“အပ္ဍဲဍုၚ်သေံဏံတှေ် သၟာကမၠောန်ညးဗြဴတံလေဝ် နွံမံၚ်တၟာဂလိုၚ်၊ ဆဂးစပ်ကဵုဂကောံညးဗြဴတုဲ မံက်က်ဂတဝ်ဝ်မွဲ ဒက်ပတန်လဝ်ဟၟဲ ကၠုၚ်ဏီ၊ လ္ပာ်ပရေၚ်လိက်ပတ် ဘာသာသနာ၊ ကဏ္ဍတၞဟ်တၞဟ်ကီု ညးဗြဴမန်တံ ဂွံလုပ်ချဳဒရာၚ်အာမာန် တုဲပၠန်မိက်ဂွံသၠုၚ်ပတိုန် အသိၚ်ညးဗြဴမန်တံ ရန်တၟံတုဲ နူကဵုဂကောံဂမၠိုၚ်တိုန်စိုပ်ကောံဓရီုတံ တုပ်စိုတ်တုဲ ဂွံတၚ်သ္ကုတ်သွာတ် သွက်ဂွံဒက်ပတန်အာ ဂကောံညးဗြဴမန် အပ္ဍဲဍုၚ်သေံမွဲဂကောံရ＂ သာ်ဝွံ ညးအုပ်ကာဂကောံမန် ပံၚ်ကောံဍုၚ်သေံ Μon Association of Thailand -MAT နာဲအာဲလွဳမန် ဟီုရ။
သွက်ဂွံခန်ကၞက်ရုဲစှ် ညးအာက္ဍိုပ်ဂကောံညးဗြဴမန်ဂှ် ဂွံအခိၚ်အောန်မံၚ်တုဲ ပြဟ်ဟ်ဏံ ဒက်ပတန်လဝ် ကမ္မတဳဂကောံ ရ တၠ နူဂှ်မွဲကဆံၚ် ညံၚ်ဂွံသၠဲပတိတ်ဇာဖိုၚ် Network ဂှ် ဒးဆက်သဳကၠဳအာမံၚ်ဏီရောၚ် စဳဇန်လဝ်နွံရ သာ်ဝွံ ညးဆက်ဟီုရ။
တုပ်သာ်ဂှ်ကီု အပ္ဍဲ ကောံဓရီုဇၞော် ဂကောံမန်ပံၚ်ကောံဍုၚ်သေံအလန်ပထမသွက်ဂွံထံက်ဗၚ် သွက်စရိတ်သြန်ဂိတုအစာမန်တံရန်တၟံတုဲ ဒက်ပတန်လဝ်ကမ္မတဳ သြန်ဂအုံ သွက်ပရေၚ်ပညာကောန်ဂကူမန်မွဲကီုရ။
“မွဲဂိတု ၅ လက် ဒကေဝ် ထံက်ပၚ်ကဵု သြန်ဂိတုသွက်အစာဘာမန်တံ ဟီုလဝ်ကီုလေဝ် ဟီုနူပရေၚ်ဘဏ္ဍာအောန်မံၚ်တုဲတှေ် ဒေသလ္ၚဵု ဒဵုကဵုလၟုဟ်ဍေံဟွံဒှ်ကၠုဏီနွံ၊ ဟိုတ်ဂှ်ရ နူကဵုဂကောံဂမၠိုၚ် နွံပ္ဍဲဍုၚ်သေံတံ ကေတ်တာလျိုၚ်ဗက်ကၠာဲကဵုသြန်ဂအုံ သွက်ဂွံထံက်ဗၚ် ကဵုသြန်ဂိတု အစာဘာမန်တံ အတိုၚ်စဳဇန်လဝ်ဂှ်ဏောၚ်＂သာ်ဝွံ သဘာပတိ ဂကောံဓရီုဇၞော် ဂကောံမန် ပံၚ်ကောံဍုၚ်သေံ MAT နာဲယှိုဲတိၚ် ဟီုရ။
ကောံဓရီုဇၞော်ဂကောံမန်ပံၚ်ကောံဍုၚ်သေံအလန်ပထမဝွံ ကၠောန်ဗဒှ်လဝ်အပ္ဍဲစၟတ်တ္ၚဲ ၆ ကဵု ရ ပွိုၚ် ၂ တ္ၚဲကၠောန်ဗဒှ်လဝ်ရ။
ကောံဓရီုဝွံ အဓိကရန်တၟအ် သွက်ဇာဖိုၚ်ဂကောံမန် မၞံုအလုံဍုၚ်သေံတံ ဂွံဗိုန်ခိုၚ်ကၠုၚ်၊ ဂကောံမွဲကဵုမွဲ ဂွံကၠောံဍညးသကအ်မာန် ကေုာံသွက်ဂွံရီုဗၚ် သၟာကမၠောန်မန်ပိုဲ ညးဒးဒုၚ်ပ္ဍဵုဍိုက်မံၚ် ဟၟဲဗဗွဲဓဝ်တံပါလုပ်တုဲ မပတံ ဂကောံထံက်ပၚ်ကွးဘာဥတုကညၚ်၊ ဂကောံဗဂဵုလဟဵုသာသနာ၊ ဂကောံရီုဗၚ်သၟာကမၠောန်၊ ဂကောံသၚ်မန်ဍုၚ်သေံ ကေုာံ ဂကောံချဳဒရာၚ်မံၚ်ပရေၚ်ဂကူမန်လ္ၚဵုတံ အပံၚ်ဖအိုတ် ၄၂ ဂကောံ မၞိဟ်ၜိုတ် ၂၀၀ တၠပြၚ်ၚ် တိုန်စိုပ်အိုတ်ရ။
ဂကောံမန်ပံၚ်ကောံဍုၚ်သေံ Μon Associattion Thai -MAT ဝွံ နကဵုတန်ရန်တၟံ သွက်ဂကူမန် မၞံုဍုၚ်သေံတံ ဂွံပံၚ်တောဲကၠာံဍညးသကအ် မာန် တုဲပၠန်မွဲအခိၚ် ဂကူမန်တံနွံမံၚ်ဍုၚ်သေံဂှ် ၜိုန်ဆကၠောန်အာကမၠောန်မွဲသာ်ဓဝ်ဟွံသေၚ် ကောန်ဂကူမန်တံ ညးညးအဲအဲၜိုတ်ထေက် ကြိုက် သီုဂွံရေၚ်တၠုၚ်အာပရေၚ်ဂကူ စပ်ကဵုကဏ္ဍနာနာတံမာန်ဂးတုဲ အပ္ဍဲဂိတု ဒဳဇြေန်ဗာ စၟတ်တ္ၚဲ ၅ သၞာံ ၂၀၁၂ ဂှ် ဒက်ပတန်လဝ်ရ။