လွဟ် ကောန်ဍုၚ်အရၚ်တံဂှ် သွက်ဂွံကရဴစး ပါဲတိတ်အာ နူကဵုမူ ဒးပါလုပ်သီုဖ်အိုတ် ဏောၚ်ဂှ် အစဳဇန်ဟွံမွဲ သာ်ဝွံ နာဲထဝ်မန် ဥက္ကဌဗော်ဍုၚ်မန်တၟိ NMSP ဟီုရ။
လဟီုဂှ်ဝွံ ပ္ဍဲစၟတ်တ္ၚဲသပ်တေမ်ဗာ (၉) အဃောကာလ ဂကောံအလဵုအသဳ သမ္မတ တိၚ်သိၚ်က္ဍိုက်ပ် ကဵု က္ဍိုပ်သ္ကိုပ် ဂကောံရပ်လွဟ် ကောန်ဍုၚ်အရၚ်တံ ဆဵုဂဗသဳကၠဳရၚ်သ္ကံ ပ္ဍဲကန်ဗေန်ရှေန်သေန်တာ ဆေၚ်ကဵုဍုၚ်နာနာ (MICC-2) ဂှ်ရ နာဲထဝ်မန် ဥက္ကဌ ဗော်ဍုၚ်မန်တၟိ ပတိုန်ထ်ၜးဟီုဂးဏာပ္ဍဲကောံဓရီုဂှ်ရ။
နာဲထဝ်မန် ဂှ် “ ဂကောံရပ်လွဟ် ကောန်ဍုၚ်အရၚ်ပိုဲ သီုဖအိုတ်ဂှ် ဒတူလိုၚ် အတူမူ ဒးပါလုပ် သီုဖ်အိုတ်ဏောၚ်တုဲ အစဳဇန် ဂွံပါဲတိတ် ပါ်တိတ်အာ နူမူဂှ်ဂှ် ဟွံမွဲ။ ကိစ္စဏံ နအလဵုအသဳလေဝ် မိက်ဂွံကဵုဗ္စာရဏာ။ မုဒှ်ရောမ္ဂး ပ္ဍဲပရေၚ် NCA ဏံ ပါလုပ် သီုဖအိုတ် ဟွံဂွံမ္ဂး သွက်ရဲသှေ်ဂလုဲအာတံ ဍေံဟွံခိုဟ်ရ။ ဒှ်သာ်ဂှ်ရ အခေါၚ်အရာ မဂွံမံၚ်တ္ၚဲဏံဂှ် စကာဒးဒးတုဲ ဓမံက်ရုပ်ရဴအိုတ်စိုအ်” ညးဖ္တိုက်ဖ်ေအာဝ်ဏာ သာ်ဂှ်ရ။
ပၞောဝ်ကဵုဂကောံ ရပ်လွဟ် ကောန်ဍုၚ်အရၚ် ဂမၠိုၚ်ဂှ် ကုဂကောံ ၆ ဂကောံ မတွံဂး ဒပ်ပၞာန်ကဝ်က MNDAA၊ ဒပ်ပၞာန်ရခေၚ် AA၊ ဒပ်ပၞာန်ဗၠးၜးကောန်ဂကူတအာၚ် (ဂကူပလံၚ်) TLNA၊ ဂကောံ ဠဟူဒဳမဝ်ကရေတ်တေတ်ယူနဳယာန် LDU၊ ဂကောံကောန်ဂကူဝ WNO၊ ကံၚ်ဇြဳကောန်ဂကူကရေၚ် ANC တံ လုပ်ထ္ပက်စၟတ်တဲဂှ် ကဵုအခေါၚ်ဟွံမာန် လ္ပာ်အလဵုအသဳ ဂးလဝ်ရ။
စပ်ကဵုကိစ္စဂှ်တုဲ “လုပ်ထ္ပက်စၟတ်တဲ သီုညးဖ်အိုတ် မာန်မှဟေၚ် ပရေၚ်ၜိုဟ်လလံဍာံဍာံ သွက်ရးဍုၚ်ဗၟာဏံဂှ် ပိုဲဓမံက်ရုပ်ရဴ ခိုဟ်ဟ်မာန်ဏောၚ်။ ဟိုတ်ဂှ်ရ စၞးဒးဆိုက်လုပ် သဳကၠဳ နမွဲမွဲဂကောံဂှ် ထေက်ကဵု ဒးဆိုက်လုပ် သဳကၠဳ ကုဂကောံ ဖ်အိုတ်ဏောၚ်ခိုဟ်” သာ်ဝွံ သ္ကိုပ်ပၞာန် အေန်ဗာန်ဠ ဒုဥက္ကဌ KIO ဟီုဏာရ။
ဆ္ဂး ဂကောံ WNO၊ LDU၊ ANC တံဂှ် ဂွံအခေါၚ် လုပ်သဳကၠဳ ပရေၚ်ဍုၚ်ကွာန်ဏောၚ်၊ ကုဂကောံ MNDAA ဂှ် ဆဵုဂဗသဳကၠဳ ဗွဲတၞဟ်ခြာဏောၚ်ဂှ် ဂကောံ အလဵုအသဳကဵု ဂကောံ က္ဍိုပ်သ္ကိုပ်ကောန်ဍုၚ်အရၚ် မရပ်လဝ်လွဟ်တံ သဳကၠဳတုပ်စိုတ်သာ်ဂှ်ရ သာ်ဝွံ ပဒေါသဝ်ကွေဝ်ထူဝေန် နူ NCCT ဂးရ။
ဆဂှ်သၟးဟွံသေၚ် ပ္ဍဲပေါဲထ္ပက်စၟတ်တဲဂှ် ဂကောံ AA ၊ TNLA၊ NCA တံ အခေါၚ်ပါလုပ် ဟွံမွဲကီုလေဝ် အခါသဳကၠဳ ကိစ္စပရေၚ်ဍုၚ်ကွာန်တေံမ္ဂး ကဵုအခေါၚ် လုပ်သဳကၠဳကီုဏောၚ် အလဵုအသဳလေဝ် တုပ်လဝ်စိုတ် ဂးရ။
ကိစ္စ ထ္ပက်စၟတ်တဲ ဒိုအ်ပန်ပှော် အလုံဍုၚ်ဝွံ ပ္ဍဲဂိတုအဝ်ဂါတ် တုဲကၠုၚ်ဏံ ညးစၞးၜါလ္ပာ်တံ သဳကၠဳလဝ် မူ NCA တုပ်စိုတ် တုဲဒှ်မံၚ်ကီုရလေဝ် ပ္ဍဲအရာ ခုတ်ပိုၚ်ခြာ စပ်ကဵုဂကောံရပ်လွဟ် ဂွံလုပ်ထ္ပက်စၟတ်တဲဂှ်ရ လစွံစိုတ်ဟွံတုပ် ပ္ညဳရၚ်သ္ကံ ဟွံဂွံတုဲ ဍေံခက်ဆိုအ်မံၚ်ရ။
