ပ္ဍဲစရၚ်အံၚ် တန်လုပ်တက္ကသိုလ် သၞာံ ၂၀၁၆-၂၀၁၇ တိတ်ကၠုၚ်တ္ၚဲဏံဂှ် ကွးဘာ နူဘာကောန်ဂကူမန် လုပ်သှ်လဝ်ဂှ် ဂွံအံၚ်ကေတ် ၂၃% သာ်ဝွံ ဂွံတီကေတ် နူဌာနပရေၚ်ပညာ ကောန်ဂကူမန်ရ။
ပၞောဝ်ကွးဘာဂမၠိုၚ် လုပ်သှ်လဝ်နူဘာကောန်ဂကူမန်ဂှ် နူဘာတန်သၠုၚ်ညဳသာ လုပ်သှ် ၃၉ တၠ၊ အံၚ် ၉ တၠ၊ နူဘာတန်သၠုၚ် အၚ်ဒၚ် ၂၃ တၠ၊ အံၚ် ၅ တၠ၊ နူဘာတန်သၠုၚ်ဝၚ်ခပဝ် ၁၆ တၠ အံၚ် ၄ တၠ၊ အပံၚ်ဖအိုတ် လုပ်သှ် ရ၈ တၠ၊ အံၚ်အာ ၁၈ တၠရ။
စရၚ်အံၚ်ကွးဘာ ဘာကောန်ကောန်ဂကူမန် (MNEC)
ပ္ဍဲသၞာံဗ္တောန်ပညာ ၂၀၁၅/၂၀၁၆ နူဘာကောန်ဂကူ အံၚ်ကၠုၚ် ၜိုတ် ၁၁% ပြၚ်ၚ်ဟေၚ်တုဲ သၞာံပညာ ၂၀၁၆/၂၀၁၇ ဏံ အံၚ်ကၠုၚ် ၂၃% တှေ် အံၚ်ခိုဟ်နူသၞာံအာဏံတၟာဂလိုၚ် အ္စာရတ်ဂကူ ဟီုရ။
“ပ္ဍဲဘာအ္စာတံဏံ ကွးဘာတြုံတြုံဏောၚ် အံၚ်ဂၠိုၚ်” သာ်ဝွံ နာဲတာန်ထောန်လေဝ် ဂအုပ်ဘာအၚ်ဒၚ် ဘာပရေၚ်ပညာကောန်ဂကူမန် ဟီုရ။
ပ္ဍဲသၞာံဗ္တောန်ပညာ ၂၀၁၅-၂၀၁၆ တေံ နူဘာတန်သၠုၚ် ကောန်ဂကူမန် သၟဝ်ဌာနပရေၚ်ပညာ ကောန်ဂကူမန် လုပ်သှ်လဝ် တန်လုပ်တက္ကသိုလ်အလဵုအသဳ နွံ ၉၃ တၠတုဲ အံၚ်ကၠုၚ် ၁၁ ဂှ် နူဘာတန်သၠုၚ်ညဳသာ လုပ်သှ် ၃၆ တၠ၊ အံၚ် ၄ တၠ၊ နူဘာတန်သၠုၚ်ကောန်ဂကူမန် အၚ်ဒၚ် လုပ်သှ် ၄၀ တၠ၊ အံၚ် ၅ တၠ။ နူဘာတန်သၠုၚ် ကောန်ဂကူမန် ဝၚ်ခပဝ် လုပ်သှ် ၁၇ တၠ အံၚ် ၂ တၠတုဲ တော်တၟံကၠံမ္ဂး အံၚ် ၁၁ ဒဿမ ၈၃ တၟံကၠံရောၚ် ဂွံတီကေတ်ရ။
ဗော်ဍုၚ်မန်တၟိ ကေုာံအလဵုအသဳ တံ က္လိဂွံတၚ်တုပ်စိုတ်ပရေၚ်ဒိုအ်ပန်ပှော် ပ္ဍဲသၞာံ ၁၉၉၅ တေံတုဲဂှ် ကွးဘာဂမၠိုၚ် နူဘာကောန်ဂကူမန် ဂွံအခေါၚ် လုပ်သှ် တန်လုပ်တက္ကသိုလ် ပ္ဍဲအလဵုအသဳတုဲ ဒဵုလၟုဟ်မ္ဂး ကွးဘာအံၚ်လဝ် တန်လုပ်တက္ကသိုလ် ဗၞတ် ၄၀၀ ပြၚ်ကီု ဂွံတီကေတ်ရ။
