သက္ကရာဇ် ၁၃၇၆၊ ဂိတုမာ် ၁ စွေက်၊ (၂ ၊ ၄၊ ၂၀၁၅ ) ဏံ ဒှ်တ္ၚဲကောန်ဂကူမန်မရနုက် ကဵု ၆၈ ဝါတုဲ အကြာဒေသ တွဵုရးဍုၚ်မန်တံ ပတဴမံၚ်ဂတဵုမုက် ပစူတိယျဂှ် ဂွံဆဵုကေတ်ရ။

ဂတဵုမုက် (ပိုစတာ) ပစူတိတံဂှ်၊ ကမ္ပတဳကၠောန်ဗဒှ်အဆံၚ်ပွိုၚ်ဍုၚ်တံ၊ ကမ္ပတဳကၠောန်ဗဒှ် အဆံၚ်ကွာန်တံ၊ စနူဂိတုဒဳဇြေန်ဗာ မွဲဂှ်တုဲ စပစူအာဂတဵုမုက်ယျရောၚ် သာ်ဝွံ ဥက္ကဌကမ္ပတဳ ကၠောန်ဗဒှ် တ္ၚဲကောန်ဂကူမန် (ဗဟဵု) ဒံက်တာ စောန်တၟး ဟီုရ။

ဒံက်တာစောန်တၟး ဂှ် “ဨကရာဇ်မန် သၟိၚ်ဓမ္မစေတဳဂှ် ဖအောဝ်ဗလးဏာ ခမဳသၚ်တံ ဍုၚ်သဳရဳလၚ်္ကာ (တ္ကအ်သိၚ်ဃဵု) တုဲ ဗီုရုပ်က္ညစဴကၠုၚ်ဂှ် ကီု၊ အတိုၚ်ပ္ဍဲလိက်တၟံ သဳကလျာဏဳဂှ်တှေ် ဗီုရေၚ်တၠုၚ်ဂိုတ်ဂ္စာန်မံၚ် ပရေၚ်သၟးဇ္ၚး သာသနာဂှ်ကီု စုတ်လဝ်ရ” သာ်ဝွံ ဟီုကဵုဌာန်ပရိုၚ်ဗၠးၜးမန် (IMNA) ရ။

အဓိပ္ပါယ်ပ္ဍဲဂတဵုမုက်ပစူတိဂှ်တှေ် သက္ကရာဇ် (၈၃၄) သၞာံ ဂိတုမာ် ၁၁ စွေက်ဂှ်၊ သၟိၚ်ဓမ္မစေတဳ ရန်ကဵု သာသနာ ဂွံသၟးဇ္ၚးတုဲ၊ ဖအောဝ်ဗလး ဏာခမဳသၚ်မန် ၄၄ ဇကု ကဵုကလေၚ်ပတိုန်ခမဳ ပ္ဍဲသီဍာ်ကလျာဏဳ မၞုံဒၞာဲတ္ကအ်သိၚ်ဃဵုဂှ်ရ၊ သာ်ဝွံ အတိုၚ်ချူလဝ် ပ္ဍဲလိက်တၟံမန် သီကလျာဏဳဗ္ဂေါရ ရန်တၟံကဵုညးတၞဟ်ဂွံတီဂၠိုၚ်တုဲ ရုဲစှ်လဝ် ဗီုရုပ်ဏံရောၚ် ဂွံတီကေတ်ရ။

တ္ၚဲကောန်ဂကူမန် အခန်ကၞာဗဟဵုဂှ် ကၠောန်သ္ပအာ ပ္ဍဲဍုၚ်ရေဝ်တုဲ ပေဲါပြိုၚ်လိက်ပတ်မပ္တံကဵု လိက်ဇၟန် ဘာသာမန်၊ ပေဲါပြိုၚ်ဇန်ကဗျ၊ လိက်ပရေၚ်၊ ဝတ္ထု၊ ပုံအာဂီု၊ ရုပ်ဗျံက်တံ လုပ်ပြိုၚ်မာန်ရောၚ် ဂးရ။

သွက်ဂွံသ္ပစၟတ်သမ္တီ တ္ၚဲကောန်ဂကူမန် မရနုက်ကဵု ၆၈ ဝါဂှ် တက်တြးပတိတ်လဝ်ပဠောံ လ္ပာ်ဂတမုက်ဂှ် စုတ်လဝ်ရုပ် ကောန်ဍုၚ်အရၚ် ၈ ဂကူ ပံၚ်တောဲတုဲ၊ ပရေၚ်ညဳသၟဟ် (သံလွၚ်ခက်) ဓမံက်လဝ်ရုပ်ရဴ ပရေၚ်ၜိုဟ်လလမ်၊ လ္ပာ်လက္ကရဴဂှ် စုတ်လဝ်ရုပ်ဂတီုမုက် (ပိုစတာ) ပစူတိရ။

ဗီုဂှ်ကီု ပ္ဍဲရးတနၚ်သဳ၊ ကအ်သံၚ်၊ ဗိက်၊ ဘုက်ပျေန်၊ ပွိုၚ်ဍုၚ်ဍာ်ဗုကဵု တွဵုရးဍုၚ်ကရေၚ် ကျာ်ပိ၊ မြဝတဳ၊ ပွိုၚ်ဍုၚ်ကအ်ကြိက်တံ ဒက်ပတန်အာ ကမ္ပတဳကၠောန်ဗဒှ် အဆံၚ်ပွိုၚ်ဍုၚ်တုဲ၊ လ္ဂုၚ်၊ ဗ္ဂောကဵု အၚ်ဝတံဂှ်လေဝ် အရၚ်ဂွံကၠောန် တ္ၚဲကောန်ဂကူမန်ဂှ် ပလေဝ်ပလေတ်မံၚ်ဖိုဟ်ရ။

တ္ၚဲကောန်ဂကူမန်ဗဟီု မရနုက်ကဵု ၆၇ ဝါ တုဲကၠုၚ်တေံဂှ် ကၠောန်ဗဒှ်လဝ် ဒၞာဲဍုၚ်ကၟာဝက်ဂှ်ကီု၊ အခန်ကၞာ တ္ၚဲကောန်ဂကူမန် မရနုက်ကဵု ၆၆ ဝါ ဂှ် ကၠောန်ဗဒှ်လဝ် ဒၞာဲဍုၚ်ပံၚ်တံကီုရ။