နူကနေံတေံ ဂိတုဂျူလာၚ် ၁၂ ဂှ် ကမ္မတဳက္ဍိုက်ပ်ဂကောံရေၚ်တၠုၚ်တအ်ကဵု ဂကောံသၟာပရေၚ်ဍုၚ်ကွာန်မန် ကေုာံ သၚ်သၟတ်မန်တအ် ဆဵုဂဗသ္ပကောံဓရီုတုဲ ဟွံလအ်မ္ဂး သွက်ဂွံဒက်အာဇြဟတ်ဇၞော်ဇၞော်မွဲနွံရောၚ် ဂွံတီကေတ်ရ။
ဂကောံသၟာပရေၚ်ဍုၚ်ကွာန်၊ ကမ္မတဳက္ဍိုက်ပ်ဂကောံရေၚ်တၠုၚ်တအ်ကဵု သၚ်သၟတ်တအ် ပိသွာၚ်ဝွံ သ္ပကောံဓရီု ပ္ဍဲ ကဵုဘာမေတ္တာအံၚ်ဇၞး ကွာန်အၜဝ် ပွိုၚ်ဍုၚ်မုဟ်ဍုၚ်ဂှ်တုဲ ချပ်ဇန်လဝ်သွက်ဂွံဒက်ဇြဟတ် (ဂကောံ) ဇၞော်ဇၞော်မွဲနွံရ။
ကမ္မတဳက္ဍိုက်ပ်ဂကောံရေၚ်တၠုၚ်၊ ဂကောံသၟာပရေၚ်ဍုၚ်ကွာန်မန် ကေုာံ သၚ်သၟတ်မန်တံ ဆဵုဂဗသ္ပကောံဓရီုဒၟံၚ်
‘ကြဴနူကဵု ဂကောံပိုဲတအ် တီကေတ်အာ ဒဒှ်ရ ဗော်မန်ၜါဗော်ဂှ် ဟွံဒှ်ပံၚ်တွဵုရဒှ်သာ်တုဲ လၟုဟ်ဂကောံ ပိုဲစှေ်ချဳဓရာၚ် မံၚ်ဂှ် ဗက်ကေတ်ဆန္ဒအကြာမိမညးဍုၚ်ကွာန်မန်တအ် ပိုဲလဴသောၚ်ကလးတုဲ၊ ညးကဆံၚ် ရပ်သၞေဝ်ပ္ဍဲဗော်၊ ညးအာက္ဍိုပ်ပ္ဍဲဗော်တအ် ညးတအ်ကဵုညးတအ် ဟွံဒှ်ပံၚ်ရပုဟ်၊ ပိုဲကဵုပိုဲ နူကဆံၚ်သၟဝ်ဏံကီု၊ ပံၚ်ကဵုခမဳသၚ် မိမညးဍုၚ်ကွာန်တအ်တုဲ ဗီုလဵုဂွံဖံက်တိတ်အာ ဂၠံၚ်တၟိမွဲဂှ် ပိုဲစစှေ်ချဳဓရာၚ်မံၚ်ယျရောၚ်’ သာ်ဏံ အ္စာသဝ် ဒံက်တာ စောန်တၟး (ကၠတ်ထဝ်တွဵုရးဍုၚ်မန်) ဂှ်ဟီုကလးပ္ဍဲကောံဓရီုဂှ်ရ။
ပ္ဍဲကောံဓရီုဂှ် ဂကောံရေၚ်တၠုၚ်ပံက်လဝ် သၟဝ်တဲ ဂကောံပညဳပညပ် မွဲပွိုၚ်ဍုၚ် (၅)တၠဂှ်ကီု၊ ဂကောံ သၚ်သၟတ်တအ်ကီု၊ ဂကောံသၟာပရေၚ်ဍုၚ်ကွာန်ချဳဓရာၚ်ဒၟံၚ်လၟုဟ်တအ်ကီု ပ္ဍဲကောံဓရီုသမၠဲလၟေၚ် (၄) တေံ သဳကၠဳပ္တိုန်ထ္ၜးတုဲ ညးစၞးဂမၠိုၚ်စှေ်စိုတ်မ္ဂး သွက်ဂွံပံက်အာဂကောံ ဗီုပြၚ် ဂကောံပရေၚ်ဍုၚ်ကွာန်မန် ဇၞော်ဇၞော်မွဲဂကောံရောၚ် ပ္ဍဲကောံဓရီုဂှ် သဳကၠဳဖျေံလဝ်အပြောံနွံရောၚ် ဂွံတီကေတ်ရ။
ဂကောံဇြဟတ်ပရေၚ်ဍုၚ်ကွာန်ဂှ် မံက်ဒှ်ကၠုၚ်တုဲမ္ဂး ချဳဓရာၚ်စှေ်အာပေဲါသောၚ်ကလး လ္တူအကာဲအရာ ဗော်မန်တအ်ဂှ်ကီု၊ စပ်ကဵုပရေၚ်ဍုၚ်ကွာန်မန် အဌာန်ဂတ သာ်လဵုဂွံအာကီု၊ ကေတ်အာဆန္ဒ လညာတ် အကြာ ခမဳသၚ်၊ ညးဍုၚ်ကွာန်ပ္ဍဲပွိုၚ်ဍုၚ်ဂမၠိုၚ်တအ်ဂှ်တုဲ အဃောချပ်ဇန်မံၚ် ဗီုဏံဂှ် ဗော်မန်တအ်ညး တအ်ကဵု ကဵုညးတအ် ဒှ်ပံၚ်အာမ္ဂး ဒှ်လက်သန်ခိုဟ်မွဲတုဲ၊ ယဝ်ညးတအ်ဟွံဒှ်ပံၚ်အာတှေ်လေဝ် ဆက်ကွာ် အာ အတိုၚ်ဆန္ဒခမဳသၚ် ညးဍုၚ်ကွာန်တအ် ဂှ်ရောၚ် ညးတာလျိုၚ်တအ် ဟီုဂးသဳကၠဳဏာရ။
‘ဂကောံပိုဲချပ်မံၚ်လၟုဟ်ဏံ ဒှ်ဇြဟတ်တုဲ ချဳဓရာၚ်အာယျဟီုဍေံရ၊ ချဳကေတ်အခိၚ်ဒဵုအခိၚ်လဵု ဒးဟီုအရေဝ်ယျ ဏောၚ်၊ ဒဵုကဵုလအ်ကွေံကွေံဂှ် ပိုဲကဵုအခိၚ်ဟွံဂွိုအ်ရပုဟ်၊ ဒးနွံကဵု ဗ္ၜတ်မွဲမွဲရောၚ်’ သာ်ဏံ နာဲမန်ရာဇာ ဟီုရ။
ကောံဓရီုဆဵုဂဗတ္ၚဲဏံဂှ် ဒုဥက္ကဌကၠတ်ထဝ်မန် ဒံက်တာ အံၚ်နာၚ်ဥု၊ ကၠတ်ထဝ်မန် အစာသဝ် စောန်တၟး၊ ကမ္မတဳကေၚ်ကာဗော်ဍုၚ်မန်တၟိတြေံ နာဲတၠညး၊ နာဲမန်ရာဇာ၊ နာဲအံက်သာ၊ နာဲဝေ ကေုာံ ဂကောံ သၟာပရေၚ်ဍုၚ်ကွာန်ဂမၠိုၚ် ၊ သၚ်သၟတ်ဂမၠိုၚ်ကီု၊ ကမ္မတဳက္ဍိုက်ပ်ဂကောံရေၚ်တၠုၚ်တအ်ဂမၠိုၚ်ကီု သၚ်ခရှ် ဗၞတ် (၃၀)ဇကု-တၠပြၚ် က္ည-တိုန်စိုပ်ရ။
0 Comments