ဝဏ္ဏမာန်၊ နဝ်ဝေမ်ဗာ ၁၀၊ ၂၀၁၉
တ္ၚဲကောန်ဂကူမန် မရနုက်ကဵု (၇၃) ဝါဗဟဵုဏံဂှ် ကမ္မတဳကၠောန်ဗဒှ်တံ ရန်ဖျေံလဝ် သွက်ဂွံကၠောန်အာ လတူဍုၚ် မတ်မလီုတုဲ ဂတဵုမုက်ပစူတိဂှ်လေဝ် ပတိုန်ထ္ၜးလဝ် ဝၚ်ဍုၚ်မတ်မလီု ဗွဲအပြောံနွံရောၚ် ညးတာလျိုၚ်မွဲတၠ ဟီုထ္ၜး ရ။
“ကိစ္စဂတဵုမုက်တ္ၚဲကောန်ဂကူဗဟဵု သၞာံဏံဂှ် ဝၚ်ဍုၚ်မတ်မလီု၊ မပတံကဵု သၟိၚ်မတ်ပိရာဇာ၊ တုဲတှေ် စပ်ကဵုတ္ကံပဥ္စ လိုၚ်၊ စပ်ကဵုကျာ်သလ္လာန် (သၚ်လိုက်) ဂှ်ကဵု ရုပ်ၜိုပ်ကၠောန်လဝ်တၟိဏံ ပန်တၚ်ဏံ သ္ပသ္ဇိုၚ်ဒတုဲတှေ် ညံၚ်ဂွံဓမံက် ဏာ ဖျေံလဝ်ဗွဲအပြောံနွံ၊ လတူဏံဂှ် အာတ်မိက်အာ ညးဍုၚ်ကွာန်တုဲတှေ် လတူဏံ ဗီုလဵုညးဂလိုၚ်ညာတ်ဂှ် ထပ် ချပ်သဳကၠဳအာဏောၚ်” သာ်ဏံ ဒုဥက္ကဌကမ္မတဳကၠောန်ဗဒှ် တ္ၚဲကောန်ဂကူမန် မရနုက်ကဵု (၇၃) ဝါ ဗဟဵု နာဲမန်ရာ ဇာ ဟီုထ္ၜးရ။
တုဲကၠုၚ်ဂိတုကထိုန် (၁၃) မံက်၊ နဝ်ဝေမ်ဗာ (၉) ဂှ် ကမ္မတဳကၠောန်ဗဒှ် တ္ၚဲကောန်ဂကူမန် မရနုက်ကဵု (၇၃) ဝါ ဗဟဵုတံ သ္ပကောံဓရီုလၟေၚ် (၁) ပ္ဍဲကဵုဇြပ်မန် ဍုၚ်မတ်မလီုတုဲ သဳကၠဳဏာ ကိစ္စပရေၚ်ဂတဵုမုက်ပစူတိဂှ်ကီု၊ ကိစ္စ ဒၞာဲကၠောန်ဗဒှ်ကီု နွံရ။
“ပရေၚ်ဂတဵုမုက်ပစူတိဂှ်တှေ် ကၠာဟွံသ္ပဒတန်ဏံဂှ်တှေ် လလောၚ်တြးအာဏောၚ် တုဲတှေ် သ္ပဒတန် ပ္ဍဲကောံဓရီု လၟေၚ်ဂတတေံဏောၚ်၊ ဒၞာဲဂှ်တှေ် ချပ်လဝ် ၜါဒၞာဲနွံ၊ ဆဂး ဟွံဂွံသ္ပဒတန်ဏီရောၚ်” သာ်ဏံ နာဲမန်ရာဇာ ဆက်ဟီုရ။
ဖလာတ်ဒၞာဲကၠောန်ဗဒှ် တ္ၚဲကောန်ဂကူမန်ဗဟဵုဂှ် ဒၞာဲဘာတန်သၠုၚ် လၟိဟ် (၂)၊ အရာပ်လှုာၚ် (အထက အမှတ် ၂- လှိုၚ်ရပ်ကွက်) မွဲဒၞာဲကဵု ကၠအ်ပ္ကဴသံလောန် (သံလွၚ်ဥယဉ်) မွဲဒၞာဲ ရန်လဝ်သွက်ဂွံကၠောန်အာနွံရ။
တ္ၚဲကောန်ဂကူမန် မရနုက်ကဵု (၇၂) ဝါ ဗဟဵု သၞာံတုဲကၠုၚ်တေံဂှ် ကၠောန်ပ္ဍဲဍုၚ်ဟံသာဝတဳ (ဗ္ဂော) တုဲ ဂတဵုမုက် ပစူတိဂှ်လေဝ် ဓမံက်ထ္ၜးဏာ ဝၚ်ကျာ်မုဟ်တဴ (ကျာ်ဗ္ဂော) ကဵု ဝၚ်ဍုၚ်ဟံသာဝတဳ (ဗ္ဂော) တန်ကိုပ်ကၠာအိုတ်ဂှ်ရ။
တုဲကၠုၚ်ဂိတုဝှ် (၁၃) စွေက်၊ အံက်တဝ်ဗာ (၂၆) ဂှ် ဒက်ပတန်ဏာ ကမ္မတဳကၠောန်ဗဒှ် တ္ၚဲကောန်ဂကူမန် မရနုက်ကဵု (၇၃) ဝါ ဗဟဵုဂှ်တုဲ သီုရုဲစှ်ဏာ ဒၞာဲကၠောန်ဗဒှ်ဒတုဲရ။
တ္ၚဲကောန်ဂကူမန်ဗဟဵုဂှ် စကၠောန်ကၠုၚ် ပ္ဍဲကဵုမရနုက်ကဵု (၄၉) ဝါတုဲ စကၠောန်ကၠုၚ် လတူဍုၚ်မတ်မလီုရ။ မရနုက် ကဵု (၅၀) ဝါဂှ် ကၠောန်ပ္ဍဲကွာန်ပြၚ်ဍာဲ ပွိုၚ်ဍုၚ်ကျာ်ပိ၊ မရနုက်ကဵု (၅၁) ဝါဂှ် ကၠောန်ပ္ဍဲဍုၚ်မတ်မလီုတုဲ ဒဵုကဵု မရနုက်ကဵု (၆၀) ဝါ ကၠောန်ကၠုၚ် ပ္ဍဲဍုၚ်မတ်မလီုရ။
မရနုက်ကဵု (၆၁) ဝါဂှ် ကၠောန်ပ္ဍဲဍုၚ်မုဟ်ဍုၚ်၊ မရနုက်ကဵု (၆၂) ဝါဂှ် ကၠောန်ပ္ဍဲကွာန်ကၟာမဵု ပွိုၚ်ဍုၚ်ၜါသွာၚ်၊ မရနုက် ကဵု (၆၃) ဝါဂှ် ကၠောန်ပ္ဍဲဍုၚ်လၟိုၚ် ဍုၚ်ပါ်လၟိုၚ်၊ မရနုက်ကဵု (၆၄) ဝါဂှ် ကၠောန်ပ္ဍဲဍုၚ်ဇြပ်ဗု၊ မရနုက်ကဵု (၆၅) ဝါဂှ် ကၠောန်ပ္ဍဲကွာန်ကအ်ဗိန် ပွိုၚ်ဍုၚ်ကအ်ကြိက်၊ မရနုက်ကဵု (၆၆) ဝါဂှ် ကၠောန်ပ္ဍဲဍုၚ်ပံၚ်၊ မရနုက်ကဵု (၆၇) ဝါဂှ် ကၠောန်ပ္ဍဲဍုၚ်ကၟာဝက် ပွိုၚ်ဍုၚ်မုဟ်ဍုၚ်၊ မရနုက်ကဵု (၆၈) ဝါဂှ် ကၠောန်ပ္ဍဲဍုၚ်ရေဝ်၊ မရနုက်ကဵု (၆၉) ဝါဂှ် ကၠောန်ပ္ဍဲ ကွာန်ကလအ် ပွိုၚ်ဍုၚ်ၜါသွာၚ်၊ မရနုက်ကဵု (၇၀) ဝါဂှ် ကၠောန်ပ္ဍဲ ဍုၚ်ကျာ်မြဟ်၊ မရနုက်ကဵု (၇၁) ဝါဂှ် ကၠောန်ပ္ဍဲ ကွာန်ထဝ်ပၠၚ် ပွိုၚ်ဍုၚ်ဘာအၚ်၊ မရနုက်ကဵု (၇၂) ဝါဂှ် ကၠောန်ဏာ ပ္ဍဲဍုၚ်ဟံသာဝတဳ (ဗ္ဂော) ရ။