ပေဲါထ်ၜးပျး(GS)
ယေန်သၞာၚ်ကောန်ဂကူ တွဵုရးဍုၚ်မန်ဂှ်ရောၚ် ဂွံတီကေတ်ရ။
နူဂိတုအံက်တဝ်ဗာ (၈) စဵုကဵု (၁၂) ဂှ်ကၠောန်ဗဒှ်အာ ပွိုၚ်မသုန်တ္ၚဲဂှ် ဗွဲမသက္ကုၚ္ၚုဟ်မး အာဗဵုလ္ၚတ် ပေဲါထ်ၜးပျး “ပန်ဥယျာဉ်”ဂှ်တုဲ ဒးစိုတ်မ္ဂး သီုကဵုရာန်ဂိုၚ်ဒိပ်ကေတ် တၞးကသူ၊ ရုပ်ပန်ပုတ်တံမာန်ရောၚ်။
“ပါန်ခဳ၊ ပန်ပုတ်တံဏံဂှ် တၠပညာပ္ဍဲတွဵုရးဍုၚ်မန်ပိုဲလေဝ် နွံတၟာဟလိုၚ်၊ ဆဂး ဗွဝ်ဖျာညးတံ ဟွံမွဲပုဟ်။ ဗွဝ်ဖျာ ဟွံမွဲတှေ် ဇြဟတ်ကၠောန်ဂှ် ဟွံမွဲပုဟ်။ ယဝ်ရဗွဝ်ဖျာနွံတှေ် ဇြဟတ်ကၠောန်ညးတံ ဍေံတိုန်ကၠုၚ်ဏောၚ်။ အစောန် စရာဲညးတံ ဍေံတိုန်ကၠုၚ်ဏောၚ်” သာ်ဝွံ ညးလျိုၚ်ပရေၚ်ယေန်သၞာၚ် တွဵုရးဍုၚ်မန် ဝန်ဇၞော်ဒံက်တာမာံနဲသဵု ဟီုကဵုသၞံၚ်တိုၚ်ရ။
ဂကောံဗွိုၚ်ပရေၚ်ပိုန်ဂြပ်အာဇြဳယာန် (AEC) ဂှ် ဒှ်ကၠုၚ်မ္ဂး ကၟုဲအာတရဴဍုၚ်သ်အာၚ်တံ ကၠုၚ်စိုပ်ဂၠိုၚ်ကီုရောၚ်။ ဟိုတ်နူ ကဵုကၟုဲအာကၠုၚ်ဂၠိုၚ်ဂှ် ဗွဝ်ဖျာအနုသုခုမတံ မံက်ကၠုၚ်မာန်တုဲ တၠပညာပန်စှ်ဂကူတံလေဝ် အစောန်စရာဲကမၠောန် သၠုၚ်ကၠုၚ်မာန်ရောၚ် ညးထပ်ဟီုရ။
ဒၞာဲတိုက်ထ်ၜးကောန်ဂကူ ဍုၚ်မတ်မလီုလၟုဟ်ဝွံ ကၠာနူကဵု (၂၀၁၀) တေံဂှ် ဒုၚ်လဝ်ယၟုတိုက်ထ်ၜးပျးယေန်သၞာၚ်မန် ရောၚ်။ ဟိုတ်နူကဵုပရေၚ်ပြံၚ်လှာဲအလဵုအသဳဂှ် ယၟုတိုက်ထ်ၜးပျးယေန်သၞာၚ်မန်ဂှ် ပြံၚ်လှာဲအာတိုက်ထ်ၜးပျးကောန် ဂကူကီုလေဝ် ကပေါတ်တြေံတြဟ်ထ်ၜးလဝ်တံဂှ် ကပေါတ်မန်ဟေၚ် ဂၠိုၚ်တဴမံၚ်ရောၚ်။
တ္ၚဲပံက်အခန်ကၞာထ်ၜးပျးဂှ် သ္ကိုပ်ဝန်ဇၞော်တွဵုရးဍုၚ်မန် ဥူအုမ်မျေအ်ကီု ညးလျိုၚ်ပရေၚ်ယေန်သၞာၚ် ဝန်ဇၞော်ဒံက် တာ မာံနဲသဵုကီု ဝန်ဇၞော်နူကဵုဌာနအလဵုအသဳတံကီု ညးတာလျိုၚ်ဌာနနာနာတံကီု ဂကောံမဟာဇန်တံကီု ဂကောံ တၠပညာပန်စှ်ဂကူတံကီု ကွးဘာတံကီု ညးစိုတ်လုပ်စတံကီု တိုန်စိုပ်ဗဵုလ္ၚတ်အိုတ်ရ။
ၚ္ၚုဟ်မးသွံဂွံ တၞးပါန်ခဳ ကပေါတ်ရုပ်ပန်ပုတ်တံဂှ် နကဵုအခြာမွဲမွဲကီု အ္စာကသူဓဇက်ရုပ်တုပ်တံ စရိတ်ညးတံဓဇက် ရုပ်နတဲဂှ် (၅၀) က္ဍိုပ်ကၠံဂှ် ကဵုအာဒါန်ပရေၚ်ထံက်ပၚ် ညးဒးဘဲဍာ်တံရောၚ် ဥက္ကဋ္ဌ ဂကောံပါန်ခဳ၊ ပန်ပုတ် ဥူညာဏ်အံၚ် ဟီုရ။
နကဵုဂကောံပါန်ခဳ ပန်ပုတ်တံဂှ် ပံၚ်တောဲကဵုဂကောံဆာန်ကၟိန်လိက်ပတ် ပွိုၚ်ဍုၚ်မတ်မလီုတုဲ အခိၚ်ကၠောန်ဗဒှ်ပေဲါ ဟီုတွံလိက်ပတ် ဒၞာဲဘာမဟာမျာၚ်ဂှ် ကေၚ်ထ်ၜးပျးလဝ်ညိည နွံကၠုၚ်လဝ်ကီုရ။
ဂကောံတၠပညာပန်စှ်ဂကူ ပွိုၚ်ဍုၚ်မတ်မလီုဂှ် နူကဵုသက္ကရာဇ် (၂၀၁၂) တေံ ဒက်ပတန်လဝ် နကဵုကောန်ဂကောံ (၃၂) တၠတုဲ ပရေၚ်ထ်ၜးပျးပ္ဍဲကဵုတိုက်ထ်ၜးယေန်သၞာၚ်ကောန်ဂကူဂှ် အလန်ကိုပ်ကၠာအိုတ်ရောၚ် ဂွံတီကေတ်ရ။
