ဗော်ကောန်ဍုၚ်အရေၚ် လုပ်ပေါဲရုဲမာဲ ၂၀၁၀ တံ ဒက်မဟာမိတ်တုဲ ပံက်လဝ်ဗော်ကောဒေံကောန်ဍုၚ်အရၚ် (ညီနောၚ်တိုၚ်းရၚ်းသားပါတီများဖက်ဒရေးရှၚ်း – Nationalities Brotherhood Federation- NBF) တံ ကၠောန်ပေါဲကောံဓရီု မရနုက်ကဵု (၂၃)ဝါ ပ္ဍဲကဵုဍုၚ်မတ်မလီု ဒၞာဲၝောံခန် ဟဝ်တေဝ် ရာမညရ။

ညးမဒှ်ဒါရိုက်တာဗော်ကောဒေံကောန်ဍုၚ်အရၚ် ဒေါ်ချေန်ချေန်ဂှ် “ နကဵုတၚ်ပထမဂှ်တှေ်သဳကၠဳအာ ပရေၚ်ၜိုပ်လလမ်အပ္ဍဲဍုၚ်၊ တၚ်ဒုတိယဂှ် စုက်ကၠုၚ်ကဵုပေါဲရုဲမာဲ ၂၀၁၅ တှေ် နကဵု NBF ဗီုလဵုဂွံအာ နနဲမဟာဗျူဟာစှေ်စှေ်၊ အခိၚ်ဏံဂှ် ပူဂဵုမိက်ဂွံပါ်ဒကးဆီ ဂကောံမိက်ဂွံပါ်ဆီ NBF ကီုဂှ် ဂၠိုၚ်မံၚ်၊ နကဵုNBF ပံၚ်တောဲတုဲ ဗော်ဒုၚ်သ္ဇိုၚ်ကဵုတွဵုရးသီုဖအိုတ် ပ္ဍ္ဍဲကဵုတွဵုရးဇကု ညံၚ်သ္ဂောံဒက်အာ ဂကောံအလဵုအသဳမာန်ဂှ် စွံအဓိကတုဲသဳကၠဳအာဏောၚ်” ဟီုရ။

ပ္ဍဲကဵုပေါဲကောံဓရီုဂှ် ညးစၞးဂကောံ NBF နူကဵုတွဵုရးဂမၠိုၚ်တိုန်စိုပ် ၅၀ တၠ၊ ညးစၞးဗော်ဒဳမဝ်ကရေဇြဳအလုံရးမန် AMDP တံတိုန်စိုပ်ဗွဲမဂၠိုၚ် ဂွံဆဵုရ။

အကာဲအရာပရေၚ်ဍုၚ်ကွာန်ကတဵုဒှ်မံၚ်လၟုဟ်ကီု အခေါၚ်အရာကောန်ဍုၚ်အရၚ်တံ ညံၚ်သ္ဂောံ ဂွံဍိုက်ဍိုက်ပေၚ်ပေၚ်မာန်၊ အကာဲအရာပေါဲရုဲမာဲသၞာံ ၂၀၁၅ ဏံကဵု သွက်ဂွံပါ်ပရအ်သုၚ်စောဲအာ သယံဇာတတံ သဳကၠဳလဝ်ရ။

ပ္ဍဲကဵုကောံဓရီုဏံ ကေတ်လညာတ်ဗော်ကောန်ဍုၚ်အရၚ်တံတုဲ ပတိတ်ဏာလိက်လလောၚ်တြး ဆေၚ်စပ် လိက်ကသုက် ပရေၚ်ဒေါံပန်ပှော်အလုံမွဲဍုၚ် (Nationwide Ceasefire Accord-NCA) သွက်ဂွံထ္ပက်စၟတ်တဲ ပြဟ်ဟ်မာန်၊ သွက်ဂွံချူခၞံစေဝ်ပၞောန်မူ ပရၚ်ဍုၚ်ကွာန်ပြဟ်ဟ်မာန်တုဲ ကၠာဟွံဂွံစိုပ် ပေါဲရုဲမာဲသၞာံ ၂၀၁၅ဏံ သွက်ဂွံကၠောန်အာပေါဲသဳကၠဳပရေၚ်ဍုၚ်ကွာန်မာန် သဳကၠဳလဝ်ရ။

တုဲပၠန်ပေါဲရုဲမာဲသၞာံ ၂၀၁၅ဏံမ္ဂး ဂကောံပါလုပ်ပ္ဍဲကဵု ဗော်(NBF) တံဂှ် မ္ၚးနူတွဵုရး ဒၞာဲရးဒေသဇၞော်ဖအိုတ် ၁၆၁ ဒၞာဲ ကေုာံ ဒၞာဲဝန်ဇၞော်ပရေၚ်ကောန်ဂကူသီုဖအိုတ်၊ သ္ကိုပ်ဝန်ဇၞော်တွဵုရးတံ နူကဵုကၠတ်ထဝ် သွက်ဂွံရုဲစှ်ကေတ်မာန် သၞောဝ်ဥပဒၝေောံပုဒ် (၂၆၁) ဂှ် ကၠာဟွံဂွံစိုပ်ပေါဲရုဲမာဲ ၂၀၁၅ဏံ ညံၚ်ဂွံပလေဝ်အာတံ ပါလုပ်ရ။

“ ပ္ဍဲကဵုတွဵုရးဍုၚ်မန်ဂှ် အမာတ်ကၠတ်ထဝ်နွံမံၚ် ၃၁ တၠ၊ ဒုၚ်ရုဲမာဲတုဲ တိုန်စိုပ်ကၠုၚ်ဂှ် ၂၃တၠ၊ နူကဵုဒပ်ပၞာန် ဟွံဒုၚ်ရုဲမာဲမွဲသာ်ဂှ် ၈ တၠနွံမံၚ်ရ။ အပ္ဍဲကဵု ၃၁ တၠဂှ် နကဵုဒေသညးကဵုညး ဒုၚ်ရုဲမာဲတုဲ ဂွံဒှ်ကၠုၚ်သ္ကိုပ်ဝန်ဇၞော်ဂှ် ပလေဝ်သၞောဝ် ၝောံပုဒ် (၂၆၁) မှ ဒှ်ကၟိန်ဍုၚ်ဖေဝ်ဒရေဝ်ဇေတ်တ်မာန်ဏောၚ်” ကမ္မတဳဗဟဵု ဗော်ဒဳမဝ်ကရေဇြဳ အလုံရးမန် နာဲကောန်ဆာန်ဟီုရ။

NBF ဂှ်ဗော်ကောန်ဍုၚ်အရၚ် ၂၁ ဗော် ဒက်မဟာမိတ်ပံၚ်ကောံပံက်လဝ်တုဲ ကၠောန်သ္ပအာပေါဲကောံဓရီုပ္ဍဲဒေသ ကောန်ဍုၚ်အရၚ် မွဲဒေသတုဲမွဲဒေသရ၊

တုပ်သာ်ဂှ်ကီု ကောံဓရီု မရနုက်ကဵု ၂၃ ဝါဏံပ္ဍဲကဵုဂိတုမေ ၂၃ဂှ် ကၠောန်ဗဒှ်ကၠုၚ်ပ္ဍဲတွဵုရးကရေၚ်၊ ပွိုၚ်ဍုၚ်ဘာအၚ်၊ ဂိတုမေ ၂၅ ဂှ် ကၠောန်ဗဒှ်ပ္ဍဲကဵုဍုၚ်မတ်မလီု၊ ဂတတေံမ္ဂး ပ္ဍဲကဵုတွဵုရး ကရေၚ်ဍာဲ၊ ရခေၚ်၊သေံ တံ သွက်ဂွံဆက်ကၠောန်အာ ဂွံတီကေတ်နူကဵု ညးမနွံတာလျိုၚ် နူကဵုဂကောံ NBF မွဲတၠရ။