Categories
ပရိုၚ်

သ္ပဏာဒတန် အခေါၚ်စုတ်မာဲ လတူရဲသၟာကမၠောန်ဆုဲပြံၚ်တံဂှ် တုပ်တဴကဵု ဟွံရှေ်သှေ် ကောန်ဍုၚ်အရၚ်တံရောၚ် ညးမၞုံအခေါၚ်ဟီုဂး ဗော်ညဳသၟဟ်မန်ဟီု

ဝဏ္ဏမာန်၊ ဖေဖဝ်ဝါရဳ ၂၇၊ ၂၀၂၀

အကြာဗော်ကောန်ဍုၚ်အရၚ်ဂမၠိုၚ်တံ ဒစဵုဒစးကၠုၚ် လတူသၟာကမၠောန်ဆုဲပြံၚ်တံ ဂွံအခေါၚ်စုတ်မာဲ ပ္ဍဲဒေသရးတံဂှ် ကၠတ်ထဝ်တံသ္ပဏာဒတန်ဂှ် တုပ်တဴကဵု ဟွံရှေ်သှေ်ကောန်ဍုၚ်အရၚ်တံရောၚ် ညးမၞုံအခေါၚ်ဟီုဂး ဗော်ညဳသၟဟ်မန် ဟီုရ။
ပ္ဍဲကဵုသၞောဝ်ဥပဒေ ပေဲါရုဲမာဲကၟိန်ဍုၚ် နဲဥပဒေ (၁၀) ဓမံက်ထ္ၜးလဝ်ဂှ် ရဲသၟာကမၠောန်ဆုဲပြံၚ်တံ ဒၟံၚ်ဂွံပ္ဍဲဒေသ အောန်အိုတ် (၁၈၀) တ္ၚဲ ဂွံအခေါၚ်စုတ်မာဲဝွံ အောန်အိုတ် (၉၀) တ္ၚဲဂှ် တုဲကၠုၚ်ဖေဖဝ်ဝါရဳ (၂၀) ကၠတ်ထဝ်ညးဍုၚ်ကွာန်တံ သ္ပဏာဒတန်တုဲ (၂၄) ဂှ် ဗော်ကောန်ဂကူကောန်ဍုၚ်အရၚ် (၁၄) ဗော်တံ ဒစဵုဒစး ပတိတ်လိက်လစွံစိုတ်အိုတ်ရ။
“လစွံစိုတ်ဗော်ညဳသၟဟ်မန်ဂှ် တုဲကၠုၚ်လေဝ် ပ္တိတ်လဝ်လစွံစိုတ်တုဲမံၚ်ရ၊ ကဵုဗစိုပ်လဝ် ကမ္မယှေန်ပေဲါရုဲမာဲလေဝ်နွံ၊ လစွံစိုတ်လတူဂှ်ရ၊ ပ္ဍဲကၠတ်ထဝ်တုဲကၠုၚ်ဂှ် ညးစၞးဗော်ကောန်ဍုၚ်အရၚ်တံဗွဲမဂၠိုၚ်ဂှ် ဒစဵုဒစးတုဲ သဳကၠဳကၠုၚ်တၟာဂလိုၚ်၊ ဆ – အဵု လတူသဳကၠဳလဝ်တၟာဂလိုၚ်ဂှ် ဗော်ဂွံလဝ်ဒၞာဲဂၠိုၚ်ပ္ဍဲကၠတ်ထဝ်ဂှ် ဍိုက်ကဵုဇြဟတ်တုဲတှေ် ၝဇကုမိက်ဂွံဒှ်ဂှ် ဗဒှ်စုတ်ဏာ ဒှ်ဗီုဂှ်တှေ် ကၠတ်ထဝ်ဏံဂှ် ဒှ်အာမၞိဟ်ဂၠိုၚ်ဂှ် ကေတ်ဇၞးသ္ပမာန်ကဵု မၞိဟ်အောန်သက်သက် ဒှ်အာအဓိပ္ပဲါဂှ်” သာ်ဏံ ဖက်ဆောညးအုပ်ကာ (၁) နာဲလျးတၟး ဟီုရ။
စပ်ကဵုရဲသၟာကမၠောန်ဆုဲပြံၚ်တံ အခေါၚ်စုတ်မာဲ ပ္ဍဲဒေသတွဵုရးကောန်ဂကူကောန်ဍုၚ်တံဂှ် ဒၞာဲညးတံနွံတန်တဴဂှ် ဒးကဵုအခေါၚ်စုတ်မာဲဒစးဒုၚ် (ကြိုတၚ်မဲ) ကုအလံၚ်အမာတ်ဒုၚ်ရုဲစှ်စၞးဒေသညးတံ (တမ်မူလ) ဟေၚ် ဒးရေၚ် တၠုၚ်ထေက်ရောၚ် တုဲကၠုၚ်ဂိတုနဝ်ဝေမ်ဗာ (၂၃၊ ၂၀၁၉) ဂှ် ပ္တိတ်ကၠုၚ်လိက်လစွံစိုတ်ကီု၊ ကာလ သၞာံ (၂၀၂၀) မံက်ဏံဂှ်လေဝ် ချူပလံၚ်ဗစိုပ်ကၠုၚ်လိက် ကုကမ္မယှေန်ပေဲါရုဲမာဲကီု၊ သီုကဵုကၠတ်ထဝ်အဆံၚ်ဆံၚ်ကီုရ။
“ပရေၚ်သၟာကမၠောန်ဆုဲပြံၚ် ဂွံအခေါၚ်စုတ်မာဲ ပ္ဍဲဒေသကောန်ဍုၚ်အရၚ်တံဂှ်တှေ် ဒှ်ဟွံထေက်ပုဟ်၊ ဆဂး သ္ပဏာ ဒတန် အခေါၚ်စုတ်မာဲ ပွိုၚ် (၉၀) တ္ၚဲ လတူရဲသၟာကမၠောန်ဆုဲပြံၚ်တံဂှ် တုပ်တဴကဵု ဟွံရှေ်သှေ် ဗော်ကောန်ဍုၚ် အရၚ်တံရောၚ်၊ ညးတံညးဂလိုၚ် ဒှ်ဂုန်ဖဵုညးတံ ညးတံချပ်ဗီုဏံတှေ် လ္ပာ်မၞိဟ်အောန်ဒးဒုၚ်စသိုၚ်ဂှ် ဍာ်ဇမၠိၚ်တှေ် ဓဝ်ညဳသၟဟ်ဂှ် ဍေံခက်ခုဲတၟာဂလိုၚ်” သာ်ဏံ ညးမၞုံအခေါၚ်ဟီုဂး နာဲတၠညး ဟီုရ။
နကဵုစရၚ်သ္ၚိကၟိန် ကံက်လဝ် ပ္ဍဲသၞာံ (၂၀၁၄) ဂှ်မ္ဂး လၟိဟ်မၞိဟ်တွဵုရးဍုၚ်မန်ဖအိုတ် နွံ (၂) တာန်ပြၚ် (၂,၀၅၄,၃၉၃) ဂှ် သၟာကမၠောန်ဆုဲပြံၚ် နွံ (၃) ကိုတ် (၄) လက်ပြၚ် (၃၄၂,၁၈၉) တၠရ။ ဖအိုတ်ဂှ် အလဵုအသဳတံ ကၠောန်ပတိတ်ကဵု စရၚ်သ္ၚိ ကေုာံ ကာတ်စၟတ်သမ္တီကောန်ဍုၚ် (မှတ်ပုံတၚ်) တုဲ ကာလပေဲါရုဲမာဲ (၂၀၁၅) ဂှ် ညးတံဂွံအခေါၚ်စုတ် မာဲဖအိုတ်ရ။
ကာလပေဲါရုဲမာဲ (၂၀၁၀) ဂှ် ပ္ဍဲတွဵုရးဍုၚ်မန် လၟိဟ်မၞိဟ်ဂွံအခေါၚ်စုတ်မာဲ (၁၀) ပြၚ်နွံတုဲ ကာလပေဲါရုဲမာဲ (၂၀၁၅) ဂှ် ဒှ်ကၠုၚ် (၁၅) ကိုတ်ပြၚ်တုဲ ပွိုၚ် (၅) သၞာံဂှ် လၟိဟ်မၞိဟ်ဂွံအခေါၚ်စုတ်မာဲ ပဵုကၠုၚ် (၅) ကိုတ် တၟော်ကဵုဍိုပ်ကၠံမ္ဂး (၅၀%) ရ။
ဆက်တုဲ ဖက်ဆောညးအုပ်ကာ နာဲလျးတၟး ဂှ် “ယဝ်ရဟီုကဵုသၞောတ်ဒဳမဝ်ကရေဇြဳတှေ် ဒးသ္ပသမ္တီကဵု လ္ပာ်မၞိဟ် အောန်ဏောၚ်၊ ဒးဗက်ကဵုဆန္ဒမၞိဟ်လ္ပာ်အောန်ဂှ် ဣဏံလေဝ် ဒဳမဝ်ကရေဇြဳကီုဏောၚ်၊ ကၠတ်ထဝ်ဏံဂှ် မၞိဟ်ဂၠိုၚ် တှေ်ဇၞး ကၠိုဟ်လဝ်ဗီုဏံဂှ် ကေတ်ဇၞး ဍိုက်ကေတ်ကဵုဇြဟတ်မၞိဟ်ဂၠိုၚ်၊ လၟုဟ် ကၠတ်ထဝ်ညးဍုၚ်ကွာန် သ္ပဏာဒတန် တုဲတှေ် ဒးကလၚ်အာ ကၠတ်ထဝ်ကောန်ဂကူမွဲတဲပၠန်ဏောၚ်၊ တုဲတှေ် မုဆက်တုဲရေၚ်တၠုၚ်အာရောဂှ်တှေ် ဆက် ချပ်အာပၠန်ဏောၚ်” သ္ဂးရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.