ဗော်ပရေၚ်ဍုၚ်ကွာန်မန်တအ်ကီု၊ ဂကောံမှာဇန်မန်တအ်ကီု ဗ္ၜတ်အစွံ (အချိုး) ညးကဵုညး ပါလုပ်တုဲ ခြာဟွံလအ် ကောံဓရီုကောန်ဂကူမန်မွဲ ညံၚ်ဂွံကၠောန်သ္ပမာန်ဂှ် ဗော်ဍုၚ်မန်တၟိ စဳဇန်မံၚ်ဖိုဟ် ဂွံတီကေတ်ရ။
သွက်ဂွံကၠောန်သ္ပ သ္ဘၚ်သဳကၠဳ ပေန်လုၚ် အလဵုအသဳတၟိဏအ် ဂစာန်မံၚ်ဖိုဟ်တုဲ အခေါၚ်အဝဵု ကောန်ဂကူမန်ပိုဲလေဝ် ညံၚ်ဂွံပ္တိုန်ထ္ၜးမာန် အပ္ဍဲသ္ဘၚ်သဳကၠဳဂှ်ကီု ရန်တုဲ နူဗော်ဍုၚ်မန်တၟိ စဳဇန်ဒၟံၚ် သွက်ဂွံကၠောန် ကောံဓရီုကောန်ဂကူမန် မွဲဖိုဟ် နာဲဝေန်လှ ညးတာလျိုၚ် သွာၚ်အပ္ဍဲဍုၚ် ဟီုလဴကဵု ဌာန်ပရိုၚ်ဗၠးၜးမန်ရ။
“ကၠာကၠာတေံ နကဵုဂကောံ MAU ရ ဖန်ဇန်ကၠောန်ဗဒှ်ကၠုၚ်တုဲ လၟုဟ်မ္ဂး ဗော်ဍုၚ်မန်တၟိ ကေတ်တာလျိုၚ် ကၠောန်အာဏောၚ်။ ဗီုကၠာတေံ သ္ပအဓိကကဵု ဂကောံ MAU တုဲ ကၠောန်ကၠုၚ်ဂှ် လၟုဟ်ဗီုဂှ်ဟွံသေၚ်ရ။ ဗော်ဍုၚ်မန်တၟိ သ္ပအဓိကတုဲ သ္ကိုပ်သ္ကအာဏောၚ်” နာဲဝေန်လှ ဂးရ။
ဗော်ဍုၚ်မန်တၟိကဵု ဗော်ကောန်ဂကူမန် အဃောဓရီုမံၚ် ပ္ဍဲဂျောန် ၆ ( Facebook ဗော်ကောန်ဂကူမန်)
လက်ထက် ဂကောံပံၚ်ကောံ ပရေၚ်ဂကူမန် MAU သ္ကိုပ်သ္ကကၠောန်ကၠုၚ်မံၚ်တေံဂှ် စွံအဓိကကဵု မန်ပန်သွာၚ် မတွံဂး ဗော်ဍုၚ်မန်တၟိ၊ ဂကောံပရေၚ်ဍုၚ်ကွာန်မန်အပ္ဍဲဍုၚ်၊ မန်တန်တဴပ္ဍဲပယျဵုကဵုဍုၚ်သေံ၊ မန်မစိုပ်မံၚ်ဌာန်သ္ၚောဲ တအ်တုဲ ကၠောန်ကၠုၚ်ဒၟံၚ် ကောံဓရီုဇၞော်ကောန်ဂကူမန်ရ။ လၟုဟ်မ္ဂး ဗော်ဍုၚ်မန်တၟိ၊ ဒြဟတ်ပရေၚ်ဍုၚ်ကွာန်မန်၊ ဗွိုၚ်ဗော်မၞိဟ်မန် သာ်ဝွံ ပါ်လဝ်ပိသွာၚ်တုဲ သွက်ဂွံကၠောန်ကောံဓရီု ကောန်ဂကူမန် ဂှ် ဖန်ဒၟံၚ်ဖိုဟ် နာဲဝေန်လှ ဂးရ။
ဖက်ဆောညးအုပ်ကာ ဗော်ဍုၚ်မန်တၟိ နာဲဇဲယ က္ဍိုက်ပ်ဂကောံညးစၞးမွဲဂကောံ ပ္ဍဲဂိတုဂျောန် (၆) ကုဗော်ကောန်ဂကူမန် MNP ကီု၊ ပ္ဍဲဂိတုဂျောန် (၈) ဂှ် ကုဗော်ဒဳမဝ်ကရေဇြဳ အလုံရးမန်ကီု ဆဵုဂဗကၠုၚ်တုဲ သဳကၠဳကၠုၚ် ကိစ္စအခေါၚ်ကောန်ဂကူမန် သွက်ဂွံပ္တိုန်ထ္ၜး ပ္ဍဲသ္ဘၚ်သဳကၠဳ ပေန်လုၚ် ၂၁ ဗွဝ်ကၠံကီုရ ဂွံတီကေတ်။
“ဗော်ဍုၚ်မန်တၟိ က္ဍိုက်ပ်တုဲ ကၠောန်ဂောံဓရီုဏောၚ် ကၠောန်သ္ဘၚ်သဳကၠဳဏောၚ်ဂှ်လေဝ် ဟီုဂးလဝ် ကၠးကၠးမးမး ဟွံမွဲဏီ။ အဓိကဂှ် ဂွံကၠောန်ဗီုဂှ်မာန်ဂှ် ဗီုလဵုဂွံချပ်ကဵု ကောန်ဂကူပိုဲရော၊ ဗီုလဵု ဂွံစန်ပကောံညးသ္ကအ်ရောဂှ် ကၠုၚ်သဳကၠဳကဵုပိုဲ” နာဲလျးတၟး ညးအုပ်ကာနာနာ ဗော်ကောန်ဂကူမန် ဂးရ။
ပ္ဍဲဂိတုမေ ဖါအိုတ်တုဲကၠုၚ်ဏအ် ဂကောံပံၚ်ကောံပရေၚ်ဂကူမန် MAU ၜိုန်ဖန်ဇန်လဝ် သွက်ဂွံကၠောန် ကောံဓရီုကောန်ဂကူမန်ကီုလေဝ် ဗော်ပရေၚ်ဍုၚ်ကွာန်မန်တအ် ဟွံစှေ်စိုတ်မွဲတုဲ ဟဂွံကၠောန်ကၠုၚ်ရ။
“ဗော်ဍုၚ်မန်တၟိ အာဂတပၠတရဴဏောၚ် မန်လၟိဟ်ဗွဲမဂၠိုၚ်တအ်လေဝ် ပါလုပ်ဏောၚ်မ္ဂး ဒှ်ဂုဏ်ဖဵု သွက်ကောန်ဂကူဏောၚ်။ ကၠောန်ဗီုဏအ်ဂှ် ဒုၚ်တၠုၚ်မံၚ်ရ။ ဂကောံ MAU ပိုဲလေဝ် ထေက်ကဵု နဒုၚ်တဲကီုဏောၚ်” နာဲဝဏ္ဏ ဖက်ဆောညးအုပ်ကာ (၂) ဂကောံ MAU ဂးရ။
ဗော်ဍုၚ်မန်တၟိဝွံ ဒုၚ်သဇိုၚ်ကဵု ဗော်ပရေၚ်ဍုၚ်ကွာန်မန်ဂမၠိုၚ်၊ ဂကောံမှာဇန်မန်ဂမၠိုၚ်၊ မန်ဒေသပယျဵု ကဵုမန်ဍုၚ်သေံ၊ မန်မစိုပ်ဌာန်သ္ၚောဲတအ်တုဲ နကဵုဗ္ၜတ်အစွံတုပ်ပ် (ပိအစွံမွဲ-၃း၁) ဂှ် ဆက်ပံက်အာ ဂကောံပံၚ်ကောံပရေၚ်ဂကူမန် MAU (ဟွံသေၚ်သာ်ဂှ်) နကဵုယၟုတၞဟ်ခြာမွဲတုဲ ပ္ဍဲအဆံၚ်က္ဍိုပ်သ္ကိုပ်ဘုံလ္တူဂှ် နူဗော်ပရေၚ်ဍုၚ်ကွာန်တအ် ညံၚ်ဂွံပၠတရဴဂှ် ၜိုန်ဟီုလဝ်ကဵု ဂကောံ MAU ကီုလေဝ် မူရဴပရိုၚ်မွဲလေဝ် ဟွံက္လေၚ်ကၠုၚ်ဏီရ။
အဃောကာလ ပံက်ဂကောံပံၚ်ကောံပရေၚ်ဂကူမန် MAU ပ္ဍဲသၞာံ ၂၀၀၂ တေံဂှ် ပူဂဵုဂမၠိုၚ် နူသွာၚ်အပ္ဍဲဍုၚ် မသ္ပစၞးကဵု ပရေၚ်ဘာသာ၊ ပရေၚ်ဍုၚ်ကွာန်၊ ပရေၚ်ဝေါဟာမၞိဟ်၊ ဂကောံနာနာ သီုကဵုတၠကွတ် တၠပညာ တအ်ကီု၊ ဂကောံမန်ဍုၚ်သေံကီု၊ ဂကောံပရေၚ်ဝေါဟာမၞိဟ်မန် နွံဒေသပယျဵုသေံဗၟာဂှ်ကီု၊ ဗော်ဍုၚ်မန်တၟိကီု၊ သီုကဵု ဂကောံမန်မစိုပ်ဌာန်သ္ၚောဲ OMCC တအ် တၞီလုပ်လၟိဟ်အိုတ်ရ။
ပ္ဍဲသၞာံ ၂၀၁၃ ၊ဂိတုသေပ်တေမ်ဗာဖါအိုတ်ဂှ် ဂကောံ MAU သ္ပက္ဍိုပ်တုဲ ကၠောန်ကၠုၚ် သ္ဘၚ်သဳကၠဳကောန်ဂကူမန် အလန်ပထမ ပ္ဍဲၝောံခန်တွဵုရး ဍုၚ်မတ်မလီု တုဲကၠုၚ်ကီုရ။
