ပ္ဍဲစၟတ်တ္ၚဲ ဇာန္နဝါရဳ ၂၆ အ္ခိၚ်သဝ်တ္ၚဲ (၆)နာဍဳ ကၠောန်သ္ပဏာ ပေါဲရုဲစှ်မိသၟာကျေဝ် (မိယေန်သၞာၚ်) Miss Mon State 2016 ပ္ဍဲၝောံခန်တွဵုရးမန် ဍုၚ်မတ်မလီုဂှ်တုဲ ဇြေန်ရတဳလေန် (ကော်) ဇြေန်မာဝေန် ကောန်ဍုၚ် ကျာ်ထဝ် က္လိဂွံဏာ ၝောံကိုဋ် ဗြကၞေၚ် ဂွံတီကေတ်ရ။

“ကော်ယၟုဇကုဏောၚ်ဂှ် ဇကုလေဝ် ဟွံတော်လဝ်တှေ် အခါညးကော် ယၟုဇကုဂှ် ၚၚ်အာမွဲလ္စုတ်ရ၊ တုဲမှ ကော်မံၚ်ယၟုအဲဏောၚ်သွံ တီကေတ်တုဲ မိသ္ဇက်ဟီုဟွံမွဲရ” သာ်ဝွံ ညးမဂွံဏာ ၝောံကိုဋ်ဗြကၞေၚ် Miss Mon State ဇြေန်ရတဳလေန် ဂးရ။

နကဵုဍေံ လုပ်ပြိုၚ်ပေါဲဏံဂှ် ဒှ်အလန်ကၠာအိုတ်ရ။ ဟိုတ်နူဂစာန်ကၠုၚ်လဝ် တၟာကလှေ်ကီုဂှ်ရ က္လိဂွံလာဘ် သာ်ဏံဂှ် မိပ်ပြေစိုတ်ဗွဲမလောန်ရဂှ်လေဝ် ဍေံဆက်ဟီုရ။

မိဇြေန်ရတဳလေန် ညးမၜှ်ဂွံဏာ ၝောံကိုဋ်ဗြကၞေၚ် Miss Mon State 2016 ဝွံ အယုက် ၂၂ မိမ မန်ဗၟာ နူဗ္ဒိုပ်ကပေါဝ် တံဒဵုကျာ်ဣသိယဵု ဍုၚ်ကျာ်ထဝ်တေံတုဲ ခြာဟွံလအ် နူကၟိန်ဍုၚ် “ကၠောန်ပေါဲရုဲစှ် မိသၟာကျေဝ် စၞးကၟိန်ဍုၚ်- Miss Golden Land Myanmar 2016 အရၚ်ဂွံလုပ် “ပေါဲပြိုၚ်မိသၟာကျေဝ်ဂၠးကဝ်” ဏောၚ်တုဲ မိဇြေန်ရတဳလေန်လေဝ် က္လိဂွံအခေါၚ်လုပ်ပြိုၚ် စၞးတွဵုရးမန်ကီုဏောၚ်ရ။

ပ္ဍဲပေါဲ Miss Golden Land Mon State 2016 ဏံဝွံ မိလေန်ဠာတ်အံၚ် ဂှ်က္လိဂွံလာဘ် 1st Runner Up တုဲ မိယေမန်တ(ရည်မွန်သန်႔) ဂှ် က္လိဂွံလာဘ် 2nd Runner Up ရ ဂွံတီကေတ်။

“ဒှ်လုပ်ပေါဲဏံဂှ် ဂွံအဆက်ကဵု ရဲမွဲတုဲဏောၚ် အဲဒှ်ပြိုၚ်အာ။ တုဲပၠန် စိုတ်လုပ်စကဵုက္ဍိုပ်လိက် Miss Golden Land Mon State ဂှ်တုဲ မုဒှ်ဒှ်လေဝ် ညးပၠောပ်အဝေါၚ် ကဵုမန်ဇကု၊ ကဵုဒၞါဲကဵု မန်ဇကုတှ်ေ ဇကုလေဝ် မန်မွဲကီုရတှေ် လုပ်ပြိုၚ်ကၠုၚ်” သာ်ဝွံ ကောန်ညးဍုၚ်ရေဝ် မိတွေဝ်တာမျာတ်နဵု (တွယ်တာမြတ်နိုး) မလုပ်ပြိုၚ် Miss Golden Land Mon State ဂှ် ဟီုရ။
ပ္ဍဲပေါဲပြိုၚ် တွဵုရးမန်ဏံဂှ် မိသၟာကျေဝ် (၁၉) တလတံ လုပ်ပြိုၚ်ကၠုၚ် နကဵုအစဳဇန်မ္ဂး- ပွမပြိုၚ်ကဵု ကယိုၚ်ယေန်သၞာၚ်၊ ကယျိုၚ်ပယျာံသဝ်တ္ၚဲ၊ ကယျိုၚ်ၜိၚ်ဍာ် ကေုာံ ပွမဒးပြိုၚ် နကဵု အစောံစရာဲ ဍာ်ဒကေဝ် ညးမွဲမွဲ တံပါလုပ်ရ။

ပ္ဍဲညး ၁၉ တလ မလုပ်ပြိုၚ် မိသၟာကျေဝ် စၞးတွဵုရးမန် Miss Mon State 2016 ဂှ် နူပွိုၚ်ဍုၚ်မတ်မလီု (၈) တလ၊ ပွိုၚ်ဍုၚ်ကျာ်ထဝ် (၄) တလ၊ ပွိုၚ်ဍုၚ်ရေဝ် (၃) တလ၊ပွိုၚ်ဍုၚ်မုဟ်ဍုၚ် (၁) တလ၊ ပွိုၚ်ဍုၚ်ပံၚ် (၁) တလ၊ ရးလ္ဂုၚ် (၁) တလ ကေုာံ တွဵုရးသေံဇၞော် (၁) တလ တံ လုပ်ပြိုၚ်ကၠုၚ်အိုတ်ရ။

သၞာံအာတေံလေဝ် ပေါဲပြိုၚ် Miss Universe Mawlamyine 2015 အလန်ကၠာအိုတ် ပ္ဍဲတွဵုရးမန်ဂှ်လေဝ် ပ္ဍဲဗ္တံ ဂိတုအဝ်ဂါတ် ၃၁ ဂှ် ကၠောန်ဗဒှ်ကၠုၚ် ပ္ဍဲ Strand Hotel ဍုၚ်မတ်မလီုတုဲ မိသၟာကျေဝ် ၂၁ တလ နူတွဵုရးမန်ဂှ် လုပ်ပြိုၚ်ကၠုၚ်ရ။ ပ္ဍဲ ၂၁ တလဂှ် မိအိဖျဵုတွေဝ် (အိဖြိုးသွယ်) ၜှ်ဂွံဏာ ၝောံကိုဋ် ဗြကၞေၚ် ဂွံတီကေတ်ကီုရ။