Categories
ပရိုၚ်

ဂကောံအ္စာကၞေဟ် ချူခၞံသ္ဇိုၚ်ဂစိုတ်လိက်ပတ်မန် (ဝါ) မူသ္ပအစာံလိက်ပတ်မန် မွဲကၞပ်ရောၚ်

ဝဏ္ဏမာန်၊ ဖေဖဝ်ဝါရဳ ၂၄၊ ၂၀၂၀

သွက်ဂွံထိၚ်ဒဝ် ဇၞော်ပၟဝ်အာ လိက်ပတ်မန်ကီု၊ ပ္ဍဲအရာချူ ရပ်စပ်သုၚ်စောဲ သ္ဂောံဒှ်မွဲဗီုပြၚ် မွဲသၞောတ် ရန်တၟံတုဲ ဂကောံအ္စာကၞေဟ်မန် ချူခၞံအာ သ္ဇိုၚ်ဂစိုတ်လိက်ပတ်မန် (ဝါ) မူသ္ပအစာံလိက်ပတ်မန် မွဲကၞပ်နွံရ။
သ္ဇိုၚ်ဂစိုတ်လိက်ပတ်မန်ဝွံ စတံနူ ဗျဉ် ‘က’ စဵုစိုပ် ဗျဉ် ‘ၝ’ ဂှ် ချူခၞံအာ ဗီုပြၚ်အဘိဓာန်တုဲ ဗျဉ်ဗ္ဂပ်ကဵု ‘သွဵု’ ၊ ဗျဉ် ဗ္ဂပ်ကဵု ‘ကၟက်’ ၊ ဗျဉ်ဗ္ဂပ်ကဵု ‘ဂစိုတ်’ သာ်ဝွံ ဝေါဟာမန် ၜိုတ်ဒးသုၚ်စောဲဂှ် ချူဖျေံအာရောၚ် ညးတာလျိုၚ်တံ ဟီုထ္ၜးရ။
“ပိုဲရန်ဖျေံလဝ်ဂှ် စတံနူ ဗျဉ် ‘က’ စဵုကဵုစိုပ် ဗျဉ် ‘ၝ’ ဂှ် တောဲဗ္ဂပ်ကဵု ‘သွဵု’ ၁၂ မ၊ တုဲတှေ် တောဲဗ္ဂပ်ကဵု ‘ကၟက်’ ၊ တုဲတှေ် တောဲဗ္ဂပ်ကဵု ‘ဂစိုတ်’ ဝေါဟာမန် ၜိုတ်ဒးသုၚ်စောဲရပ်စပ်ဂှ် ချူပ္တိတ်အာရောၚ်” သာ်ဏံ ဥက္ကဌ ဂကောံအ္စာ ကၞေဟ် နာဲအံၚ်ဇၞး ဟီုထ္ၜးရ။
ပ္ဍဲအရာချူခၞံသ္ဇိုၚ်လိက်ပတ်မန်ဂှ် အ္စာကၞေဟ် သၚ်ဂှ် တၠဂုဏ်ဃောသဂကူအိန်၊ အ္စာကၞေဟ်အံၚ်သူ (သုဝဏ္ဏဘူမိ)၊ အ္စာကၞေဟ်ဇဝန (မန်မန်ရာမည)၊ အ္စာကၞေဟ်နာဲသိုက်သၠိၚ်၊ အ္စာကၞေဟ်နာဲအံၚ်ဇၞး၊ အ္စာကၞေဟ်နာဲဗညာဂ္ဇံ၊ အ္စာကၞေဟ်ဝဏ္ဏမာန်တံ ကေတ်တာလျိုၚ်တုဲ စချူခၞံအာရ။
သ္ဇိုၚ်လိက်ပတ်မန်ဝွံ စတံနူဂိတုဖဝ်ရဂိုန် ၁၃၈၁ သၞာံဏံ စဵုကဵုစိုပ် ဂိတုဖဝ်ရဂိုန် ၁၃၈၂ သၞာံတေံ ကေတ် အခိၚ်ပွိုၚ်မွဲသၞာံတုဲ ချူခၞံအာရောၚ် သ္ဂးရ။
“ပိုဲဖျေံလဝ်ကမၠောန်ဂှ် အ္စာကၞေဟ်မွဲမွဲတၠတှေ် ဗျဉ် ၃ မ၊ ဗျဉ် ၂ မ၊ ပါ်လဝ်တာလျိုၚ်ချူတုဲတှေ် ဂွံပွိုၚ်မွဲဂိတုတှေ် ကလေၚ်ကောံသဳကၠဳညးသ္ကံမွဲလတုန်၊ ပ္ဍဲဂှ်တှေ် သဳကၠဳလဴကလးညးသ္ကံ မုတၚ်ခက်ခုဲနွံ၊ မုပရေၚ်ဆဵုဂဗသာ်လဵု သဳ ကၠဳအာညးသ္ကံတုဲ ဆက်ပါ်အာတာလျိုၚ် ဆက်ချူအာဂတဂှ်ပၠန်ရောၚ်၊ ချိၚ်လဝ်တှေ် ၜိုတ်ပွိုၚ်မွဲသၞာံတှေ် ကေတ် အခိၚ်ချူခၞံအာရောၚ်” သာ်ဏံ နာဲအံၚ်ဇၞး ဆက်ဟီုထ္ၜးရ။
ဆေၚ်ကဵုလိက်ပတ်မန်ဂှ် လိက်အဘိဓာန် မန်-ဗမာ၊ အဓိဓာန် မန်-အေၚ်္ဂလိက် နူကဵုအ္စာကၞေဟ်သၚ်-ခရှ် လ္ၚဵု ချူတက်ပ္တိတ်လဝ်နွံကီုရ။ နကဵုဂကောံလိက်ပတ်မန်ဂှ် ဂကောံလဵုလေဝ် ချူခၞံကၠုၚ် သွက်သ္ဂောံသ္ပအစာံဂှ် ဟွံမွဲ ကၠုၚ်ဂှ်ရ နူကဵုဂကောံအ္စာကၞေဟ်တံ ချူခၞံတုဲ ကော်ဘိက် တၠပညာညးစီုသကီုလိက်ပတ်တံတုဲ ကေတ်အာကသပ် ကုတၠပညာတံရောၚ် သ္ဂးရ။
“သ္ဇိုၚ်ဂစိုတ်လိက်ပတ်မန်ဏံဂှ် နကဵုအလဵုဂကောံအ္စာကၞေဟ်တံမွဲဓဝ် သ္ပဏာဒတန် ဒးကေတ်ဗီုဏံရ ဒးသုၚ်စောဲ ဗီုဏံဟွံသေၚ်၊ အ္စာကၞေဟ်တံဂှ် ၜိုတ်ဆချူဖန်ဗဒှ်ကဵု ဗွဲအပြောံဟေၚ်ရ၊ ချူခၞံတုဲတှေ် ကော်ဘိက်အာ တၠပညာ ခမဳ သၚ် ခရှ် ညးစီုသကီုလိက်ပတ်တံတုဲ ဗီုလဵုဆက်သုၚ်စောဲအာဂှ်တှေ် ကေတ်အာကသပ်ရောၚ်” ဥက္ကဌ ဂကောံ အ္စာကၞေဟ်ဂှ် ဆက်ဟီုရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.