စနူဂိတုမာတ်တေံ ယဲCovid-19 ဏံ စလုပ်ကၠောံထၞာန်ကၠုၚ်ဍုၚ်ပိုဲဒဵုတ္ၚဲဏံဂှ်ရ မၞိဟ်ဗွဲမဂၠိုၚ်ကမၠောန်ကၟိတ် ဟွံမွဲဒှ်ကၠုၚ်တုဲ သၟတ်မၞိဟ်ဗြဴတံ သွံတိုန်ဖျာ Online Shopping ဂၠိုၚ်တိုန်မံၚ်ရောၚ် ဂွံဆဵုကေတ်ရ။
Online Shopping ဟီုဂှ် သွံဖျာလ္တူအန်လာၚ် နူကဵု Facebook (ကော်)မုက်လိက်တုဲ လ္ၚဵုဂှ်ပံက်လဝ် (page)လေဝ်နွံ ပံက်လဝ်အကံက်(account)လေဝ်နွံတုဲ သွံမံၚ်ရ။
“လ္ၚဵုမွဲစွံ သၟတ်ဗြဴဗွဲမဂၠိုၚ်တှ်ေ ဒှ်ကၠုၚ်ကဵု online shopping၊ အေဇှ်တှ်ေ တၚ်ခိုဟ်ဟာ ပိုဲဟီုတှ်ေ စၞးဒးပေါတ်မံၚ်ဖုၚ်သၟးဂှ်တှ်ေ ဒှ်ကၠုၚ်ကဵုလညာတ် ဗီုဏံဍေံမံက်ကၠုၚ်ဂှ် တၚ်ခိုဟ်မွဲရ” သာ်ဏံ မိအးမောဝ်ဆာန် နူဂကောံစဳပျးဖောအ်ဗြေဝ်မဟာဇန် ဟီုလဝ်ပ္ဍဲဝိုၚ်တက်ကျာပရေၚ်ယဲ ဂဝ်ရဝ်နာဗွိုၚ်ရာသ်ရ။
ဝိုၚ်တက်ကျာပရေၚ်ယဲ ဂဝ်ရဝ်နာဗွိုၚ်ရာသ်ဂှ်ပ္ဍဲ ဂိတုဂျူလာၚ် စၟတ်တ္ၚဲ၂၆ သၞာံ၂၀၂၀ဂှ် ကၠောန်သ္ပလဝ် ပ္ဍဲဘာရာမညရဋ္ဌ-ဍုၚ်မတ်မလီုတုဲ နာဲသြကောရတ် (Facilitator)၊ မိဝံသမန် (MNA)၊ နာဲဝဏ္ဏ (MYPO) ကေုာံ မိအးမောဝ်ဆာန် (JCSDO) တံ ပါလုပ်သဳကၠဳလဝ်ရ။
Online shopping ဏံဂှ် ဗ္ကန်ကေတ်နူOnline မွဲကဆံၚ်တုဲ လ္ၚဵုဂှ်တှ်ေပြၚ်ဏာသြန် နကဵု Wave money ဟွံသေၚ်တှ်ေ KBZ Pay တံကီု လ္ၚဵုဂှ်ကပေါတ်စိုပ်သ္ၚိမှ ဒးပသောၚ်သြန်လေဝ်နွံတုဲ ဍေံပလံၚ်ကဵုဒဵုစိုပ် သ္ၚိ ဟွံသေၚ်တှ်ေ စိုပ်ၜိုတ် သၞေဟ်ကွဳစက်ကာ ဍေံပြၚ်ကဵုမာန်ရောၚ်။
“ဠတေံတှ်ေသွံမံၚ်ရ။ ဆတှ်ေ သွံဟွံဂြိပ်စကွေံလေဝ်။ လက္ကရဴဏံ ယဲဏံဒှ်တိုန်တှ်ေ ပဵုဂွံသွံဂၠိုၚ်တိုန်၊ အာကၠုၚ်ဟွံဂွံ တိတ်ဍာန်လေဝ်ဟွံဂွံတုဲတှ်ေ စနူကဵု ပဠောံတံ ကပေါတ် ဂစေံတံ ဍေံတံ ဗ္ကန်ကေတ်နူ အန်လိုၚ် သၟးရဂၠိုၚ်” သာ်ဝွံ မိဇူရဳ ညးသွံဖျာ (Online Shopping) မွဲတၠဟီုရ။
သၞာံတုဲတုဲကၠုၚ်တေံဂှ် online shop ဏံၜိုန်ရဂၠိုၚ်မံၚ်ကီုလေဝ် သၞာံဏံဟိုတ်နူယဲဏံတုဲ ပဵုတုဲဂၠိုၚ်တိုန်မံၚ်ဂှ် ဂွံဆဵုကေတ်မံၚ်ရ ၊လ္တူဖျာအန်လိုၚ်ဏံဂှ် ကပေါတ်နာနာ သွံ ရာန်မာန်မံၚ် လောဲလောဲသွာသွာ ဂှ်ရ မၞိဟ်လ္ၚဵုတံ ဟွံအာဖျာမွဲသာ် ဗ္ကန်ကေတ်လ္တူအန်လိုၚ်ဏံလေဝ်နွံမံၚ်ရ။
ပ္ဍဲကဵုဖျာအန်လိုၚ်ဂှ် ကပေါတ်ကျိုၚ်ကျဝ်ကီု ကယျိုၚ်ဗွိုက်လတက်ကီု စၞစသုၚ်ကီု ကပေါတ်စကာသ္ၚိတံလေဝ် သွံရာန်မံၚ်ကီု ဂွံတီကေတ်ရ။
