ပ္ဍဲကဵုတွဵုရးမန်ဂှ် ၚုဟ်ထ္ၜိုတ်ခိုဟ်တိုန်ကၠုၚ်တုဲ အပ္ဍဲဂိတုဒဳဇြေမ်ဗာ စၟတ်တ္ၚဲ (၁) ဂှ် ထ္ၜိုတ်အဆံၚ် RSS-3 မွဲပံၚ်တှေ် က္လိဂွံတဴၚုဟ် ဒဵုကဵု ၉၉၀ ဒကေဝ်ရောၚ် ဂွံတီကေတ်ရ။
“တ္ၚဲဏံ ၚုဟ်ထ္ၜိုတ် စိုပ်မံၚ်ဒဵုကဵု ၉၉၅ ဒကေဝ်၊ ရာန်မံၚ်လၟုဟ်ဂှ် ရံၚ်စရာဲဍာ်သ္ကေဝ်ထ္ၜိုတ်တုဲတှေ် ကုတ်ကဵုၚုဟ်ရ၊ ကၠောန်လဝ်ထ္ၜိုတ်ခိုဟ်တှေ် ဗီုခိုဟ်ဂှ် ဂွံၚုဟ်ခိုဟ်ဏောၚ်၊ လ္ၚဵုဂှ် ကှ်ဟွံခိုဟ်မ္ဂး ဒှ်ဂကူ RSS-3 ကၠာလေဝ် ဂွံၜိုတ် ၈၀၀ ဒကေဝ်ဓဝ်ရ၊ ထ္ၜိုတ်တၞးတီုဂှ် ၚုဟ်နွံ အကြာ(၇၀၀-၇၇၀)၊ တၞးကြဳမ္ဂး ဂွံၚုဟ် အကြာ (၈၀၀) ဒကေဝ် ကဵု (၉၀၀) ဒကေဝ်” သာ်ဝွံ (ဦးသူရ) မာန်နေဂျာ ရုၚ်စက်ရာန်ထ္ၜိုတ်ဖူယှေန် ပွိုၚ်ဍုၚ်မုဟ်ဍုၚ် ဟီုလဴလဝ် ပ္ဍဲဒဳဇြေမ်ဗါ (၁၀) ဂှ်ရ။
“ဍုၚ်ကြုက်တေံ ဟိုတ်နူသမၠုၚ်ပ္တိုန်မံၚ် ပရေၚ်ပိုန်ဒြပ်ဗွဝ်ဖျာဂှ်ရ ၚုဟ်ထ္ၜိုတ်ပိုဲဂှ် ဍေံဗ္ဒါဲမံၚ်ပ္ဍဲဗွဝ်ဖျာကြုက်ရ၊ ဒၟါနူဂှ်ရ လ္ပာ်ကြုက်တေံၚုဟ်သၠုၚ်တိုန်တှေ် ၚုဟ်အဏံလေဝ်သၠုၚ်တိုန်ကီုရ” သာ်ဝွံ နာဲကျာန်ယျေတ် ဥက္ကဌ ဂကောံတဵုကၠောန်ထ္ၜိုတ် တွဵုရးမန် ဟီုရ။
အဃောကၠောန်လဝ်ပေါဲသဳကၠဳမွဲ ပ္ဍဲဍုၚ်ထဝါဲတေံဂှ် အတိုၚ်လဟီုတၠကမၠောန်ပရေၚ်ပိုန်ဒြပ် နူသၚ်ကပေါဝ်ဂှ်မ္ဂး ၚုဟ်ထ္ၜိုတ်ဂှ် ဒဵုစိုပ်သၞာံ (၂၀၂၀) တေံ ဆက်သၠုၚ်တိုန်အာရောၚ် တော်လဝ်သာ်ဂှ်တုဲ သၞာံ ၂၀၁၇ ဏံမ္ဂး ထ္ၜိုတ် မွဲပံၚ်တှေ် ၚုဟ်သၠုၚ်တိုန်မာန် ဒဵုကဵု (၂၀၀၀) ဒကေဝ်ရောၚ် နာဲကျာန်ယျေတ် ဂးရ။
“တီုတီု ကဵု ကြဳကြဳ ၚုဟ်ခြာ ၜိုတ် (၈၀) ဓဝ်ရမ္ဂး စဲသကှ်တုဲသွံလေဝ် ၚုဟ် ဟွံတၟေၚ်နူ တီုတီုရ၊ ၚုဟ်ယဝ်ခြာအာ ဒဵုကဵု (၁၃၀) ဒကေဝ်မ္ဂး ကၠောန်ပ္တိတ်တၞးကြဳကြဳတှေ် ခိုဟ်ဂၠိုၚ်” သာ်ဝွံ နာဲဝဏ္ဏထဝ် တၠကၠအ်ထ္ၜိုတ် ရဲကွာန်ဝၚ်ရာဲ ပွိုၚ်ဍုၚ်ဇြပ်ဗု ဟီုရ။
မွဲဂၠးတိဏံ ဍုၚ်သေံဂှ် ဒှ်ဍုၚ်ထ္ၜိုတ်တိတ်ဂၠိုၚ်အိုတ်တုဲ ၚုဟ်ထ္ၜိုတ်ဂၠးတိ ဟိုတ်နူသဝ်စှေ်ဆက်က်ဂှ်ရ အလဵုအသဳသေံ ကဵုထဗိုၚ်ထောံ တၞံထ္ၜိုတ်တုဲ စၞးဂှ် ကဵုတဵုကၠုၚ် တၞံဒှ်ဒြပ် တၞဟ်ဟ်တံရ၊ဒှ်သာ်ဂှ်ရ ထ္ၜိုတ်ဍုၚ်သေံ တိတ်အောန်စှေ်အာတုဲ ဒြဟတ်ရာန် (မၞိဟ်ရာန်) ပ္ဍဲဂၠးတိ ဟိုတ်နူဂၠိုၚ်တိုန်ကီု၊ ၚုဟ်မးလှုဲဗၟာ ဟိုတ်နူသဝ်စှေ်အာကီု၊ ဟိုတ်နူဂစာန်သမၠုၚ်ပ္တိုန်မံၚ် ဗွဝ်ဖျာဂၠးတိကီုဂှ်ရ ၚုဟ်ထ္ၜိုတ်ကလေၚ်သၠုၚ်တိုန်ကၠုၚ် ညးဒုၚ်တိုၚ်ရာန်ထ္ၜိုတ်တံ သ္ၚဳဂၠိပ်ညာတ်ကေတ်သာ်ဂှ်ရ။