ဘာပရေၚ်ပညာကောန်ဂကူမန် ပွိုၚ်ဍုၚ်ဍာ်ဗုမွဲဒၞဲါ
သၞာံဗ္တောန်ပညာတုဲကၠုၚ်တေံ အ္စာဘာဗ္တောန်လိက် ပ္ဍဲဘာကောန်ဂကူမန်တံ ညံၚ်ဂွံပေၚ် (၅၀၀၀၀) ဒ္ကေဝ် ဗပေၚ် ကဵုဏောၚ် ဟီုဂးလဝ် နွံမံၚ်တုဲ ဒၞာဲဗွဲမဂၠိုၚ်ဂှ် ကမ္မတဳဘာအဆံၚ်ၚ်တံ ဗပေၚ်ကဵုဟွံမာန်တုဲ အလုံခရိုၚ်ထဝဲါဂှ် ဒှ်အာ ခတှ် (၂၈၅)ကိုဋ်ရ။
“ပိုဲနွံပၟိက်မံၚ်သြန် ဒှ်လဝ်ခတှ် ပ္ဍဲသၞာံ (၂၀၁၄-၁၅) ဂှ် (၂၈၅) ကိုဋ်ရ။ စပ်ကဵုစရိတ်အ္စာတံဂှ် မိက်ဂွံကလးကဵုညးဍုၚ် ကွာန်ကီုရ။ အ္စာၝောံမွဲတှေ် ပိုဲကဵု (၂) ကိုဋ် ရဲကွာန်ဒးကဵု (၃) ကိုဋ် ပွိုၚ်မွဲသၞာံဂှ် ညးမွဲ (၅) ကိုဋ်။ လပါ်ပိုဲ (ဌာန ပရေၚ်ပညာ-ဗဟဵု) ဂှ် ကဵုလဝ်ပြေမံၚ်ရ။ လပါ်ရဲကွာန်ဒေသခရိုၚ်ထဝဲါတံ ကွာန်လ္ၚဵုဂှ်ဍောတ်မံၚ် သ္ၚိနွံမံၚ် (၃၀-၄၀) တှေ် ညးတံကဵုဟွံမာန်၊ အေဗီုဂှ် ပကောံတုဲ သၠုဲဒှ်အာခတှ် (၂၈၅) ကိုဋ်ဏံရ” သာ်ဝွံ ဥက္ကဋ္ဌခရိုၚ်ဓဝဲါ နာဲအံၚ်မ္ၚဵု ဟီု ကဵုသၞံၚ်တိုၚ်ရ။
သွက်ဂွံဗပေၚ်ကဵုသြန်ဏံဂှ် ပ္ဍဲဂိတုဂျောန် (၂၀) ကၠောန်သဘၚ်ဒုၚ်ဒါန် သောၚ်ကလး ပ္ဍဲဘာသဳရိမၚ်္ဂလ လ္တူဍုၚ် ရေဝ်ဂှ် ကလိဂွံသြန်ဒါန် ၜိုတ် (၄၀) ကိုဋ်တုဲ ပ္ဍဲကဵုကွာန်ဍာ်ဂမ္တဴ ပွိုၚ်ဍုၚ်ဍာ်ဗုကီု ပ္ဍဲကွာန်တၟိတဴတက် ရေဝ်သၠုၚ်ကျာ ကီု ပ္ဍဲကဵုဘာရုၚ်ဒါန် ပွိုၚ်ဍုၚ်လၟိုၚ်တံကီု သွက်ဂွံကၠောန်သ္ပအာပေဲါကောံဓရီုသောၚ်ကလး စှေ်ဒုၚ်ဒါန်နွံပၠန်ရောၚ် ဂွံတီကေတ်ရ။
ပ္ဍဲကဵုခရိုၚ်ထဝဲါဂှ် သွက်ဂွံလေဲအာ သြန်ခတှ်ဂှ်ကီု ပ္ဍဲသၞာံဂတသြန်ထံက်ပၚ်အ္စာဘာမန် ညံၚ်ဂွံပေၚ် မွဲဂိတု (၅၀၀၀၀) ဒ္ကေဝ်ဂှ်ကီု စှေ်ဒေသကွာန်ဘာကောန်ဂကူမန် နွံမံၚ်တံဂှ်တုဲ ဆက်စန်ဒက်အာ ဂကောံထံက်ပၚ် ပရေၚ် ပညာ ကဆံၚ်ၚ်ရောၚ် ညးအုပ်ကာဂကောံအ္စာဘာမန် ပွိုၚ်ဍုၚ်ရေဝ်သၟဝ်ကျာ ထဝ်နာဲအိန် ဟီုရ။
“ကွာန်လ္ၚဵုဂှ် ညးတံဂၠာဲလဝ်သြန်အကြာကွာန်တုဲ ညးတံကဵုလဝ် ဘာလ္ၚဵုဂှ် ဍေံပေၚ်အာကီု၊ လ္ၚဵုဂှ် ပဵု (ၜက်) မံၚ် လေဝ်နွံရ။ ကွာန်လ္ၚဵုဂှ် သ္ၚိနွံမံၚ် (၂၀-၃၀) ဓဝ်၊ လ္ၚဵုဂှ်ဒှ်မံၚ်အ္စာၝောံပလုၚ်ပၠန်တှေ် စရိတ်စလေဝ် ညးတံဒးကဵု ဒးဗပေၚ်ကဵု သြန်ထံက်ပၚ် (၃၀၀၀၀) ဂှ်ပၠန်တှေ် ညးတံကြေပ်အာညိ” သာ်ဝွံ ထဝ်နာဲအိန် ဆက်ဟီုရ။
ပ္ဍဲကဵုကမ္မတဳပရေၚ်ပညာကဆံၚ်ၚ်တံဂှ် သၟတ်တံပါလုပ်အောန်မံၚ်ကီု ညးနွံတာလျိုၚ်ဘိုၚ်ရေၚ်တၠုၚ်မံၚ်တံဂှ်လေဝ် နကဵုစေတနာဟေၚ် ဒးရေၚ်တၠုၚ်မံၚ်တုဲ ဒးစေက်မံၚ်စရိတ်ဂၠံၚ်ကေတ်တ်ကီု ဂွံအာဍာ်ဇမၠိၚ်မာန်ဂှ် ဝါတ်ဂါတ် မံၚ်ရောၚ် ညးဆက်ဟီုပၠန်ရ။
သာ်ဂှ်ကီု ပ္ဍဲပွိုၚ်ဍုၚ်မုဟ်ဍုၚ်ဂှ် ပဲါနူကဵုသြန်ထံက်ပၚ်နူကဵုဌာနပရေၚ်ပညာတုဲ ပ္ဍဲကွာန်လ္ၚဵုထပ်ဗပေၚ်လဝ်ကဵု နွံကီု လေဝ် အ္စာဘာဗ္တောန်လိက် ပ္ဍဲကဵုကွာန်ဗွဲမဂၠိုၚ် ကလိဂွံပေၚ်ၚ်ဂှ် အောန်တဴမံၚ်တုဲ နူကဵုကမ္မတဳပွိုၚ်ဍုၚ်လေဝ် က္လေၚ် ဗပေၚ်ကဵု ဟွံမာန်ဏီရောၚ် တၠဂုဏ်ချေတ် ဟီုလဴကီုရ။
နူကဵုကမ္မတဳဂၠာဲသြန်ဗွဝ် ပွိုၚ်ဍုၚ်ဇြပ်ဗု နာဲဝဏ္ဏဂှ် “ပိုဲဒှ်ခတှ် ဗဒဲါ (၅၀)ကိုဋ်လေဝ်၊ ကမ္မတဳပွိုၚ်ဍုၚ်ပိုဲ လေဲကဵုလဝ်တုဲ ယျ။ ကွာန်လ္ၚဵုဂှ် ဂကောံရေၚ်တၠုၚ်ပရေၚ်ပညာ ပ္ဍဲကဵုကွာန်ညးတံဂှ် ဗက်သၠုဲပ္ဍဲကွာန်ဟွံဂွံ၊ ညးတံဂွံ ထံက်ပၚ်အ္စာပ္ဍဲ ကွာန်ဂှ် ကဵုဟွံပြေ၊ လ္ၚဵုဂှ် ညးကဵုဂွံလဝ် ၜိုတ်ကဝက်၊ သြန်ထံက်ပၚ်နူကဵုကွာန် (၃၀၀၀၀) ဒ္ကေဝ်ဂှ် ကွာန်လ္ၚဵုအတိုၚ် မွဲသၞာံ ဟွံဂွံဟဂှ်ပုဟ်” သာ်ဝွံ ညးဟီုရ။
ပ္ဍဲအရာကလိဂွံသြန်ထံက်ပၚ်ဂှ် တန်တဴမံၚ်ကဵုကွာန်ဒးတာလျိုၚ်တုဲ ညးလ္ၚဵုဂှ်ကြပ်ပေၚ်မွဲကိုဋ် ကလိဂွံနွံကီုလေဝ် ကွာန်လ္ၚဵုဂှ် သြန်ထံက်ပၚ် နူကဵုဌာနပရေၚ်ပညာဟေၚ် ကလိဂွံမံၚ်ရ။ ဟိုတ်ဂှ်ရ သြန်ဗွဝ်ကလိဂွံနၚ်သီုဖအိုတ်ဂှ် ပကောံစွံလဝ် ပ္ဍဲဌာနပရေၚ်ပညာ (ဗဟဵု) တုဲ နူဂှ်မွဲကဆံၚ် ညံၚ်ဂွံထံက်ပၚ်အာ မွဲသၞောတ်ဓဝ်မာန်ဂှ် အ္စာဘာမန်တံ ဆန္ဒနွံမံၚ်ရောၚ် ဂးအိုတ်ရ။
ပ္ဍဲဒေသခရိုၚ်ထဝဲါဂှ်ဝွံ ပွိုၚ်ဍုၚ်ဍာ်ဗုဂှ် ဘာကောန်ဂကူမန် နွံမံၚ် (၂၃) ဘာ ကေုာံ အ္စာဘာ (၄၄) တၠ၊ ပွိုၚ်ဍုၚ်ရေဝ် သၠုၚ်ကျာ (၃၅)ဘာ ကေုာံ အ္စာဘာ (၁၀၂) တၠ၊ ပွိုၚ်ဍုၚ်ရေဝ်သၟဝ်ကျာ (၃၅) ဘာ ကေုာံ အ္စာ (၁၈၁) တၠတံ ယိုက် ဂၠေၚ်ကေတ်မံၚ်တာလျိုၚ်နွံရ။
