ပုံအဂီုညံၚ်ၚ် ဝၚ်ဗွဲခမၞောန်
ပ္ဍဲဝၚ်မန်တမၠာတေံ ဥပရာဇာ နူနန်ဝါခရူ တိတ်ဝေၚ်ဒၟံၚ်ဂြိုပ်လၟိုန်တုဲ ဒဵုဂှ် နကဵုဘာသာမန် ကော်ခဴ “ဒဵုသၟိၚ်ဗၠာဲ” တုဲ ဗွဲဘာသာဗၟာ ပ္တိတ်ရမျှာၚ်တိုက်ရိုက် ဒှ်အာ “မိန်ဗလာတောၚ်” ရ။ ဆဂှ်သၟးဟွံသေၚ် လဟီုရာဇဝၚ်ပါၚ်လေဝ် နွံကၠုၚ်နာနာသာ်၊ ဝၚ်ဒမၠုမတ်ညံၚ်ၚ် ပုံအဂီုညံၚ်ၚ် နွံကၠုၚ်ကီုတုဲ ဗယိ (ဗဴဇု) ဒဵုသၟိၚ်ဗၠာဲဟီုမ္ဂး ဣဒ္ဓိဇၞော် ပြာကတ်ဒၟံၚ် ပ္ဍဲဒေါၚ်ကၞာတံဖိုဟ်ရ။
အဃောပၞာန်ဂၠးတိ အလန်ဒုတိယ ၁၉၄၂-၄၅ တေံ ကၠောန်ကၠုၚ်လဝ် ဂၠံၚ်ကွဳပၟတ် သေံ-ဗၟာဂှ် ပ္ဍဲဂၠးတိ ပြာကတ်ကၠုၚ် နဒဒှ် ဒဒန်ကလုတ်သၟိၚ်ဂစိုတ် Death Railway တုဲ ဂၠံၚ်ကွဳပၟတ်လ္ပာ်ဍုၚ်ဗၟာဏံ ဟိုတ်နူစကၠောန်လဝ် နူဇြပ်ဗုဂှ်ရ နကဵုပရေၚ်မဟာဗျူဟာမ္ဂး ဒဵုသၟိၚ်ဗၠာဲဂှ် ဒှ်ဌာန်ဒ္တန်ဗ္ဒိုပ်ပၞာန်ဇၞော် သွက်ဂျပါန်တံကီုရ။
အပ္ဍဲပေါဲပၞာန်ဂှ် ဂျပါန်တံ ဂွံလဝ်ဂၠုဲပၞာန် နူဒပ်မဟာမိတ်တံဂှ် ရပ်စကာ ကဵုဖံက်ဂၠံၚ်ကွဳပၟတ် လ္ပာ်ဍုၚ်ဗၟာဏံ ပၞာန်အၚ်္ဂလိက် ၁၇၂၈ တၠ၊ အဝ်သတေလျ ၁၁၆၃ တၠ၊ ဒါတ်ချ် ၆၂၁ တၠ ပံၚ်ဖအိုတ်မ္ဂး လၟိဟ်ကောန်ပၞာန် ၃၅၁၂ တၠ ဒးချိုတ်အာ ပ္ဍဲအရာကၠောန်ဂၠံၚ်ဂှ်တုဲ အခါရပေါဲပၞာန်ဟဲအာဂှ် က္လေၚ်ဂွးဇုတ်တံ ကၠောန်ပ္တန်လဝ်သုသာန်ပၞာန် ပ္ဍဲဇြပ်ဗုရ။
ကောန်ကမၠောန်အဓမ္မ ဍုၚ်ဗၟာဏံလေဝ် သွက်ဂွံကၠောန်ဂၠံၚ်ကွဳပၟတ် ဇြပ်ဗု-ကျာ်ပိဂှ် နူဗ္ဒိုပ်ပၞာန် ဒဵုသၟိၚ်ဗၠာဲဏံရ ဒးကၠောန်အာဂၠံၚ် အဆံၚ် အဆံၚ် ဒဵုကဵုကျာ်ပိတေံတုဲ မၞိဟ်တံ ဒးချိုတ်အာ နူ ၃ ဠက် ဒဵုကဵု ၈ ဠက် နွံဏောၚ် ဂွံဆဵုကေတ် ပ္ဍဲလိက်သမ္တီဝၚ်တံကီုရ။
ညးဆဵုညာတ်ကၠုၚ်မွဲတၠ
အခိၚ်ဂျပါန်တံ ဖျေံဒၟံၚ်သဇိုၚ်ပ္ဍဲဒဵုသၟိၚ်ဗၠာဲဂှ် နာဲယှာ ဒှ်ဒၟံၚ်ဘဝကောန်ၚာ် အယုက်ၜိုတ် ၁၂ သၞာံ ကေုာံသ္ကံရဲ ၄ တၠ မၚ်ဒၟံၚ်ဂၠဴ ပ္ဍဲဇရေၚ်ဒဵုသၟိၚ်ဗၠာဲရ၊ လၟုဟ်မ္ဂး နာဲယှာ သ္ပဒတဴဒၟံၚ် ပ္ဍဲကွာန်ဝါကဝါဲဖိုဟ်ရ။
“ကေါန်ပၞာန်ဂျပါန် ၃ တၠတှေ် ကွဳဓရိုဟ်မွဲမ အပ္ဍဲဂှ် ဖ္ဍိုက်လဝ် ကဠာတံ၊ကဠာ စေဝ် မကမ်တံ၊ မကမ်ဒုတ်တ် တၟာတၟာဒဳ နွံသီုသၠကရောဲကျာ (ပါန်ကာ) ဍေံဂှ် သီုဗ္တံ သီုတ္ၚဲ ဇက်ပ္တိုန်ဏာ ပ္ဍဲလ္တူဒဵုဂှ် ဂွံဆဵုမံၚ်၊ လ္တူတေံ ကောန်ပၞာန်ဂျပါန်သၟးရနွံ ညးဂှ်လေဝ် အခေါၚ်တိုန်ဟွံမွဲပုဟ်၊ ဍေံတံပၞုက်စွံ ဒၞါဲလဵုရောဂှ်လေဝ် တီဟွံမာန်ပုဟ်” နာဲယှာ ဂးရ။
မၞိဟ်ဇၞော် (မာသတာ) ဂျပါန်မွဲတၠ ဍုက်ကေဝ်တီညာတ်ဒၟံၚ်နာဲယှာဂှ် ဟီုလဴစ ဒဒှ်ရ ကျအာပၞာန်ဣရတုဲ ဍေံတံ စံၚ်ထောံ လွဟ်လက်နက်လ္ၚဵုလ္ၚဵုကဵု ကပေါတ်ကြိယာ လ္ၚဵုလ္ၚဵုဂှ်လေဝ် ဂွံတီကေတ်ကီုရ သာ်ဝွံ အခါဆဵုဂဗ သၟာန်သွဟ် ဗွဲတၞဟ်ခြာဂှ် နာဲယှာ ဟီုလဝ်ကဵုဌာန်ပရိုၚ်မန်ရ။
ဂၠံၚ်ကျာ်ပိဂှ် ဒှ်ဂၠံၚ်အဓိက သွက်ဒပ်ဂျပါန်တံ ဂွံဇက်လုပ်ဍုၚ်ဗၟာဏံတုဲ အခါဂျပါန်တံကျပၞာန်ဂှ်လေဝ် ဒှ်ဂၠံၚ်ဆုတ်ပၞာန်ပၠန်ရ၊ ဒၟါနူဂှ်ရ ကပေါတ် ဂြပ်ရတ်ထဝ်သြန်၊ လွဟ် မကမ်နာနာ သီုကဵုဗမ်တံ ပၞုက်ဂိုၚ်ဒေပ်လဝ် ပ္ဍဲထီုဒဵုသၟိၚ်ဗၠာဲဏံဏောၚ် ဟီုစဂွံကီုလေဝ် အခိၚ်ဂျပါန်ကျပၞာန် စဴအာဂှ် ဂၠံက်ကေတ်ဏာ ကပေါတ်တံဏံကီုဟာ (ဟွံသေၚ်သာ်ဂှ်) သှေ်ဒၟံၚ်အဏံဖိုဟ်ဟာဂှ် ဒှ်ဒၟံၚ်ပဟေဠိ မွဲရ။
ဆ္ဂး မၞိဟ်ဇၞော်ဇၞော် ဂတာပ်ကၠုၚ် ဂတကြဴ ကေၚ်စုက်လုက်ကၠုၚ်ကဵုဒဵုသၟိၚ်ဗၠာဲ ခေတ်ဂျပါန်တေံတံဟီု-ဍေံတံတိုပ်ဒေပ်ကပေါတ်တုဲ မ္ၚးဗွိုၚ်ကပေါတ်ဂှ် ပါမ်စွံလဝ်ဗမ် အဆံၚ်အဆံၚ်ကီုဟာဟွံတီ သာ်ဏံလေဝ် ဟီုဂးကၠုၚ်နွံဒၟံၚ်ကီုရ။
ဟွံဂွံအခေါၚ်မွဲသာ် ၜံက်ခါဲမံၚ်ဖိုဟ်
ကမၠောန်ၜံက်ခါဲ ကပေါတ်ပၞာန်ဂျပါန် ခေတ်ပၞာန်ဂၠးတိအလန်ဒုတိယ သှေ်ဒၟံၚ်ပ္ဍဲဒဵုသၟိၚ်ဗၠာဲဂှ် အလဵုအသဳ တွဵုရးမန် သ္ဂောံကဵုအခေါၚ်ကၠောန် ဗွဲမလုပ်သၞောဝ်ဂှ် အခေါၚ်ဟွံမွဲ- သာ်ဝွံ ဂိတုဖေဖဝ်ဝါရဳတုဲကၠုၚ်ဏံ အ္စာသဝ်ဟံၚ်ဍုၚ် ဝန်ဇၞော် ထိၚ်ဒဝ်သဘာဝ ကေုာံသယံဇာတ ဟီုကဵုဌာန်ပရိုၚ်မန်ရ။
“ကိစ္စဏံ အလဵုအသဳတွဵုရးမန်ပိုဲ အခေါၚ်ကဵုသ္ဂုတ်သွာတ်ဟွံမွဲပုဟ်၊ ဍေံတံပ္တိုန်ဂွံလိက် ၂ ဝါတုဲဣရ လက်ထက်သ္ကိုပ်ဝန်ဇၞော်တြေံ ဥူမေန်န်ဥူဂှ် မွဲဝါ၊ လက်ထက် သ္ကိုပ်ဝန်ဇၞော်လၟုဟ်ဏံဂှ် ထပ်ပ္တိုန်မွဲဝါပၠန်၊ ကိစ္စဏံ ဒးပ္တိုန်ကဵုကၟိန်ဍုၚ်တေံ တိုက်ရိုက်ဏောၚ်၊ ပ္တိုန်တုဲ နူအလဵုအသဳ ကၟိန်ဍုၚ်တေံ သၟာန်ကၠုၚ်လညာတ် အလဵုအသဳတွဵုရးမန်ဏံမှ နူပိုဲကဵုလညာတ်ဂွံဏောၚ်” အ္စာသဝ်ဟံၚ်ဍုၚ်ဟီု။
ဒှ်သာ်ဂှ်ရ သီုဟွံဂွံအခေါၚ်ဏီ ၜံက်ခါဲကၠုၚ် ဒဵုသၟိၚ်ဗၠာဲ အလန်ပထမ ပ္ဍဲဂိတုဖေဖဝ်ဝါရဳတုဲကၠုၚ်ဏံဂှ် အလဵုအသဳတွဵုရးမန် ဗဒိုအ်ထောံ ကမ္ပဏဳ Golden Geo Myanmar Co.,LTD လ္ဂုၚ်ဂှ်ကီုလေဝ် ဟွံကေတ်အရေဝ် ဟွံသ္ပဒုဟ်မွဲသာ်ရ။
ကပေါတ်ပၞာန်ဂျပါန်တံ ဂိုၚ်တိုပ်လဝ် ပ္ဍဲကာလပၞာန်ဂၠးတိ အလန်ဒုတိယတေံဂှ် သွက်ဂွံမၚ်မွဲအာ ညံၚ်ဟွံဂွံလီုလာ်ကီု၊ သွက်ဂွံဒၞါတာအာ ညးၜံက်ခါဲ ဟွံလုပ်ကဵုသၞောဝ်တံကီု၊ ဘဏ္ဍာကၟိန်ဍုၚ်လေဝ် ညံၚ်ဟွံဂွံဆောံဗြံကီု ရန်တၟံသာ်ဂှ်တုဲ လ္တူကမ္ပဏဳ Royal Eagle Development Group Co,Ltd အာတ်မိက်ကၠုၚ် သွက်ဂွံကဵုအခေါၚ်ကၠောန် ပံၚ်တောဲပါ်ပရအ်ဂုဏ်ဖဵုတုပ်ဂှ် ပံက်ကဵုလဝ်အခေါၚ်ကၠောန် နူအေဗရဴ ၂၄ တုဲကၠုၚ်ဏံရောၚ်” ဥူမျေအ်တာန်ဝေန် ဂးကၠုၚ်လဝ်နွံ။
“လ္ၚတ်စမ်ၜတ်ကၠာတဲဟီုဂှ် ဒးကံက်တၚ်နၚ် Data ဒေတာ ဏောၚ်၊ ဒှ်မာန် ဟွံမာန် ဒးစၟဳစၟတ်ဏောၚ်၊ ဒုၚ်သဇိုၚ် လ္တူတၚ်နၚ်ဂှ်တုဲ ဆက်ခါဲဟာ၊ ဟွံဆက်ခါဲဟာဟီုဂှ် ကၟိန်ဍုၚ်တေံ ဖျေံသ္ဂုတ်သွာတ်ဏောၚ်၊ အဏံဂှ် ကဵုလဝ်အခေါၚ် သွက်ဂွံကၠောန် အလုံကိုန်အစဳဇန် ဟွံသေၚ်ပုဟ်၊ ကဵုလဝ်အခေါၚ် ဆၜိုတ်အဆံၚ် လ္ၚတ်စမ်ၜတ်သၟးရဏောၚ်” ညးတေံ ဆက်ဟီုရ။
“ပ္ဍဲ ၁၈ -၄-၂၀၁၈ အလဵုအသဳတွဵုရးမန် ကၠောန်လဝ် ကောံဓရီု လၟေၚ် (၁၅/၂၀၁၈) တုဲ အတိုၚ်သ္ဂုတ်သွာတ် တၚ် (၁၄) ဂှ်မ္ဂး သွက်ဂွံကဵုအခေါၚ်ကီု သွက်ဂွံရေၚ်တၠုၚ် ကိစ္စပရေၚ်ဂီုကၠီုကီု အလဵုအသဳတွဵုရးမန် ဖန်ကဵုဟွံမာန်ဏီ၊ ဆၜိုတ် ဒှ်မာန် ဟွံမာန် Feasibility Study(F/S) ဂှ်ရ ကဵုအခေါၚ်လ္ၚတ်စံၜတ်ကၠာဏောၚ် က္လေၚ်ဏာပရိုၚ်ရ” သာ်ဝွံ ဂွံဗှ်ကေတ် လိက်တၞးဆာဲ ရုၚ်အလဵုအသဳ တွဵုရးမန်ကီုရ။
တုဲကၠုၚ်မွဲၜါတ္ၚဲဏံ သ္ပလဝ်အေန်တာဗျူ ကဵုအ္စာသဝ်ဟံၚ်ဍုၚ်ဂှ်လေဝ် ၜံက်ခါဲနကဵုစက်ယန်ဂွံဏောၚ်ဂှ် ကဵုလဝ်အခေါၚ်ဟွံမွဲပုဟ် ညးဟီုလဝ်သာ်နွံကီုလေဝ် သၟိၚ်တၠမဆေၚ်စပ်တံ ဂွံဟီုဗဒိုအ်ကမ္ပဏဳဂှ် ဟွံမိၚ်ဏီရ။
အတိုၚ်ဂွံဆဵုကေတ် လ္တူ Facebook တေံဂှ်မ္ဂး “ပ္ဍဲဒဵုသၟိၚ်ဗၠာဲ ဒၞါဲကေၚ်ဒှ်ကၠုၚ် ဌာန်ဂအုပ်ပၞာန်ဂျပါန် အဃောပၞာန်ဂၠးတိ အလန်ဒုတိယတေံဂှ် ပစူလဝ်ခတဵုပၟိၚ် “စစ်သမိုၚ်းပြတိုက်ဖော်ဆောၚ်မည့် ရှေ႕ပြေးစီမံကိန်း” တုဲ “စီမံကိန်းတာဝန်ရှိသူများမှအပ အခွၚ့်မရှိမဝၚ်ရ” ထပ်တာဒၞါလဝ် နကဵုယာတ်ဍာဲဍာဲမလိက်ဗုဗုပၠန်တုဲ ၜံက်ခါဲဒၟံၚ် ကဵုစက်ယန်ဖိုဟ် အလဵုအသဳတွဵုရးမန် ပညံၚ်ကဵုဟွံတီ ဟွံဟီု ဟွံဗြုမွဲသာ်ဂှ် ဒှ်အရာဒးအံသဝ်မွဲရ။
ဟွံဂွံအခေါၚ်မွဲသာ် ၜံက်ခါဲဒၟံၚ် နကဵုစက်ယန်ဗီုဗီုဏံဂှ် ကၠတ်ထဝ်တွဵုရးမန် ကော်ဆဵု ဝန်ဇၞော်လ္ၚဵုလ္ၚဵု နူဂကောံအလဵုအသဳ တွဵုရးမန်ဂှ်တုဲ ၜံက်ခါဲဒၟံၚ် ဟွံမွဲကဵုအခေါၚ်ဂှ် ညံၚ်ဂွံဗဒိုအ်ထောံ၊ တုဲတှေ် ညံၚ်ဂွံကေတ်အရေဝ် အတိုၚ်သၞောဝ်ဥပဒေ- သာ်ဏံ ပလံၚ်ကဵုလဝ်လိက် နူစၟတ်တ္ၚဲ မေ ရ တေံရဏောၚ် ဒံက်တာအံၚ်နာၚ်ဥူ ဒုဥက္ကဌ ကၠတ်ထဝ်တွဵုရးမန် ဂးရ။
“ၜံက်ပၠာ် ဆာ်ခါဲ နကဵုကွဳစက်ယန် Back Hoe ဂှ် ဟွံဂွံလဝ်အခေါၚ်မွဲသာ်ဏီ အဆံၚ်ၜံက်ခါဲ အခေါၚ်လုပ်ကဵုသၞောဝ်ဂှ်လေဝ် ဟွံဂွံလဝ်မွဲသာ်ဏီ အတိုၚ် Procedure မ္ဂး ပ္ဍဲအဆံၚ် ကဵုလဝ်အခေါၚ်လ္ၚတ်စမ်ၜတ် ကၠာတဲဏံဂှ်ရ ဍေံတံ ကၠောန်ၜက်အာဂှ် ဂွံဆဵုမံၚ်ယျဏောၚ်” ဒံက်တာအံၚ်နာၚ်ဥူ ဟီုကဵုဌာန်ပရိုၚ် DVB ရ။
ကမ္ပဏဳၜံက်ခါဲဒဵုသၟိၚ်ဗၠာဲဂှ်လေဝ် ဂွံဆဵုကေတ် ဌာန်ပရိုၚ်တံ၊ မုက်လိက်ဂၠးကျာမှာဇန်တံ မွဲတ္ၚဲကဵုမွဲတ္ၚဲ ညးဟီုပါ်ပါဲ ဂၠိုၚ်တိုန်ကၠုၚ်ဂှ်တုဲ “မွန်ပြည်နယ်အစိုးရအဖွဲ႔ခွၚ့်ပြုချက်ဖြၚ့် ဒုတိယကမ္ဘာစစ် လက်ကျန်ပစ္စည်း ပဏာမ လေ့လာစူးစမ်းရေးအဖွဲ႔” ဂးတုဲ က္လေၚ်ပ္တိုန်လဝ် ခတဵုပၟိၚ်တၟိဂှ် ဂွံဆဵုကေတ်။
“ဟွံဂွံလဝ်အခေါၚ် နူအလဵုအသဳတွဵုရးမန်မွဲသာ် ကၠုၚ်ခါဲဒၟံၚ်တိုက်ဂြပ် လက်ထက်ခေတ်ပၞာန် ဂျပါန်တေံဟီုဂှ် ကမ္ပဏဳဏံ ဟွံကၠိုဟ်သၞောဝ်ဥပဒေဟာ၊ တီဒၟံၚ်ဖိုဟ် သ္ပပၞကြအ်အ်ယှောတ်တ်ဟာ၊ ၜိုတ်လ္ၚတ်သၟးရ ဟီုလဝ်တုဲ ကာလကၠောန်နဇိုၚ်နတဲဂှ် ခါဲကေတ်စကွေံကွေံဟာ၊ ဟွံသ္ပကာကဵု အလဵုအသဳတွဵုရးဟာ၊ သ္ဇက်ဒးသ္ပကာဟွံမွဲ စွံစိုတ်ဗီုဂှ်ဟာ၊ ဒှ်ဒၟံၚ်ဗီုဏံဂှ် အလဵုအသဳ တွဵုရးမန် ဟွံတီဟာ၊ ကၠာတေံ အရေဝ်လောန် ပါၚ်သၠိုၚ်အာဂှ်တီဒၟံၚ်ဖိုဟ် လၟုဟ်သ္ပပၞ ညံၚ်ကဵုဟွံဆဵုဟာ၊ ညးတၞဟ်ဟွံညာတ်တှေ် ကၠတ်သ္ပဒၟံၚ်သ္ၚိတ်တ်ဟာ၊ဟွံသေၚ်တှေ် xxxxxx ဟာ xxxxxx ဟာ” ဂှ် ဥူမျဵုဝေန် အမာတ်ကၠတ်ထဝ် ကောန်ဂကူ နူပွိုၚ်ဍုၚ်ရေဝ် ဟီုပါ်ပါဲလဝ် ပ္ဍဲမုက်လိက် Facebook တေံရ။
ကမၠောန်ကိုန်အစဳဇန်ဂှ် ဆဂွံဓမံက်ရုပ်ရဴၜါပိတ္ၚဲညိကွေံဏီတှေ် တၟေၚ်ၚ်တၟဟ်ဟ် ဟွံဆဵုမွဲသာ်ဏီ ရဴဝွံ ညးနွံတာလျိုၚ်မွဲတၠ နူကိုန်အစဳဇန်ဂှ် ဟီုကဵုဌာန်ပရိုၚ်အလဵုအသဳ (မြန်မာ့အလၚ်း) ရ။
“ပိုဲဓမံက်မံၚ်ရုပ်ရဴ ကိုန်အစဳဇန်ဂှ် ဂွံကဵုတ္ၚဲညိကွေံဏီတှေ် မုဟွံတၟေၚ်ဏီ၊ အခါရ ဆဵုအကာဲအရာတၟေၚ်ၚ်ကီု ဟွံသေၚ်တှေ် ၜိုတ်ဂိတုအိုတ်တေံကီု ပရူပရာသောဲသောဲဗြောဲဗြောဲ ဂွံဆဵုလဝ်တံဂှ် က္လေၚ်လဴကဵု ရဲမဳဒဳယာတံ ပၠန်ဏောၚ်၊ ကၠောန်ဒၟံၚ်လၟုဟ်ဂှ် ဂွံအခေါၚ် နူအလဵုအသဳတွဵုရးမန်တုဲရ ကၠောန်မံၚ်၊ ဟွံဂွံအခေါၚ်မွဲသာ် ကၠောန်ဒၟံၚ်ဟွံသေၚ်၊ ဟွံကဵုမၞိဟ်မ္ၚးလုပ်ဟီုဂှ် ဟိုတ်နူကၠောန်ဒၟံၚ်ကဵုစက်ယန်တံတုဲ ဂွိၚ်ဖေက်က္တဵုဒှ်အန္တရာဲမွဲမွဲသာ်တှေ် ဟွံကဵုလုပ်လေဝ် ဒှ်မာန်၊ မ္ၚးဒၞါဲ ဒၞါတာလဝ်ဂှ်မ္ဂး ဒၞါဲဒးစိုတ်မံၚ်တုဲ တက်ဗီုဂွံမံၚ်၊ ပြဟ်ဟ်ဏံ ၜိုတ်ဏံရ အဲဟီုကဵုဂွံ” ပူဂဵုဂှ် ဂး။
သရောပ်မ္ဂး ပ္ဍဲအဆံၚ်လ္ၚတ်စံၜတ်ဗွဲပဏာမ ကၠာတဲဏံ အခေါၚ်ၜံက်ခါဲ နကဵုစက်ယန်ဂှ် ဟွံမွဲပုဟ် ကၠတ်ထဝ် ကဵု အလဵုအသဳတံ ဟီုဒၟံၚ်သာ်ဂှ်ကီုလေဝ် လ္ပာ်ကမ္ပဏဳၜံက်ခါဲဂးဂှ် ဂွံအခေါၚ်တုဲရ ခါဲဒၟံၚ်ဏောၚ် ရဴဝွံ နူကဵုမဳဒဳယာ ဟီုဂးခၠေဝ်ဒၟံၚ်အရေဝ် ဗီုညးကဵုညး၊ ခတဵုပၟိၚ်ကိုန်အစဳဇန်ဂှ်လေဝ် အကၠာဂှ် မွဲဗီု၊ လၟုဟ်က္လေၚ်ဒှ်အာ မွဲဗီုပၠန်ဟီုဂှ် ညံၚ်ရဴ ဂွံဗဵုဒၟံၚ် ပေါဲဒမၠုမတ် ဒဵုသၟိၚ်ဗၠာဲကီုရဏောၚ် ပ္တိုန်ထ္ၜးဏာရအဴ။