သွက်ဂွံစုတ်မာဲ ပလေဝ်ပလေတ်မံၚ်
ရုၚ်ကမ္မယှေန် ပေါဲရုဲမာဲ တွဵုရးမန် ဟီုရ။
သွက်ဂွံရုဲစှ် ညးစၞး ကၠတ်ထဝ်အဆံၚ်ၚ်ဂှ် ကၠောန်ကၠုၚ်ပေါဲရုဲမာဲ ပ္ဍဲဂိတုနဝ်ဝေမ်ဗာ ၈ ၊၂၀၁၅ ဏံတုဲအာဣရ။ စရၚ်ညးစၞး ဇၞးမာဲတအ်ဂှ်လေဝ် နူကမ္မယှေန်ပေါဲရုဲမာဲကၟိန်ဍုၚ်တေံ လလောၚ်ပ္တိတ်ကဵု တုဲမံၚ်ကီုရတုဲ ညးစၞးလုပ်ဒုၚ်ရုဲမာဲတအ် ခရိတ်ဇကုစကာအိုတ်လဝ် ပ္ဍဲကာလပေါဲရုဲမာဲဂှ် ကၠောန်စရၚ်တုဲ ဒးပ္တိုန်ထ်ၜးကဵု ပ္ဍဲရုၚ်ကမ္မယှေန်မာဲ မဆေၚ်စပ် ကုညးကဵုညးဂှ်ဏောၚ်။
“ပ္ဍဲတွဵုရးမန်ပိုဲဂှ် မၞိဟ်ပ္တိုန်ထ်ၜးမာန် လၟုဟ်မှ ဂွံလဝ်မွဲတလဓဝ်။ တ္ၚဲဏံရ ကၠုၚ်ပ္တိုန်ုလဝ်။ တ္ၚဲဒးပ္တိုန်ဂှ် တ္ၚဲလဵု ဒှ်တ္ၚဲ လက္ကရဴအိုတ်၊ ဗီုလဵုဒးပ္တိုန်ဂှ် တၞးလိက် ဗီုဂွံပ္တိုန်ဂှ် ပိုဲသီုပရးလဝ် သီုလလောၚ်ထ်ၜးလဝ် ပ္ဍဲရုၚ်တအ်ရ။ ဟွံပ္တိုန်ဟွံဂွံ ဒးပ္တိုန်ထ်ၜးတွဵုဏောၚ်၊ ဟွံပ္တိုန်ထ်ၜးတှေ် ဒးဒုၚ်ကေတ်အရေဝ်ဏောၚ်ဂှ် ဇၟာပ်ညးစၞး တီလဝ်တုဲတုဲမံၚ်ရ” သာ်ဝွံ ဥုဟိၚ်လေန်ထိတ် ညးလျိုၚ်ပေါဲရုဲမာဲ နူရုၚ်ကမ္မယှေန် ပေါဲရုဲမာဲ တွဵုရးမန် ဟီုရ။
မၞိဟ်ကၠုၚ်ပ္တိုန်ထ်ၜးလဝ် စရၚ်ခရိတ်ပေါဲရုဲမာဲ လၟုဟ်ဂှ် ဥုဃောန်သိၚ် ညးစၞး လုပ်ရုဲပုဂ္ဂလိကဂှ်ဏောၚ် ပ္တိုန်လဝ် ဂွံတီကေတ်ရ။
ပ္ဍဲကာလပေါဲရုဲမာဲ ၂၀၁၅ ဏံ ပ္ဍဲတွဵုရးမန်ဏံဂှ် ညးစၞးဂမၠိုၚ် နူဗော် ၁၈ ဗော် မပ္တံ ဗော် NLD၊ ဗော်ကောန်ဂကူမန်၊ ဗော်ဒဳမဵုကရေဇြဳ အလုံရးမန်၊ ဗော်ညးဗြဴ (မန်) ၊ ဗော်ပျဳခါၚ်ဖျဵု ကေုာံ ညးစၞးပုဂ္ဂလိက တအ် သီုဖ်အိုတ်ပံၚ်မ္ဂး ညးစၞးလုပ်ပြိုၚ် ၂၇၉ တလရ။
နူကမ္မယှေန် ပေါဲရုဲမာဲကၟိန်ဍုၚ် လလောၚ်ပ္တိတ် စရၚ် ညးဇၞးမာဲတုဲဒှ်အာမ္ဂး ပ္တံနူတ္ၚဲလလောၚ် တုဲအာဂှ်တုဲ အပ္ဍဲပွိုၚ် ၆၀ တ္ၚဲ ညးစၞးလုပ်ရုဲမာဲတအ် ဒးပ္တိုန်ထ်ၜး စရၚ် ခရိတ်စကာ မအိုတ်လဝ်တအ်ဂှ်ဏောၚ်။ တုဲပၠန် ခရိတ်စကာအိုတ် ပ္ဍဲပေါဲရုဲမာဲဂှ်လေဝ် ၜက်အာ လ္တူနူ ၁၀၀ ကိုဋ်ဟွံဂွံ သာ်ဝွံ ဂးလဝ် ပ္ဍဲၝောံပိုဒ် ၇၄ ဥပဒေနဲကဲပေါဲရုဲမာဲ ဂှ်ရ။
ဆဂှ်သၟးဟွံသေၚ် လၟောဝ်ညးစၞးကၠတ်ထဝ် (ဟွံ) ညးစၞးပေါဲရုဲမာဲဝွံ သွက်ဂွံ ဗိုၚ်ရီုဗၚ်အာ ကလောန် ဆေၚ်ကဵုပရေၚ်ရုဲမာဲဂှ် ကဵုခရိတ်တုဲ ခါန်စွံလဝ် ညးစၞးပေါဲရုဲမာဲ မွဲတလ၊ သွက်ရုၚ်မာဲတအ်ဂှ်လေဝ် ညးစၞးရုၚ်မာဲ/အရီုဗၚ်ရုၚ်မာဲမွဲတလ၊ စရေ(တခဳ) မွဲတလ၊ ညးဆဝ်မာဲမွဲတလ အရီုဗၚ်ရုၚ်မွဲတလ ခါန်စွံဂွံ၊ ပ္ဍဲရုၚ်မာဲမွဲ အတိုၚ်စရၚ် တၠမာဲဆန္ဒ ပြၚ်အာ ၃၀၀ မ္ဂး ထပ်ခါန်စွံ စရေ (တခဳ) မွဲတလ၊ညးဆဝ်မာဲ မွဲတလ၊ အရီုဗၚ်ရုၚ်မွဲတလ ခါန်စွံဂွံရ။ မ္ၚးနူ အရာဟီုကၠုၚ်လဝ်ဏံတုဲ ပ္ဍဲကိစ္စတၞဟ်ဟ်တအ် သွက်ဂွံခါန်စွံမၞိဟ် နကဵုခရိတ်ဂှ် အခေါၚ်ဟွံမွဲရဂှ်လေဝ် ဂးလဝ် ပ္ဍဲသၞောဝ်ရုဲမာဲဂှ်ရ။
ခရိတ်တအ်ဂှ်လေဝ် နအလဵုလဵု ဇကုညးစၞး ပ္တိတ်ကဵုဂွံ။ နူကမ္မယှေန် ပေါဲရုဲမာဲ ရးဒေသဇၞော် ဟွံသေၚ်သာ်ဂှ် တွဵုရး တေံ လလောၚ်ပ္တိတ် ယၟုညးစၞးတုဲမ္ဂး ပတွဵုနူတ္ၚဲဂှ်တုဲ ပ္ဍဲပွိုၚ် ၆၀ တ္ၚဲ ခရိတ်စကာ အိုတ်လဝ်တအ်ဂှ် ညးစၞးလုပ်ပေါဲရုဲမာဲတအ် ဒးပ္တိုန်စရၚ် ပ္ဍဲကမ္မယှေန် ညးကဵုညး (ကမ္မယှေန် နေပျဳဒဝ်၊ ကမ္မယှေန် ရး/ဒေသ ညးကဵုညး၊ကမ္မယှေန်ခရိုၚ်) တအ်ဂှ်ဏောၚ်။
ကာလပ္တိုန်ပၠန်လေဝ် တၞးဒုၚ်သစာ ဂတမုက် နာဲဗ္စာမွဲမွဲ (အဆံၚ် ဟွံသဝ်နူ နာဲဗ္စာပွိုၚ်ဍုၚ်) ဂှ်လေဝ် ဒးတောဲပ္တိုန်ဏာကီုဏောၚ် ဂးလဝ် ပ္ဍဲသၞောဝ်ဂှ်ရ။
မွဲပၠန်ဂှ် ညးစၞးတအ် သ္ဂောံဂွံ အခေါၚ်လုပ်ပေါဲရုဲမာဲ ၂၀၁၅ ဂှ်လေဝ် ဒးပ္တိုန်လိက်အခေါၚ် နကဵုခရိတ် ပိကိုဋ်ဒ္ကေဝ် ပ္ဍဲကမ္မယှေန်ပေါဲရုဲမာဲ ညးကဵုညးဂှ်လေဝ် နွံကၠုၚ်မံၚ်တုဲ ညးစၞး ၁၁၅ တလ မဂွံလဝ်မာဲ ဗၞတ် ဒ္စါံဘိုအ် မွဲဘိုအ် ကေုာံ လ္ပာ်လ္တူတအ်ဂှ်လေဝ် အခေါၚ်က္လေၚ်ပ္တိတ်ကေတ်နွံ ဂွံတီကေတ် နူရုၚ်ကမ္မယှေန် ပေါဲရုဲမာဲတွဵုရးရ။
