သၞံၚ်တိုၚ် – သၞာံ ၂၀၁၆ တေံ ညံၚ်ဂွံဂတာပ် သွက်ဂွံသုၚ်စောဲပၟတ်ဓါတ်လလဳ နကဵုၚုဟ်မးအလဵုအသဳမာန်ဂှ် ပ္ဍဲတွဵုရးဍုၚ်မန် ပွိုၚ်ဍုၚ်ၜါသွာၚ် ဒေသတ္ကအ်ခၟိုၚ် စဗ္စူတောဲကၠောန်ဒၟံၚ်တိုၚ်ပၟတ်တအ်ယျရောၚ် ဝန်ဇၞော်ဓါတ်လလဳ တွဵုရးဍုၚ်မန် နာဲလွဳအံၚ် ဟီုကဵုသၞံၚ်တိုၚ်ရ။
“လၟုဟ်ပြဟ်ဟ်ဏအ် ကၠောန်ဗ္စူမံၚ် (တာဝါ) တိုၚ်ပၟတ်တတ်ကၠောံၜဳဂှ် ဟွံတုဲဒှ်ဏီပုဟ်၊ လ္တူသြၚ်ဂှ်တှေ် နကဵုဗါတ်ဂျေတ်တွဵုရးဂှ် တောဲကၠောန်မံၚ်တိုၚ်ပၟတ်၊ ဇုက်ပၟတ်၊ ထရာန်သဖဝ်မါတအ်ယျ၊ အခိၚ်ကာလဗလးကဵုပၟတ်နူမတ်မလီုဏံတှေ် ညံၚ်ဂွံဗလးဏာ ကဵုမာန်ရ” သာ်ဝွံ ညးဟီုထ္ၜးရ။
ၚုဟ်မးသုၚ်စောဲပၟတ်ဂှ် ကံက်အာအတိုၚ်္ၚေုဟ်အလဵုအသဳ မွဲယူဏေတ်မ္ဂး (၃၅) ဒ္ကေဝ်ရောၚ်တုဲ ပၟတ်ဓါတ်လလဳပုဂ္ဂလိကဂှ် ဒှ်ပၟတ်ထ္ပက်စုတ်လဝ်အဇာဗွဲယာယဳရောၚ်ဂှ်လေဝ် ဝန်ဇၞော်နာဲလွဳအံၚ်ဂှ် ဟီုရ။
အခိၚ်ကာလပြဟ်ဟ်ဏံ ပ္ဍဲဒေသတ္ကအ်ခၟိုၚ်ဂှ်ဝွံ နူကၠာဟွံက္လိဂွံပၟတ်အလဵုအသဳဏီမ္ဂး
ဒးရာန်သုၚ်စောဲမံၚ်ပၟတ်နူပုဂ္ဂလိက တၠ ကမၠောန်တအ် ဗလးကဵုလဝ် မွဲယူဏေတ်မ္ဂး (၅၀၀) ဒ္ကေဝ်ရောၚ် ညးဒေသတ္ကအ်ခၟိုၚ်မွဲတၠ ဟီုရ။
နူရုၚ်စက်ပၟတ်ဓါတ်လလဳၚါန်တေ ဍုၚ်မတ်မလီုမွဲက္ဆံၚ် သွက်ဂွံတြးကဵုပၟတ်အလုံဒေသတ္ကအ်ခၟိုၚ်မွဲမာန်ဂှ် ဂ္ဇံက်အာရုၚ်ပါ်ပၟတ် မၞုံဇြဟတ် (၆၆-KV) ပ္ဍဲကဵုပွိုၚ်ဍုၚ်ၜါသွာၚ်မွဲရောၚ် သ္ကိုပ်အေန်ဂျေန်ဏဳယျာ ခရိုၚ်မတ်မလီု ဥူတိၚ်သိုဲ ဟီုရ။
သွက်ဂွံတြးကဵုပၟတ်ဓါတ်လလဳ (၂၃၀) မဂ္ဂါဝါတ်ဂှ် ကမ္ပဏဳဖျေံသ္ဇိုၚ်ဍုၚ်မတ်မလီု Myanmar lighting ကဵု အလဵုအသဳတွဵုရး ဍုၚ်မန်တအ် ထ္ပက်လဝ်လိက်ကသုက်တုဲဒှ်မံၚ်ရ။
ပ္ဍဲဒေသတ္ကအ်ခၟိုၚ်ဂှ်ဝွံ သၞာံ ၂၀၁၆ တေံ ဓါတ်ပၟတ်လလဳ ကေုာံ ဒဒန်တတ်ကၠောံၜဳသြၚ်လောန်မတ်မလီု-တ္ကအ်ခၟိုၚ် ညံၚ်သ္ဂောံ ဂတာပ်တဲ တုဲဒှ်သီုၜါမာန်ဂှ် ရေၚ်တၠုၚ်ကၠောန်အာရောၚ် ဝန်ဇၞော်မၞုံအပ္ဍဲကၠတ်ထဝ် ကေုာံ အမာတ်ကၠတ်ထဝ် ဂမၠိုၚ်တအ် ဟီုဂး တဴ အိုတ်ရ။
သွက်ဒဒန်တတ်ကၠောံမတ်မလီု-တ္ကအ်ခၟိုၚ်ဂှ် သၞာံ ၂၀၁၅ သ္ကုတ်လ္ပာအိုတ်တေံမ္ဂး ၜိုတ် ၅၀% က္ဍိုပ်ကၠံ သိုၚ်ခၞံတုဲဒှ်မာန်ရောၚ် အမာတ်ကၠတ်ထဝ်ပွိုၚ်ဍုၚ်ၜါသွာၚ် နာဲအံၚ်နာၚ်ဥူ ဟီုရ။
ပ္ဍဲဒေသတ္ကအ်ခၟိုၚ် ပွိုၚ်ဍုၚ်ၜါသွာၚ်ဂှ်ဝွံ လၟိဟ်မၞိဟ် (၁၆၀၀၀၀) တၠပြၚ် ဒၟံၚ်တန်တဴမံၚ်နွံတုဲ နကဵုဂကောံကွာန် (၄၅) ကွာန်ကဵု လၟိဟ်ကွာန်ဂမၠိုၚ် အပံၚ် (၇၈) ကွာန်ဒက်ပ္တန်လဝ်ရောၚ် ဂွံတီကေတ်ရ။