နာဲဆာန်ဍုၚ် ဒးဘဲလွဟ်တုဲ မစုတိအာ။ (ဗီု – နူညးဒေရေဝ်သၠုၚ်ကျာမွဲတၠ။)
ဌာန်ပရိုၚ်ဗၠးၜးမန် – ဒပ်ပၞာန်ဗၠးၜးကောန်ဂကူမန်(ခရိုၚ်ထဝဲါ) တမ်ဒပ်လၟိဟ် (၂) ရပ်ဂွံက္ဍိုပ်ဒမၠ ဆာန်ဍုၚ်တုဲ ဂြိပ်တိတ်အာဂှ် ပန်ကဵုလွဟ် ချိုတ်အာပ္ဍဲဂိတုဂျူလာၚ် ရ ဒၞာဲအကြာဂၠံၚ်ခရိုၚ်ထဝါဲကဵု ဌာန်ဂအုပ်ဗဟဵုဗော်ဍုၚ်မန်တၟိရ သာ်ဝွံ ညးတာလျိုၚ်ပၞာန် ခရိုၚ်ထဝါဲမွဲတၠ ဟီုလဴရ။
က္ဍိုပ်ဒမၠဆာန်ဍုၚ်ဂှ် ဗက်ပတိုက်မံၚ် အကြာပွိုၚ်ဍုၚ်ရေဝ်သၠုၚ်ကျာကဵု ရးတနၚ်သဳ၊ ပွိုၚ်ဍုၚ်ဍာ်ဗုတုဲ နူကဵုဗော်ဍုၚ်မန်တၟိ ချဳဒရာၚ်ဗက်ဂြးလုပ် စိုပ်ဒၞဲါဗဒိုပ် ဖျေံလဝ်သ္ဇိုၚ် မၞုံပ္ဍဲဒဵုပြေၚ် မသ္ၚောဲခြာနူတမ်ဒပ်ပၞာန်ဗၟာ (၂၉၉) လ္ပာ်ဒိုဟ်အဂၞဲ ဗၞတ် (၇) တိုၚ် ပ္ဍဲအခိၚ်ပယျဵုယးဂှ် ဗိုၚ်ရပ်ဂွံဂျိုၚ်ၚ် ဂးရ။
“ဒှ်ဍာံဍာံရ၊ ရပ်ဂွံဂှ် ဖါနူဂယးလေဝ်၊ ရပ်ဂွံတုဲ ပိုဲဂှ် ကော်ဖျဴနၚ် သွက်ဂွံကော်ပ္တိုန်ဏာဗဟဵုရ၊ စိုပ်ဗၟံက်ကွာန်မာန်အံၚ် အခိၚ်တ္ၚဲသဝ်ဂှ် ဍေံဂြိပ်ဂှ်ရ ရဲပိုဲတအ် ဗက်ရပ်ပန်ထောံ” သာ်ဝွံ ညးတာလျိုၚ် တမ်ဒပ်လၟိဟ် (၂) ခရိုၚ်ထဝဲါဂှ် ဟီု ထ္ၜးရ။
“ ကွးဆာန်ဍုၚ်ဂှ် စဴအာကွာန် မာန်အံၚ်အိုတ်ပိုဲဂွံမိၚ်ကေတ်ရ။ ပယာံနူဂယးပြဟ် ၂ နာဍဳဂှ် ရဲဒပ်ပိုဲတိတ်အာ နူကဵုခရိုၚ်ထဝါဲဂှ် နူဂယးပြဟ်စိုပ်ဒဵုအာဒဵုပြေၚ်၊ အဃောဆာန်ဍုၚ် တိတ်မံၚ်ဂှ်ရပိုဲရပ်ဂွံနၚ်” သာ်ဏံညးဆက်ဟီုရ။
ကရောံရပ်ဂွံဆာန်ဍုၚ်ဂှ် သီဂွံလဝ် လွဟ်လက်နက် M-16၊ အမၠံက်တဲ M 79၊ လွဟ်သေနာတ်ဂြိုပ် သီုဖၟိုတ် (၁၀) ဇကိုအ်ကဵု ဖုၚ်မွဲမ ကပေါတ်ဗွဲမဂၠိုၚ်တအ်လေဝ်သီဂွံလဝ် ညးတာလျိုၚ်ခရိုၚ်ထဝါဲဟီုလဴစလဝ်ရ။
“ဂွံပလံၚ်ဗဟဵုဂှ် ပိုဲစုတ်လဝ်ကွက်တဲ(လက်ထိပ်)၊ တ္ၚဲလေဝ်သဝ်ကၠုၚ်၊ မၞိဟ်ပိုဲလေဝ်ဍောၚ်မံၚ်အိုတ်ယျ အခိၚ်ဂှ် ၅-၆နာဍဳ ဒှ်မံၚ်ရ အဃောဇူမံၚ်ဗ္ဒာဲကွာန်မာန်အံၚ်ဂှ် ဍေံဂြိပ်ဂှ်ရပိုဲပန်၊ ဒးအာက္ဍိုပ် ဇီုဒးတၟံတုဲချိုတ်အာဒၞာဲဂှ်ရ” ညးဆက်ဟီုသာ်ဏံရ။
ဂိတုဇူလောၚ် ၈ ဂှ် ပလံၚ်ဏာဇွဆာန်ဍုၚ် ရုၚ်ဂဥုဲဇၞော် ဍုၚ်ရေဝ် စၟဳစၟတ်က္ဍိုပ်ဒမၠဒှ်ဍာံစၟဳစၟတ်ဂွံတီတုဲ ဖျေံဇွပ္ဍဲသုသာန်ဍုၚ်ရေဝ်ရ သာ်ဝွံဂွံတီနူပွဳပွိုၚ်အလဵုအသဳတံရ။
ဗော်ဍုၚ်မန်တၟိကၠာဟွံဂွံဒေါံပန်ပှော် အလန်ပထမ ပ္ဍဲသၞာံ ၁၉၉၅ ဂှ် ဆာန်ဍုၚ် ကေၚ်လုပ်ဗော်ဍုၚ်မန်တၟိ၊ သၞာံ ၂၀၀၁ တုဲကၠုၚ်တေံဂှ် တိတ်နူကဵုဗော်တုဲ လုပ်ဗော်ကလေၚ်ပတန်ဍုၚ်ဟံသာဝတဳ (HRP) ရ။
ပ္ဍဲကဵုသၞာံ ၂၀၀၆ ဂှ်ဂစိုတ်လဝ်မၞိဟ် ရဲပွိုၚ်ဍုၚ်ရေဝ်သၠုၚ်ကျာကဵု ပွိုၚ်ဍုၚ်ဍာ်ဗု ဗ္ဒာဲ ၁၀ တၠဒှ်တုဲ ဒမၠယၟုဒယှ်မံၚ်ပရေံပရေံမွဲ ဂွံတီရ။
