သွက်ဂွံတိုန်ကောံဓရီုကောံရပ်လွဟ် ကောန်ဍုၚ်အရၚ်ဂမၠိုၚ် ကြက်ကၠောန်သ္ပ ပ္ဍဲမာၚ်ဂျာယာန် တွဵုရးကချေၚ်ဂှ် ဘိက်လဝ် သီုဂကောံ မဟာမိတ် ညဳသာသၟဟ်န်ကောန်ဍုၚ်အရၚ် UNA ကဵု ဂကောံဗော်ကောဒေံကေါန်ဍုၚ်အရၚ် NBF ကီုရ သာ်ဝွံ ဥူထောန်ဇြဝ် ဖက်ဆောညးအုပ်ကာ (၁) နူ UNFC ဟီုရ။
ဂိတုဂျူလာၚ် နူ ၂၆ ဒဵုကဵု ၂၉ တေံမ္ဂး ဂကောံရပ်လွဟ်ကောန်ဍုၚ်အရၚ် ထ္ပက်စၟတ်တဲ လိက်ကသုက်တုပ်စိုတ် ပရေၚ်ဒေါံပန်ပှော်အလုံဍုၚ် NCA တုဲကဵု ဂကောံဟဂွံထ္ပက်စၟတ်တဲဏီတံ ကၠောန်ကောံဓရီုမုက်ဇီ ပ္ဍဲမိုၚ်ဂျာယာန် တိဍာ် ဂကောံပရေၚ်ဗၠးၜးကချေၚ် KIO ဂှ်ရောၚ် ဂွံတီကေတ်ရ။
“ကွေံကွေံရ။ ပ္ဍဲကောံဓရီုမုက်ဇဳ ဂကောံပၠန်ဂတးရပ် ကောန်ဍုၚ်အရၚ်ပိုဲကၠောန်ဂှ် ဂကောံဗော်ပရေၚ်ဍုၚ်ကွာန်တံလေဝ် ဂွံတိုန်မာန်ကီုရန်တုဲ ဘိက်လဝ် UNA ကီု သီုကဵု NBF ရ။ ဘိက်လဝ် UNA မသုန်တၠ၊ NBF မသုန်တၠ” ဥူထောန်ဇြဝ် ဂးရ။
ပ္ဍဲဍုၚ်ပိုဲဏံ ဂကောံရပ်လွဟ် ကောန်ဍုၚ်အရၚ် နွံ ၂၁ ဂကောံတုဲ ပၞောဝ်ကဵုဂှ် ဂကောံRCSS/SSA ၊ CNF ၊PNLO ၊ ALP ၊ ABSDF ၊ KNU ၊ DKBA ၊ KNU/KNLA-PC တံဒ္စါံဂကောံဂှ် ဒုၚ်ထ္ပက်စၟတ်တဲ လိက်ကသုက် NCA ပ္ဍဲဂိတုအံၚ်တဝ်ဗာ ၁၅၊ သၞာံ ၂၀၁၅ တေံတုဲ ဂကောံ UWSA/UWSP၊ NDAA ၊ NSCN-K ၊ KIO/KIA ၊ SSPP/SSA ၊ KNPP ၊ NMSP ၊ TNLA ၊ MNDAA ၊ AA ၊ WNO ၊ LDU ၊ ANC တံ(၁၃) ဂကောံဂှ် ဟဂွံထ္ပက်စၟတ်တဲ လိက်ကသုက် NCA ဏီရ။
“ပိုဲဘိက်လဝ် နူUNA ညံၚ်ဂွံတိုန် မသုန်တၠ၊ ပိုဲလေဝ် ကၠောန်ကောံဓရီုတုဲမ္ဂး သွက်ဂွံပ္ညဳအာညးသ္ကအ်နွံ” သာ်ဝွံ ဥူသာၚ်ညောအ်လွေန် ဖက်ဆောညးအုပ်ကာ (၂) နူ ဗော်ဂအုပ် ဒဳမဝ်ကရေဇြဳ ဂကူကောန်ဍုၚ်အရၚ်သေံ SNLD ဂးရ။
သွက်ကၠောန်ကောံဓရီုမုက်ဇဳ ပ္ဍဲမာဂျာယာန်ဂှ် ဂကောံရပ်လွဟ် ထ္ပက်စၟတ်တဲ NCA တုဲကဵု ဂကောံ ဟဂွံထ္ပက်စၟတ်တဲဏီတံ ပ္ဍဲဂိတုဂျူလာၚ် (၈) ဂှ် ဆဵုဂဗသဳကၠဳညးသ္ကံ ပ္ဍဲဇၚ်မာဲ ဍုၚ်သေံတေံတုဲ ဂွံလဝ်တၚ်တုပ်ညးသ္ကံရ။
ကြဴနူဂှ် ပံက်လဝ်ကမ္မတဳ ကၠောန်သ္ပကောံဓရီုမုက်ဇဳတုဲ နဒဒှ်ဥက္ကဌဂှ် ခူဥူရာ နူဗော်ပရေၚ်တောတက်ကရေၚ်ဍာဲ KNPP ၊ ဒဒှ်ဒုဥက္ကဌဂှ် ပဒိုဝ်သဝ်ကွေဝ်ထူဝေန် နူဗော်ကရေၚ် KNU ကေတ်တာလျိုၚ် ဒုဥက္ကဌ (၁) တုဲ သ္ကိုပ်ပၞာန်ဂမ်မဝ် နူဂကောံ ပရေၚ်ဗၠးၜးကချေၚ် KIO/KIA ဂှ် ကေတ်တာလျိုၚ် နဒဒှ် ဒုဥက္ကဌ (၂) ရ။ ညးအုပ်ကာဂှ် သ္ကိုပ်ဗိုလ်ဇၞော်သာၚ်ဠ နူကံၚ်ဇြဳကလေၚ်ပ္တန်ရးသေံ RCSS/SSA ကေတ်တာလျိုၚ်တုဲ ဒဒှ်ဖက်ဆောညးအုပ်ကာ ဂှ် နာဲယှိုဲတိၚ် နူဗော်ဍုၚ်မန်တၟိ NMSP ကေတ်အာတလျိုၚ်ရောၚ် ဂွံတီလဝ်ရ။
