ရန်တၟအ်သ္ဂောံဓမံက်ပ္တိုန်ပရောဒဒှ်ဝၚ်ဍုၚ်တ္ကံခၟိုၚ်မာန်ဂှ် ကျာ်ဇၞော်အ္စာဇေယျဝံသ သ္ပကမကထတုဲ ပ္ဍဲဂိတုဖေဖဝ်ဝါရဳ ၂၅ အခိၚ်ပယျာံသဝ်တ္ၚဲဂှ် ကၠောန်ဗဒှ်ဏာပေဲါဗှ်လိက်စံၚ်ပရောဝၚ်ဍုၚ်ခၟိုၚ် ဋ္ဌာနဘာဇေယျဝံသ ကွာန်ၝောံနက် ပွိုၚ် ဍုၚ်ၜါသွာၚ် (ဒေသတ္ကံခၟိုၚ်) ဂှ်ရ။

ပ္ဍဲကဵုပေဲါဗှ်လိက်စံၚ်ဂှ်ဝွံ ကျာ်ဇၞော်အ္စာပါလိတ၊ အ္စာဝၚ်လိက်တၟအ်နာဲဘယှေန်၊ နာဲမၞိက်ၜိုပ် (နာဲမိုၚ်တဝ်)၊ အ္စာအေ ကျူ (အ္စာကျူယှေန်မ္ၚး) ကေုာံ ခမဳသၚ်နူကဵုဂကောံဂၠိုက်ဂၠာဲဝၚ်ဍုၚ်ခၟိုၚ်မွဲဇကုတံ ပ္တိုန်ထ်ၜးဗှ်ဏာလိက်စံၚ် မဆက်စပ် ကဵုပရောပရာဝၚ်ဍုၚ်ခၟိုၚ်ဂမၠိုၚ် ဗၞတ်မသုန်စံၚ်ကီုရ။

“ဟိုတ်ဂွံကၠောန်ပေဲါဏံဂှ် ပိုဲမိက်ဂွံဓမံက်ပ္တိုန်ဝၚ်တ္ကံခၟိုၚ်၊ တ္ကံခၟိုၚ်ဏံဂှ် ဍုၚ်တြေံ နွံဒှ်ကၠုၚ်လဝ်ၜါဍုၚ်၊ ပိုဲညာတ်လဝ် ပ္ဍဲ လိက်ပုံမၚ်ဗၠာဲကောန်တၟံ၊ ဗီုသာသနာကျာ် စိုပ်ကၠုၚ်ဍုၚ်ခၟိုၚ်ဏံ ဗီုရဲခၟိုၚ်နွံပြာကတ် က္လိဂွံလဝ်ဓါတ်သော်တံဂှ် ကျာ်လဵု ကျာ်လဵု မိက်ဂွံဓမံက်ထ်ၜးကီု၊ စိုပ်လက်ထက်ဟံသာဝတဳ ရာဇာဓိရာဇ်ဗ္တိုက်သီဂွံလဝ် ဍုၚ်ခၟိုၚ်ဏံ နွံၜါဍုၚ်၊ တ္ကံခၟိုၚ်ဏံ လ္ပာ်သၠုၚ်ကျာတေံတှေ် ဍုၚ်ခၟိုၚ်၊ လ္ပာ်သၟဝ်ကျာဏံတှေ် ဍုၚ်ကြေဝ်နွံမံၚ်” သာ်ဝွံ ကျာ်ဇၞော်အ္စာဇေယျဝံသ ဟီုလဴကဵု သၞံၚ်တိုၚ်ရ။

စပ်ကဵုဝၚ်ဍုၚ်ခၟိုၚ်တြေံၜါဍုၚ်ဂှ်တုဲ ပြဟ်ဟ်ဏံ သွက်ဝၚ်ဍုၚ်ကြေဝ်ဂှ် စပ်ကဵုဒၞဲါကီု၊ ကပေါတ်ဆက်စပ်တံကီု ဗၞတ် ထေက်ကြိုက် ထ်ၜးသက်သဳဗွဲမဗိုန်ခိုၚ်မာန်ကီုလေဝ် စပ်ကဵုဍုၚ်ခၟိုၚ်ဂှ် စဵုကဵုလၟုဟ် ဂၠိုက်ဂၠာဲသက်သဳဂမၠိုၚ် ဂွံဟွံချိုတ် ပၠိုတ်ဏီတုဲ ပေဲါဗှ်လိက်စံၚ်သာ်ဏံဂှ် ဒးဆက်ကၠောန်အာမံၚ်ဏီရောၚ် ညးဆက်ဟီုရ။

ပ္ဍဲတ္ၚဲသဘၚ်ဗှ်လိက်စံၚ်ဂှ်ဝွံ ကပေါတ်တြေံတြဟ်မပ္တံကဵုကျာ်ခေါ်၊ ကဝေက်နုက်၊ ထၟာဲ၊ ဇရဳ၊ ဍိုတ်သ္ကုတ် မက္လိဂွံနၚ်နူ ကဵုကွာန်ဒဵုကြေဝ်ဗွဲမဂၠိုၚ်ဂၠၚ် ထ်ၜးပျးလဝ်ကီုရ။

လိက်စံၚ်ဗှ်ပ္တိုန်ထ်ၜးလဝ်တံဂှ် သွက်ဂွံတက်ပ္တိတ်ဗီုပြၚ်လိက်အုပ်နွံတုဲ ပြဟ်ဟ်ဏံ နကဵုဂကောံခမဳသၚ် ဒေသတ္ကံခၟိုၚ် လ္ၚဵုတအ် ဒက်ပ္တန်လဝ်ဂကောံမၞုံယၟု ဂကောံဂၠိုက်ဂၠာဲဝၚ်ဍုၚ်ခၟိုၚ် (ယာယဳ) မွဲရ။

စပ်ကဵုဝၚ်ဍုၚ်ခၟိုၚ်တြေံၜါဍုၚ်ဂှ်တုဲ အ္စာဝၚ်သုတေသနမန် နာဲသာန်ဝေန်၊ နာဲမိုၚ်တဝ် ကေုာံ အ္စာသဝ်နဲသဵုတံ ကေၚ် အာစိုပ်လ္ၚတ်ဂၠိုက်ဂၠာဲလဝ်နွံရ။

“ပြဟ်ဟ်ဏံ ပ္ဍဲကဵုဒဵုကြေဝ်ဂှ် သွက်ဂွံသိုၚ်ဒၞဲါတိုက်ထ်ၜးပျးကပေါတ်တြေံတြဟ်မာန်ဂှ် နူကဵုအလဵုအသဳတွဵုရး ညးတံ ဇန်ဖျေံကဵုလဝ်ဒၞဲါနွံမံၚ်” သာ်ဝွံ နူဂကောံလိက်ပတ်ယေန်သၞာၚ်မန် တ္ကံခၟိုၚ် နာဲမိုၚ်လေဝ် ရဲကွာန်ဒဵုကြေဝ် ဟီုကဵု သၞံၚ်တိုၚ်ရ။

ပ္ဍဲဒေသတ္ကံခၟိုၚ် (ပွိုၚ်ဍုၚ်ၜါသွာၚ်) ဂှ် လၟိဟ်ကွာန် (၆၄) ကွာန်ကဵု ဗွိုၚ်ဂကောံကွာန်နွံဒၟံၚ် (၅၄) ကွာန်တုဲ အပ္ဍဲဂှ်မ္ဂး ကွာန်မန်သှေ်မံၚ်အကြာ (၂၀) ရဒှ်ရောၚ် ဂွံတီကေတ်ရ။