ဝဏ္ဏမာန်၊ နဝ်ဝေမ်ဗာ ၁၂၊ ၂၀၁၉
နူကဵုဂကောံဇိုန်ကဵုတဆိပ်တံ ကဵုလာပ်တဆိပ်ကုတၠဂုဏ်ဂှ် တုပ်တဴကဵု ညးတံကဵုလာပ်တဆိပ် ကုဂကူမန်ကီုရောၚ် ညးကလိဂွံတဆိပ် ချဳဓရာၚ်ပြာကတ် ပ္ဍဲအရာပရေၚ်ရီုဗၚ်မဟာဇန် တၠဂုဏ်အဇ္ဇ ဟီုမြော်ရ။
“ကဵုလာပ် ပ္တိုန်ဂုဏ်စရာဲဏံဂှ်တှေ် လညာတ်ဂုဏ်ဂှ် ဍေံပ္တိုန်ဂုဏ်စရာဲကဵု ဂကူမန်ပိုဲ၊ ဍေံသ္ပစၟတ်သမ္တီကဵု ဂကူမန်ပိုဲ ဏောၚ်၊ တုဲမွဲသာ်ပၠန်ဂှ် ပရေၚ်ချဳဓရာၚ်ဂုဏ်တံ ချဳဓရာၚ်မံၚ် ပရော (အအာ) ဏံဂှ်တှေ် နကဵုညးတၠဒါန်ကီု၊ ဂကောံ နာနာတံကီု၊ ရဲဘိုၚ်ချဳဓရာၚ် ပူဗိုၚ်မံၚ်ကဵုကာယ ဘိုၚ်ရေၚ်တၠုၚ်လဝ်ကီု၊ ရဲသၟာဂဳတဂကူမန်ပိုဲတံကီု၊ ကောန်သၟတ် ပွိုၚ်ဍုၚ် အဆံၚ်ကွာန်တံ စနူကဵုက္ဍိုပ်သ္ကိုပ်ဗော်ပိုဲတံ သၚ်သၟတ်တံ ဗွဲမဂၠိုၚ် ဘိုၚ်ချဳဓရာၚ်၊ ဘိုၚ်ကဵုဇြဟတ်တုဲတှေ် ကမၠောန်ချဳဓရာၚ်မံၚ်ဏံ ဍေံဇၞော်တိုန်ကၠုၚ်၊ လာပ်ဏံဂှ် ဍေံကဵုဂုဏ်မွဲဓဝ်ဟွံသေၚ်ပုဟ် ဂုဏ်ညာတ်ဂှ် ဍေံကဵုရဲဘိုၚ် ချဳဓရာၚ်တုဲ ညးတၠဒါန်တံ ပါသီုဖအိုတ်ရဏောၚ်” သာ်ဏံ တၠဂုဏ် ဟီုမြော်ရ။
တၠဂုဏ်အဇ္ဇ (တရဴအအာ) စတံနူအလဵုအသဳပၞာန်တုဲကၠုၚ်တေံ ချူခၞံသ္ဇိုၚ်သၞောဝ်ဒက်ပတန်ဍုၚ် (၂၀၀၈) အဃောအလဵုအသဳတံ ဂစာန်စကၠောန်ပေဲါရုဲမာဲ (၂၀၁၀) ဂှ် ဒစဵုဒစးကၠုၚ်သၞောဝ်ဝွံတုဲ သၞာံ (၂၀၁၀) ဂိတုဂျာန္နဝါရဳ (၇) ဂှ် ဒးဒုၚ်ရပ်စုတ်ထံၚ်သၞာံဇမၠိၚ်ရ။ စတံနူအခိၚ်ကၠာဟွံဒးထံၚ်ဂှ်လေဝ် ချဳဓရာၚ်ကၠုၚ် စပ်ကဵုကမၠောန်ပရိုၚ်ကီု၊ ပရေၚ်တ္ၚဲတၟေၚ် ပ္ဍဲဂကူမန်ကီု၊ ချဳဓရာၚ်ကိစ္စပရေၚ်ဍုၚ်ကွာန် ကောန်ဂကူ ကဏ္ဍနာနာသာ် နွံကၠုၚ်ရ။
သၞာံ (၂၀၁၂) ဂိတုဂျာန္နဝါရဳ (၁၃) ဂှ် ဗၠးတိတ်နူထံၚ် နကဵုအမိၚ်သမ္မတဥုတိၚ်သိၚ်တုဲ စတံနူပရေၚ်ကမၠောန်ရီုဗၚ် ညးဒှ်ဒဒိုက်ဘဲချိုတ်ဂျိုၚ်၊ ဍာ်ဗၠိုက်၊ သ္ၚိတူ (ပရဟိတ) ကဏ္ဍပရေၚ်ရီုဗၚ်နာနာဂှ် ချဳဓရာၚ်ရေၚ်တၠုၚ်ကၠုၚ်မွဲဒမြိပ်ရ။
မွဲဒမြိပ်ဂှ် တၠဂုဏ် ချဳဓရာၚ်ရေၚ်တၠုၚ်ကၠုၚ် စပ်ကဵုပရေၚ်ဒတုဲဂုဏ်ဖဵု ကုမဟာဇန် ညးဒှ်ဒဒိုက်တံဂှ်တုဲ ဂိတုနဝ်ဝေမ်ဗာ (၂၃) ဂှ်မ္ဂး နူကဵုဂကောံလွဳၜံၚ်ပ္တိတ် ပူဂဵုပြာကတ်ဒယှ်တှ် ပ္ဍဲအရာပရေၚ်ရီုဗၚ်မဟာဇန် (Innovation Mass Media Confederation – I.M.C) နူဍုၚ်သေံ (Thailand) (၈) ဂကောံ ပံၚ်ကောံတုဲ ဇိုန်ကဵုလာပ်တဆိပ် ‘ညးချဳဓရာၚ်ပြာ ကတ် ပ္ဍဲအရာပရေၚ်ရီုဗၚ်မဟာဇန်’ ရ။
“နူကဵုဂကောံတံဂှ် ညးတံ ဍုၚ်ဇိုၚ်ဝုတ်ဒုဟ် ဗီုကဵုဍုၚ်လောတံ၊ ဍုၚ်ဗဳယေက်နာန်တံ ပူဂဵုညးချဳဒရာၚ် စပ်ကဵုပရဟိတ ညးဒယှ်တံဂှ်တှေ် ညးတံကေၚ်ကဵုကၠုၚ်မံၚ်၊ သၞာံဏံဂှ် ညးတံကေတ်ကၠုၚ်အဆက်ကဵုဂုဏ် တုဲတှေ် ပ္ဍဲဂကူမန်ုပိုဲဂှ် တၠဂုဏ်ရံၚ်တှေ် ဆဵုညး (တၠဂုဏ်အဇ္ဇ) မွဲရ ပြာကတ်ဂၠိုၚ်တှေ် တၠဂုဏ် ကေတ်ဆက်စၠောံကဵု သွက်ဂွံကဵုတဆိပ် လာပ်ဏံရ” သာ်ဏံ ညးရေၚ်တၠုၚ်ဆက်စၠောံကဵု သွက်ဂွံဇိုန်ကဵုတဆိပ် တၠဂုဏ်ပုပ္ဖဟံသာ တိုန်မံၚ်ဘာတက္ကသဵု ချူဠာလံၚ်ကံၚ် (ဍုၚ်သေံ) ဂှ် ဟီုမြော်ရ။
သၞာံ (၂၀၁၈) ဂိတုအေဗရေဝ်တေံလေဝ် နူကဵုဂကောံ ‘မူလနိဓိ ရာမာည်ရက်’ (Ramanrak Foundation) (မန်ဍုၚ်သေံ) ဂှ် ကေၚ်ဇုိုန်ဗဂိန်ကဵုလာပ် ‘မၞိဟ်ခိုဟ်ကျာ်သြဳရာမာည်’ နွံကီုရ။