ပညဳပညပ်တၚ်နၚ်သ္ဇိုၚ်တုဲဒှ်မှ ပရေၚ်ၜိုဟ်လလမ် ဗွဲမဍာံပြဂွံမာန်ရောၚ်ဂှ် က္ဍိုပ်သ္ကိုပ် ဂကောံပညဳပညပ် ပရေၚ်ဒေံါပန်ပှော်အလုံကၟိန်ဍုၚ် NCCT နာဲဟံသာ ဟီုကဵုဌာန်ပရိုၚ်ဗၠးၜးမန် IMNA ရ။

နာဲဟံသာဂှ် “ ဇၟာပ်ဗော်၊ ဇၟာပ်ဂကောံ၊ ဇၟာပ်မၞိဟ်တံဂှ် နွံပၟိက်မံၚ်ကဵု ပရေၚ်ၜိုဟ်လလမ်ဖအိုတ်ရ၊ သီုညးဖအိုတ်ဂှ် မိက်ဂွံကဵုဒှ်ပြဟ်ဟ်ရ၊ ဆဂးတှေ် တၚ်သ္ဇိုၚ် သွက်ဂွံဂွံတၚ်တုပ်စိုတ်ဂှ် လၟုဟ်ဟွံဂွံဏီတုဲ မုလေဝ် ဖျေံသ္ဂုတ်သွာတ်ဟွံဂွံပုဟ်၊ တၚ်နၚ်တံဏံဂှ် ပၟိက်ဇၞော်ကွေဟ်ဟ်ရ” သာ်ဝွံ ညးဆက်ဟီုရ။

သွက်သ္ဂောံဂွံပရေၚ်တုပ်စိုတ်ဂှ် ကမ္မတဳရေၚ်တၠုၚ်ပရေၚ်ၜိုဟ်လလမ်ကၟိန်ဍုၚ် UPWC ကဵု NCCT တံ အပ္ဍဲဂိတုအဝ်ဂါတ် စၟတ်တ္ၚဲ ၁၅-၁၆ ဏံမ္ဂး ဆက်ကၠောန်ဗဒှ်အာ ပေဲါဆဵုဂဗသဳကၠဳမွဲ လ္တူဍုၚ်လ္ဂုၚ်ရောၚ်ဂှ် ညးဆက်ဟီုရ။

တုပ်သာ်ဂှ်ကီု တုဲကၠုၚ်ဂိတုအဝ်ဂါတ် ၁၁ လောန်ကၠုၚ်ဏံ ဒုဥက္ကဌ UPWC ဝန်ဇၞော်ဥူအံၚ်မေန် ကေုာံ ဗော်ပရေၚ်ဍုၚ်ကွာန်တံ ဆဵုဂဗလဝ်ကိုပ်ကၠာအိုတ် ဒၞာဲဇြေန်တာပရေၚ်ၜိုဟ်လလမ်ဍုၚ်ဗၟာ MPC ဂှ် “ညးဒးပါလုပ်ထေက်တံပါလုပ်တုဲ သွက်ဂွံရေၚ်တၠုၚ်အာကဵု ပေဲါဆဵုဂဗသဳကၠဳပရေၚ်ဍုၚ်ကွာန်” သာ်ဝွံ အာတ်မိက်လဝ် အပ္ဍဲလိက်လလောၚ်တြး ဗော်ပရေၚ်ဍုၚ်ကွာန်တံရ။

ဒုဥက္ကဌ ဗော်ကၟိန်ဍုၚ်ဖေဝ်ဒရေဝ် FUP သဝ်တာန်မျေအ်ဂှ်“အလဵုသဳကဵု ဂကောံရပ်လွဟ် ကောန်ဂကူကောန်ဍုၚ်အရၚ်တံ ဗွဲမပြဟ် သွက်ဂွံထပက်စၟတ်တဲ ပရေၚ်ဒေံါပန်ပှော် Nationwide Ceasefire ပြဟ်ဟ်တုဲ သွက်ဂွံဆက်သဳကၠဳအာ ပရေၚ်တက်ကျာ ပရေၚ်ဍုၚ်ကွာန် ဗီုပြၚ်က္ဍိုပ်ဖဴပိမရ” သာ်ဝွံ ညးဟီုကဵု ဌာန်ပရိုၚ်ဗၠးၜးမန် IMNA ရ။

သွက်ဂွံကၠောန်ဗဒှ်ပေဲါသဳကၠဳ ဗီုပြၚ်က္ဍိုပ်ဖဴပိမမာန်ဂှ် ဂကောံ NCCT ကေုာံ ဗော်ပရေၚ်ဍုၚ်ကွာန်ဂမၠိုၚ် အပ္ဍဲဂိတုအဝ်ဂါတ် ၁၈ ဏံမ္ဂး ကၠောန်ဗဒှ်အာပေါဲဆဵုဂဗကိုပ်ကၠာမွဲဝါ လ္တူဍုၚ်လ္ဂုၚ်ရောၚ် စဳဇန်လဝ်ဂွံတီကေတ်ရ။

အပ္ဍဲကဵုပေဲါဆဵုဂဗမ္ၚးဝိုၚ် ကၠောန်ဗဒှ်လဝ် ဒၞာဲဍုၚ်မျေတ်ကျဳဏာတုဲကၠုၚ်ဏံဝွံ သွက်ဂွံဆဵုဂဗကဵု ဗော်ပရေၚ်ဍုၚ်ကွာန်တံဂှ် နူကဵု UPWC ဟီုပတိုန်ုထ္ၜးလဝ်ဂှ် လ္ပာ် NCCT တံလေဝ် တုပ်စိုတ်လ္တူမူဂှ်ကီုရ သာ်ဝွံ ညးတာလျိုၚ်ကဵုကသပ်ကဆံၚ်သၠုၚ် MPC ဥူလှမံၚ်ယှိုဲ ဟီုရ။

“အပ္ဍဲပေဲါဆဵုဂဗ စၟတ်တ္ၚဲ ၁၈ ဏံဂှ်တှေ် ဒှ်ပရေၚ်တက်ကျာဗီုပြၚ်က္ဍိုပ်ဖဴပိမ အလန်ကိုပ်ကၠာအိုတ်မွဲမာန်ဏောၚ်၊ ဆဂးဂှ် ဗော်ပရေၚ်ဍုၚ်ကွာန်ဟွံသေၚ် ဗော်မဖျေံလဝ်သဇိုၚ် အပ္ဍဲဒေသကောန်ဍုၚ်အရၚ်ဂမၠိုၚ်တံလေဝ် မွဲဗော် မၞိဟ်မွဲ ကော်ဘိက်အာဏောၚ်ဂှ် ဥူအံၚ်မေန် ရန်လဝ်ရ” သာ်ဝွံ ဥူလှမံၚ်ယှိုဲ ဆက်ဟီုရ။

ပေါဲသဳကၠဳ မပါလုပ် အလဵုအသဳ၊ ဂကောံရပ်လွဟ်ကောန်ဍုၚ်အရၚ်ဂမၠိုၚ်၊ ဗော်ပရေၚ်ဍုၚ်ကွာန်ဂမၠိုၚ် ကေုာံ ပုဂ္ဂိုလ်ညးပါလုပ်ထေက်တံမွဲဂှ် အပ္ဍဲသၞာံ ၂၀၁၅ ဏံမံက်မ္ဂး သွက်ဂွံစအာမာန်ဂှ် လ္ပာ်အလဵုသဳတံ ဆန္ဒနွံမံၚ်ရောၚ် အဃောဗော်ပရေၚ်ဍုၚ်ကွာန် ကေုာံ UPWC တံ ဆဵုဂဗအလန်ကိုပ်ကၠာအိုတ်ဂှ် ဝန်ဇၞော်ဥူအုၚ်မေန် ဟီုဂးဏာလဝ်နွံရ။