွဲမွဲသာ်မ္ဂး ဟွံဆေၚ်ကဵုပရေၚ်ဗော်အလုံရးမန်AMDP ရ သာ်ဝွံ နကဵုဘာသာဗၟာချူထမံက်လဝ်ရ။
ဗော်ဒဳမဵုကရေဇြဳမန် ပြံၚ်ယၟုနကဵုလုပ်သၞောဝ် ဗော်ကောန်ဂကူမန်တုဲဂှ် နာဲဇၞူမန် ကဵု နာဲချောတ်ဥူ ကေုာံ ကမ္မတီဗဟဵုလဵုတအ် ပြံၚ်စိုပ် ဗော်ကောန်ဂကူမန်ဂှ် ဂွံဆဵုကေတ်ရ။
“စိုပ်ဂိတု မေ ၂၄-၂၅ ဏံတှေ် သွက်ဂွံကၠောန် ကောံဓရီုကမ္မတီဗဟဵုပေၚ်ကၠောံသၞာံနွံဒၟံၚ်ဏောၚ်၊ အခိၚ်ဂှ်တှေ် ဆက်ရုဲစှ်အာ ညးတာလျိုၚ်တၟိပၠန်ဏောၚ်” သာ်ဆံ နာဲဝဏ္ဏဂျီ ဆက်ဟီုရ။
ပြဟ်ဟ်ဏံဒၞာဲဥက္ကဌ ဗော်ဒဳမဵုကရေဇြဳအလုံရးမန်ဂှ် ရုဲစှ်လဝ် ဥက္ကဌ(ယာယဳ) ကု“နာဲသိုက်” ရ။
ညးစၞးစၠတ်ထဝ်တွဵုရးမန် အစာသဝ် အံၚ်နာၚ်ဥူဂှ် “ ဗော်ကောန်ဂကူမန်ဂှ် ရုပ်ရဴဍေံဟွံမံက်ဏီပုဟ်၊ နကဵုပိုဲလေဝ် အတိုၚ်ဗော် AMDP ကဵုတာလျိုၚ်ဂှ် ဆက်ကၠောန်ဒၟံၚ်ဏီဖိုအ်တှေ် ပိုဲဂှ်ညးဟွံပတိတ်လဝ်နူကဵုဗော်ဏီပုဟ်” သာ်ဝွံ ဟီုလဴရ။
ယဝ်ရ ဗော်ကောန်ဂကူမန် MNP ပရေၚ်ဗော်ရုပ်ရဴမံက်ကၠုၚ်မ္ဂး နူကဵုဗော် AMDP ဂှ် တိတ်ထေက်မ္ဂး တိတ်မာန်ဏောၚ် သာ်ဏံ ညးဆက်ဟီုလဝ်ရ။
သွက်ဗော်ကောန်ဂကူမန် MNP ပရေၚ်ကမၠောန်ဂွံရေၚ်တၠုၚ်မာန် ကမ္မတီဓမံက်ရုပ်ရဴပရေၚ်ကမၠောန်ဗဟဵု(ယာယဳ) ညးစၞး ၁၅ တၠရုဲစှ်လဝ်တုဲ ပြဟ်ဟ်ဏံဝွံ နာဲဇၞူမန် ဒှ်တာလျိုၚ် ညးအာက္ဍိုက်ပ်ဂှ် ဗော်ကောန်ဂကူမန် လလောၚ်တြးလဝ် ဂွံဆဵုရ။
