Categories
ပရိုၚ် လိက်ပရေၚ်

လ္ၚတ်၊ ဂၠိုက်ဂၠာဲ ပွမအုပ်ဓလီု သဵုယှေဝ်မဳဒဳယျာ လ္တူပေဲါရုဲမာဲဂမၠိုၚ်

ရာမညအီဆာဲ

တ္ၚဲဏံ အလုံလိုက်မွဲ နဒဒှ်ကျဝ်ဒုၚ်ပေဲါရုဲမာဲ ပ္ဍဲအရာကၠောန်ၜိုတ်ချဳဓရာၚ် ပရေၚ်စန်ဒက်ဂှ် စကာသုၚ်စောဲကၠုၚ် သဵုယှေဝ်မဳဒဳယျာတုဲ အခန်ကဏ္ဍဍေံ ပၟိက်ဇၞော်ကၠုၚ်ရ။ ဗော်ပရေၚ်ဍုၚ်ကွာန်တအ် ညးစၞးအမာတ်ကၠတ်ထဝ်တအ် ဟိုတ်ဂွံစကာကၠုၚ် သဵုယှေဝ်မဳဒဳယျာ (Social Media) ဂှ် (၁) ခရိတ်အိုတ်သက်သာကၠုၚ်၊ (၂) တၚ်နၚ်ပရိုၚ်ဇကု မိက်ဂွံလဴစဂှ် နကဵုအခိၚ်ဂၠေံဂၠေံဂှ် ပြးဇးစိုပ်တရဴပြဟ် မဒှ်ရ။ တုဲပၠန် လ္တူသဵုယှေဝ်မဳဒဳယျာ သီုဂွံအခေါၚ်ဓရီုတက်ကျာ ကုတၠဆန္ဒမာဲ ဆက်စၠောံဂတးဂတုန်မာန်တုဲ ဒှ်စကာကၠုၚ် ဂြုဂြုဂြီုဂြီုအိုတ်ရ။ ဟိုတ်ဂှ်ရ ဗော်ပရေၚ်ဍုၚ်ကွာန် ကေုာံ ညးစၞးအလံၚ်အမာတ်တအ် နဒဒှ်ဒဒန်ဆက်စၠောံမွဲ စကာသုၚ်စောဲ သဵုယှေဝ်မဳဒဳယျာတုဲ ကၠောန်ၜိုတ်ချဳဓရာၚ်ကၠုၚ် ပရေၚ်စန်ဒက်မာဲဖအိုတ်ရ။
ကၟိန်ဍုၚ်ပိုဲဝွံ အကြာယဲကပ် Covid – 19 ဏံ စိုပ် (၂၀၂၀) ဂိတုနဝ်ဝေန်ဗာ (၈) မ္ဂး ကၠောန်သ္ပအာပေဲါရုဲမာဲကၟိန် ဍုၚ်ရောၚ် ဂွံတီကေတ်ရ။ ဗော်ပရေၚ်ဍုၚ်ကွာန် မပ္တိုန်လဝ် (မှတ်ပုံတၚ်) မၞုံ (၉၂) ဗော်တအ် ဗော်ဗွဲမဂၠိုၚ် ပံက်ပ္တိုန် Facebook page ဂမၠိုၚ်တုဲ ပရေၚ်ချဳဓရာၚ်ဇကု ပ္တိုန်ကၠုၚ် (post) အိုတ်ရ။ ဟိုတ်နူစကာ သဵုယှေဝ်မဳဒဳယျာ ဂၠိုၚ်ဂၠေၚ်တုဲ ပေဲါရုဲမာဲဝွံ မဒှ်ပေဲါရုဲမာဲ Facebook ပေဲါရုဲမာဲ Twitter သာ်ဝွံ ကော်ဂး ခုတ်ခဴကၠုၚ်အိုတ်ရ။ ပေဲါရုဲမာဲ (၂၀၂၀) မကၠောန်သ္ပ ပ္ဍဲကၟိန်ဍုၚ်ပိုဲလေဝ် ဗၞတ်ဗ္ၜတ်မွဲမွဲ သဵုယှေဝ်မဳဒဳယျာ (မတွံဂး) ဇာနှိက်ပရေၚ်ဝေါဟာမၞိဟ်ဏံ လုပ်သ္ပဂြန်ဂဥုဲတုဲ ပြံၚ်လှာဲဏာ သွဟ်ပေဲါရုဲမာဲ မွဲနဲမွဲဗီုမာန်ရောၚ်။ ဟိုတ်ဂှ်ရ ပေဲါရုဲမာဲကၟိန်ဍုၚ်ဂလာ၊ မလေဝ်ယှာ၊ အေန်ဒဵုနဳယှာ၊ အမေရိကာန်တအ် ဗီုလဵုညးတအ် သ္ပဂြန်ဂဥုဲကဵု သဵုယှေဝ်မဳဒဳယျာရော လ္ၚတ်ဂၠိုက်ဂၠာဲပ္တိုန်ထ္ၜးအာရောၚ်။
ပေဲါရုဲမာဲကၟိန်ဍုၚ်မလေဝ်ယှာ ကေုာံ ဗီုစကာသဵုယှေဝ်မဳဒဳယျာ
သဵုယှေဝ်မဳဒဳယျာ (မကော်ဂး) ဇာနှိက်ပရေၚ်ဝေါဟာမၞိဟ်ဝွံ သ္ပသ္ဇိုၚ်ကဵုအေန်တာနိတ်တုဲ ညးစကာသုၚ်စောဲ ပ္တိုန်ထ္ၜးဒၟံၚ် ဗီုဓါတ်နာနာ၊ မဳဒဳယျာနာနာ ကေုာံ တၚ်နၚ်ပရိုၚ်နာနာရ။ ညးစကာသုၚ်စောဲတအ်ဂှ် နကဵုကောန်ပျူတာ Tablets, Mobile Phone တအ်မွဲကဆံၚ် ဆက်စၠောံကဵု သဵုယှေဝ်မဳဒဳယျာမာန်တဴရ။ စကာသုၚ်စောဲ သဵုယှေဝ်မဳဒဳယျာဂမၠိုၚ်ဂှ် တၚ်နၚ်ပရိုၚ် နူ online တအ် စကာသုၚ်စောဲမာန်သၟးဟွံက နအလဵုဇကုညးတအ်လေဝ် ချူတၚ်နၚ်ပရိုၚ် ပ္တိတ်တၚ်နၚ်ပရိုၚ်မာန်ရ။
ပ္ဍဲပေဲါရုဲမာဲကၟိန်ဍုၚ် မလေဝ်ယှာဂှ် တၞး (Poster) ဂမၠိုၚ်၊ ပေဲါသဳကၠဳ ပရေၚ်ဍုၚ်ကွာန်ဂမၠိုၚ်တအ်ဂှ် ပ္တိုန်ထ္ၜး ပ္ဍဲ Facebook ကေုာံ Twitter တအ်တုဲ နူ Mobile Phone မွဲကဆံၚ် ပွမပလံၚ်ဗ္စိုပ် လိက်ပရေၚ်စန်ဒက်ဍောတ်တ်၊ တၚ်နၚ်မူဝါဒ ဗော်ပရေၚ်ဍုၚ်ကွာန်တအ် ပလံၚ်ဗ္စိုပ်ဒၟံၚ်အိုတ်ရ။ ပေဲါရုဲမာဲကၟိန်ဍုၚ်မလေဝ်ယှာ မရနုက်ကဵု (၁၄) ဝါဂှ် စကာ What App ကေုာံ facebook တအ် ပွမပလံၚ်ဗ္စိုပ် တၚ်နၚ်မူဝါဒ ဗော်ပရေၚ်ဍုၚ်ကွာန် ဍိုန်န်ဂၠေံဂၠေံတအ် ဒှ်လွဟ်လက်နက်စိုပ်တရဴ ဗွဲမဂၠိုၚ်ဂၠေၚ်ရ။
တၠဆန္ဒမာဲညးသၟတ်တအ်ဂှ် နူကဵုသဵုယှေဝ်မဳဒဳယျာမွဲကဆံၚ် စန်ဒက်ကၠုၚ်မာဲမာန်တုဲ ပေဲါရုဲမာဲ မရနုက်ကဵု (၁၄) ဝါ ကၟိန်ဍုၚ်မလေဝ်ယှာဝွံ နကဵုမမာဲညးသၟတ်တအ် ကဵုကၠုၚ်သ္ဂုတ်သွာတ် သွဟ်ပေဲါရုဲမာဲနွံကၠုၚ်ဂှ် ဂွံလ္ၚတ်ကေတ်ရ။
ပေဲါရုဲမာဲကၟိန်ဍုၚ်အိန္ဒိယျ ကေုာံ ဗီုစကာ သဵုယှေဝ်မဳဒဳယျာ
ပေဲါရုဲမာဲကၟိန်ဍုၚ်အိန္ဒိယျ သၞာံ (၂၀၁၄) ဂှ် လဂွံကဵုတၚ်နၚ် Internet Mobile Association of India and IRIS Knowledge foundation ပ္တိတ်လဝ်တုဲ ပၞောဝ်ကဵုဆန္ဒမာဲ (၅၄၃) ဒၞာဲဂှ် (၂၈၇) ဒၞာဲ ဒးဒုၚ်အုပ်ဓလီု ကုသဵုယှေဝ်မဳဒဳ ယျာရောၚ် ဂွံတီကေတ်ရ။ ဗွဲတၟေၚ် Facebook အုပ်ဓလီုလဝ် ဂၠိုၚ်ဂၠေၚ်ရောၚ်၊ ကၟိန်ဍုၚ်အိန္ဒိယျ (India) ဝွံ ပ္ဍဲသၞာံ (၂၀၁၃) အိုတ်ဂှ် ညးစကာသုၚ်စောဲ သဵုယှေဝ်မဳဒဳယျာ (၁၂၇) ပြကောတိကိုဋ်ပြၚ် နွံကၠုၚ်ရောၚ် Worldwid Social Network Uses ဂှ် ဓမံက်ထ္ၜးလဝ်ရ။ ညးစကာသုၚ်စောဲ (၇၅) က္ဍိုပ်ကၠံဂှ် စကာသုၚ်စောဲကၠုၚ် Facebook, Twitter, Youtube, Tumblr တအ်ရ။
ဗော် The Bharatiya Janeta Party (BJP) ဝွံ ပရေၚ်မူဝါဒဗော် ကေုာံ လိက်လလောၚ်တြး လုပ်ပေဲါရုဲမာဲတအ်ဂှ် စကာသုၚ်စောဲ သဵုယှေဝ်မဳဒဳယျာတုဲ ပလံၚ်ဗ္စိုပ်ဒၟံၚ် ညးတၠဆန္ဒမာဲတအ်ရ။ ပ္ဍဲသ္ကိုပ်ဝန်ဇၞော် Narendra Modia ဂှ် လၟိဟ် Followers (၁၆၀၀,၀၀၀) နွံတဴဒၟံၚ်ရ။ Facebook fun ညး မၞုံ (၁၈) ပြကောတိကိုဋ်ဒှ်တုဲ သမ္မတတြေံ ကၟိန် ဍုၚ်ပံၚ်ကောံအမေရိကာန် အဝ်ဗာမာဝွံ နွံဒၟံၚ်လၟိဟ်ဒုတိယညးရ။ မၞိဟ်သၟတ်ကလိဂွံအခေါၚ်ကဵုမာဲ ပ္ဍဲကၟိန်ဍုၚ်အိန္ဒိယျ မၞုံလၟိဟ် (၆၈) က္ဍိုပ်ကၠံဂှ်တုဲ နူကဵုသဵုယှေဝ်မဳဒဳယျာမွဲကဆံၚ် စန်ဒက်ကၠုၚ်မမာဲ မၞိဟ်သၟတ်တအ်ဂှ် သွက်ဗော် BJP ကလိဂွံပရဲ ပရေၚ်ဂၠိုၚ်ရောၚ် ဂွံလ္ၚတ်ကေတ်ရ။
ပေဲါရုဲမာဲကၟိန်ဍုၚ်အေန်ဒဵုနဳယှာ ကေုာံ ဗီုစကာ သဵုယှေဝ်မဳဒဳယျာ
ကၟိန်ဍုၚ်အေန်ဒဵုနဳယှာဝွံ ပၞောဝ်ကဵုဒေသအဂၞဲ (ASEAN) ဏံမ္ဂး ဒှ်ကၟိန်ဍုၚ် စကာသုၚ်စောဲ သဵုယှေဝ်မဳဒဳယျာ ဂၠိုၚ်အိုတ် မရနုက်ကဵု ဒုတိယရောၚ် ဂွံတီကေတ်ရ။ ပွိုၚ်မွဲတ္ၚဲမ္ဂး ဗၞတ် (၃) နာဍဳ (၂၃) မဳဇနာ သုၚ်စောဲစကာဒၟံၚ် သဵုယှေဝ်မဳဒဳယျာအိုတ်ရ။ ကောန်ကၟိန်ဍုၚ်အေန်ဒဵုနဳယှာ ဗၞတ် (၁၃၀) ပြကောတိကိုဋ်ဂှ် စကာသုၚ်စောဲဒၟံၚ် Facebook နကဵုအခိၚ်လၟေၚ်ဍာံနွံရ။ ပၞောဝ်ကဵုဒေသအဂၞဲ (ASEAN) ဏံ ညးစကာဒၟံၚ် (၃၆၀) ပြကောတိကိုဋ်ဂှ် ကၟိန်ဍုၚ်ဏံ နွံတဴဒၟံၚ် (၃၆) က္ဍိုပ်ကၠံရ။
လ္တူမုက်လိက် Twitter ဂှ် သမ္မတကၟိန်ဍုၚ် ဂျဵုကိုဝ်ဝဳဒဵုဒဵု အုပ်ဓလီုလဝ်တုဲ Followers (၁၁.၁) ပြကောတိကိုဋ် ကလိဂွံလဝ်ရ။ ‘ဂျဵုကိုဝ်ၜဳဒဵုဒဵု’ ဝွံ သ္ပဟိုတ်နူပရိုၚ်ဟွံဍာံပြ လ္ပာ်ဒေသပၠိုတ်ဂျာဗာ ပြးဇးကၠုၚ်နွံတုဲ သွက်ပေဲါရုဲမာဲ (၂၀၁၉) ဂိတုမာတ်ဂှ် ပရေၚ်ထံက်ဂလာန် ၜိုန်ဒတုံစှေ်အာ ဗၞတ်ညိညဇြိုၚ်သာကီုလေဝ် ကလိဂွံကၠုၚ် ပရေၚ်ထံက် ဂလာန် နူညးစကာသုၚ်စောဲ သဵုယှေဝ်မဳဒဳယျာတအ်တုဲ ဇၞးကၠုၚ်မာဲရ။
ပေဲါရုဲမာဲကၟိန်ဍုၚ်ပံၚ်ကောံအမေရိကာန် ကေုာံ ဗီုစကာ သဵုယှေဝ်မဳဒဳယျာ
ကြဴနူပေဲါရုဲမာဲ သၞာံ (၂၀၁၆) တုဲ ပရိုၚ်ပတောံဗွဲမဂၠိုၚ် အုပ်ဓလီုဏာဂှ် ဗော်ပရေၚ်ဍုၚ်ကွာန် မၞုံကၟိန်ဍုၚ်ပံၚ်ကောံ အမေရိကာန်တအ် ဒှ်ကၠုၚ်ဓဝိၚ်ရ။ ညးစိုပ်အဝဲ ဗၞတ် (၆၂) က္ဍိုပ်ကၠံဂှ် ၜှ်ပလှ်စကာဒၟံၚ် တၚ်နၚ်ပရိုၚ် နူသဵုယှေဝ်မဳဒဳယျာဖအိုတ်ရ။ ပရိုၚ်ပတောံဂမၠိုၚ် ၜိုန်တိတ်ကၠုၚ် နူ Mainstrem Media ကီုလေဝ် ပါ်ပရအ် လ္တူ Facebook သၟးဂၠိုၚ်တဴရ။
ပရိုၚ်ပတောံမတိတ်ကၠုၚ်တအ်ဝွံ လ္တူဟဳလရဳကလေန်တာန်ဂှ် ကေတ်မုက် ဗက်မုက် လ္ပာ်ဒဝ်နေဝ်ထြာပ်ဂၠိုၚ်ရ။ လဂွံကဵုတၚ်နၚ်ဂမၠိုၚ်တုဲ ယဝ်ရပရိုၚ်ပတောံတအ် ဟွံအုပ်ဓလီုဏာ ဒဝ်နေဝ်ထြာပ်မ္ဂး ညးတေံဂွံဇၞးမာဲ ဟွံလောဲသွာ လးလး၊ ဗွဲတၟေၚ် ပရိုၚ်ထံက်ဂလာန်ကဵု ဒဝ်နေဝ်ထြာပ် မကၠောန်သ္ပဗီုပြၚ်ပရိုၚ်ပတောံ (၁၁၅) ပိုဒ်ဂှ် ပါ်ပရအ်ဒၟံၚ် လ္တူ Facebook (၃၀) ပြကောတိကိုဋ်အလန်ရ။ ထံက်ရံၚ်ဒဒှ်ဏံမ္ဂး ပရိုၚ်ပတောံတအ်လေဝ် ပြံၚ်လှာဲထောံ သွဟ်ပေဲါရုဲမာဲမာန်ဒၟံၚ်ဂှ် ဂွံလ္ၚတ်ကေတ်ရ။
သဵုယှေဝ်မဳဒဳယျာအုပ်ဓလီုကၠုၚ်ပေဲါရုဲမာဲ ကၟိန်ဍုၚ်ပိုဲမာန်ဒၟံၚ်
ကၟိန်ဍုၚ်ပိုဲဝွံ လၟိဟ်ညးရပ်စပ် Mobile Phone ဂၠိုၚ်ဂၠေၚ်ကၠုၚ် အရိုဟ်ဟ်တ္ၚဲတုဲ နူဖုၚ်ဏံမွဲကဆံၚ် စကာသုၚ်စောဲကၠုၚ် သဵုယှေဝ်မဳဒဳယျာဂှ်လေဝ် ဇၞော်ဖောအ်ကၠုၚ်အိၚ်ၚ်ရ။ ဗော်ပရေၚ်ဍုၚ်ကွာန်ဂမၠိုၚ်ဂှ်လေဝ် ပရေၚ်ချဳဓရာၚ်ညးတအ် ဗွဲမဂၠိုၚ်ဂှ် နူကဵု Facebook Page မွဲကဆံၚ် ဗလးဒၟံၚ် (live streaming) ကီု၊ ပ္တိုန်ဒၟံၚ် (post) ကီု၊ ကလေၚ်ပါ်ပရအ် (share) ကီု ကၠောန်သ္ပတဴရ။
အလံၚ်အမာတ်တအ် ဖအိုတ်သြန်ဗွဲမဂၠိုၚ် လလောၚ်တြးဒၟံၚ် ပ္ဍဲ Facebook တအ်ဝွံ နဒဒှ်ခရိတ်စကာပေဲါရုဲမာဲ သ္ဂောံဓမံက်ထ္ၜးအာမာန် ပ္ဍဲသၞောဝ် (ရွေးကောက်ပွဲနည်းဥပဒေ) စၟတ်ပိုၚ်ခြာ သ္ပဒတန်လဝ် ဟၟဲတဴရောၚ်၊ ညးလုပ်ဂကောံကမ္မယှေန်ပေဲါရုဲမာဲကၟိန်ဍုၚ် မၞုံယၟု ဥူမေန်သှိုဲ သောၚ်ကလးလဝ် ပ္ဍဲကောံဓရီုကၠတ်ထဝ် ညးဍုၚ်ကွာန်ဂှ် ဓမံက်ထ္ၜးလဝ် ပ္ဍဲဌာန်ပရိုၚ် Eleven (9/2/2020) နွံတဴရ။
ဗွဲတၟေၚ်စကာဒဒန်စၠောံ Facebook တုဲ ပွမဟီုဓမံက်ဂလာန်အရေဝ် ဂွံက္ဍုဟ်ညးသ္ကံ ပ္တိတ်ဒၟံၚ်ပရိုၚ် ဟွံဍာံတအ်ဂှ် နကဵုကမ္ပဏဳ Facebook ထိၚ်ကြာပ်ရေၚ်တၠုၚ်အာရောၚ် ပရိုၚ်ဂှ် ဆက်ဓမံက်ထ္ၜးရ။
မအရေဝ်လုပ်ဇီုဗဗတ်ကဵု ပေဲါရုဲမာဲဂှ်ကီု ဂလာန်က္ဍုဟ်ညးသ္ကအ်တအ် ယဝ်ရပ္တိုန်မ္ဂး နကဵုဍေံတအ် Facebook ဗက်ပလီုကဵုဏောၚ် ကဵုလဝ်ဂတိပါၚ် ကုကမ္ပယှေန်နွံရောၚ် “ညးလုပ်ဂကောံကမ္ပယှေန်ပေဲါရုဲမာဲကၟိန်ဍုၚ် ဥုမျေအ် နာၚ် သောၚ်ကဵုလဝ် အ္စာပရိုၚ်ဂမၠိုၚ် ပ္ဍဲဒိတ္ထဳ (၆၊ ၂၊ ၂၀၂၀) နွံပၠန်ရ။
ပ္ဍဲကၟိန်ဍုၚ်ပိုဲ သွက်ဂွံမံၚ်ကျောဝ် ပရေၚ်ချဳဓရာၚ်သီုယှေဝ်မဳဒဳယျာဂှ် ပံက်လဝ်ဂကောံ နွံဒၟံၚ်ဣရ။ အကွက်ဂကောံဏံ ဂွံစကာသြန် (၆,၄၀၀) ပြကောတိကိုဋ်ဂှ်လေဝ် ပ္တိတ်ကဵုလဝ် နူသြန်ဂအုံကေၚ်ကာ လၟေၚ် (အရေးပေါ်ရန်ပုံၚွေ) ရ။ ပ္ဍဲအရာဂွံဓမံက်ပ္တိတ် ပွမစကာသုၚ်စောဲ သဵုယှေဝ်မဳဒဳယျာတုဲ ကၠောန်သ္ပပရေၚ်ကၟိန်ဍုၚ် ဂွံရုသံၚ်တအ်ဂှ်ကီု ဂွံထိၚ် ကြာပ်အာ သဵုယှေဝ်မဳဒဳယျာဏံမာန် နူကဵုတၚ်တုပ်စိုတ် အလဵုအသဳကၟိန်ဍုၚ်ဟေၚ် ပံက်လဝ်ဂကောံဝွံရောၚ်။ ဝန်ဇၞော်ပရေၚ်ပလံၚ်ဗ္စိုပ် ကေုာံ ပရေၚ်ဆက်စၠောံ) ဥုတာန်ဇြေန်မိုၚ် ဟီုသောၚ်ကလး ပ္ဍဲကောံဓရီုကၠတ်ထဝ်ကၟိန် ဍုၚ် (ဂိတုမာတ် ၂၀၁၈) နွံရ။
ပ္ဍဲကၟိန်ဍုၚ်ပိုဲ လဂွံကဵုစရၚ် (၂၀၁၉) ဂိတုဂျာန္နဝါရဳမ္ဂး ညးစကာကၠုၚ်ဖုၚ် (Mobile Phone) ဒှ်အာ (၅၆.၅၇) ပြကောတိကိုဋ် (၁၀၅) က္ဍိုပ်ကၠံ၊ ညးစကာအေန်တာနိတ် (၂၁) ပြကောတိကိုဋ်၊ ညးစကာသဵုယှေဝ်မဳဒဳယျာ (၂၁) ပြကောတိကိုဋ် (၃၉) က္ဍိုပ်ကၠံနွံရောၚ် ဂွံတီကေတ်ရ။
နိဂီု
ကၠာဟွံဂွံစိုပ်ပေဲါရုဲမာဲ (ဂိတုနဝ်ဝေန်ဗာ (၈) ၂၀၂၀) ဏီ ညးစၞးအလံၚ်အမာတ် နူဗော်ပရေၚ်ဍုၚ်ကွာန်တအ်ကီု ညးစၞးပူဂဵုတအ်ကီု စကာသုၚ်စောဲ သဵုယှေဝ်မဳဒဳယျာတုဲ စန်ဒက်အာမမာဲ ဂြုဂြုဂြီုဂြီုရောၚ်၊ ဗီုလဵုဒှ်ဒှ် ဗော်ပရေၚ်ဍုၚ် ကွာန်တအ် ညးစၞးပူဂဵုတအ် ညံၚ်ဂွံစွံသတိ ပရိုၚ်ပတောံနာနာမာန်ဂှ် ပၟိက်ဇၞော်တဴရ။ ပရိုၚ်ပတောံနာနာဝွံ လ္တူညးတၠ ဆန္ဒမာဲ ရဲမံၚ်တန်တဴၝောံဍုၚ်တအ် ဟွံဒှ်ဂြန်ဂဥုဲဇၞော်ဇၞော်ကီုလေဝ် လ္ပာ်ညးတၠဆန္ဒ မံၚ်တန်တဴကွာန်ရးမ္ဂး ပြံၚ်လှာဲထောံ သွဟ်ပေဲါရုဲမာဲမာန်ဒၟံၚ်ဂှ် မ္ဒးစွံအာရီုထေက်ရောၚ် ညာတ်ရ။ ဟိုတ်ဂှ်ရ ပရိုၚ်ပတောံနာနာ ညံၚ်ဂွိုအ်ပြးဇးအာ ညးတာလျိုၚ်ကမ္မဏဳ Facebook တအ်ကီု ကမ္မယှေန်ပေဲါရုဲမာဲကီု ဂကောံမၚ်ကျောဝ် သဵုယှေဝ်မဳဒဳယျာတအ် မ္ဒးပံၚ်တောဲ ကၠောန်ၜိုတ်ရေၚ်တၠုၚ်အာထေက်ရောၚ် ပ္တိုန်ထ္ၜးဏာရအဴ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.