ဟိုတ်နူကဵုယဲကဝ်ဝေဒ်တံ ဖျာဇၞော်လၟိဟ် (၁) ဍုၚ်မတ်မလီုဂှ် ဒးကၟာတ်လဝ်နွံမံၚ်တုဲ လၟုဟ်ဝွံ ညံၚ်ဂွံကလေၚ်ပတိတ်ကေတ် ကပေါတ်ဖျာဇကုမာန်ဂှ် ကလေၚ်ကဵုလဝ်အခေါၚ်ဗွဲယာယဳရောၚ် ဂွံတီကေတ်ရ။

ညးတာလျိုၚ်ဖျာ ဥုသိုဝ်လွေန်ဂှ် “ဍေံတံပတိတ်ကေတ်ဏာ ကပေါတ်ဖျာဍေံတံတုဲ နူကဵုသ္ၚိဍေံဂှ် ဖံက်သေဝ်ဖျာဍေံတံ ကၠုၚ်ကေတ်တှ်ေ ဂွံကဵုဏာမာန်ဂှ် ပိုဲစဳဇန်ဏာလဝ်ရ။ ကပေါတ်ဖျာနွံမံၚ်ပ္ဍဲကဵုဆေၚ်ဍေံတံဂှ် ညံၚ်ဂွံပြေပြံၚ်ညးသ္ကအ် သီုၜါလပါ်ဂှ် ပိုဲကဵုလဝ်အခေါၚ်ပ္တိတ်ကပေါတ်ယာယဳရ” သာ်ဝွံ ဂးရ။

ပ္ဍဲကဵုတွဵုရးဍုၚ်မန် ပွိုၚ်ဍုၚ်၊ ကွာန်လ္ၚဵုတံဂှ် ကၠုၚ်ကေတ်ဖံက်သေဝ်၊ ကၠုၚ်ရာန်မံၚ်ကပေါတ် ပ္ဍဲကဵုဖျာဇၞော်လၟိဟ် (၁) ဂှ် ဗွဲမဂၠိုၚ်တုဲ ကၟာတ်ထောံလဝ်ဖျာ ဗွဲယာယဳဂှ် တၠဖျာတံ ဟွံပြေပြံၚ်ဂှ်ရ တၠဖျာတံ အာတ်မိက် ညံၚ်ဂွံပတိတ်ကဵုကပေါတ်ရ။

ဟိုတ်နူကဵုယဲကဝ်ဝေဒ်ဏံ အသိၚ်ကၠောံထၞာန် သၠုၚ်တိုန်မံၚ်တုဲ ပ္ဍဲကဵုဖျာဇၞော်တံဂှ် ကပေါတ်စၞစသုၚ်ကဵု ဆေၚ်ဂဥုဲတံဟေၚ် ကဵုအခေါၚ်ပံက်လဝ်တုဲ ဆေၚ်ဖျာတၞဟ်ဟ်တံဂှ် ကၟာတ်လဒဵုလဝ်ဂှ်ရ နူကဵုဂိတုသေပ်တေမ်ဗာ ၁၈ ဂှ် မွဲသတ္တာဟမွဲဝါ ကဵုအခေါၚ်ပ္တိတ်အာကပေါတ် နူကဵုဖျာဂှ်မာန်ဂှ် အာတ်မိက်လဝ်ရောၚ် ဂွံတီကေတ်ရ။

“ဍေံတံအာတ်မိက်ကၠုၚ်လဝ် ဗီုဏံတှ်ေ နူကဵုညးတာလျိုၚ်ဖျာဂှ် ပ္တိုန်ထ္ၜးလဝ်ကဵု ဂကောံဗဂဵုလဟဵုပွိုၚ်ဍုၚ်တံရ။ ကၟာတ်လဝ်လေဝ် တ္ၚဲတၟာလအ်ယျတှ်ေ ဒှ်ကၠုၚ်အခက်အခုဲအိုတ်ရလေဝ်။ ကပေါတ်လ္ၚဵုဂှ် ဖေက်လီုလာ်အာဂှ်ရ ဍေံတံအာတ်ကၠုၚ်အခေါၚ်ပ္တိတ်ကပေါတ်ဂှ်တှ်ေ ပိုဲကၠောန်လဝ်ကဵုရ” သာ်ဝွံ ဒု-ဥက္ကဋ္ဌ ကမ္မတဳဖျာလၟိဟ် (၁) ဥုမိုၚ်သိုဝ် ဂးရ။

ပ္ဍဲကဵုလ္တူဍုၚ်မတ်မလီု ဖျာနွံမံၚ် ပ္ဍဲကဵုအရာပ်ဒးဒၟံၚ် Stay Home တံဂှ် စနူကဵုဂိတုသေပ်တေမ်ဗာ ၁၁ တေံ ဆေၚ်ဖျာသွံရာန်ကပေါတ်စၞစသုၚ်ကဵု ဆေၚ်ဂဥုဲတံဟေၚ် ကဵုအခေါၚ်ပံက်တုဲ ဆေၚ်ဖျာသှ်ေတံဂှ် ဒးဒုၚ်ကၟာတ်ထောံလဝ်ရ။

ပ္ဍဲကဵုဍုၚ်မတ်မလီုဂှ် ဖျာမုပေါန်၊ ဖျာမၚ်္ဂလာ၊ ဖျာမျာၚ်ရတနာ၊ ဖျာဇၞော်လၟိဟ် (၁) ဖျာဇၞော်လၟိဟ် (၂)၊ ဖျာၚ်ဒိုၚ်ဝေါန်ဂွေန်၊ ဖျာသဳရိမျာၚ်တံကီု ပ္ဍဲကဵုပွိုၚ်ဍုၚ်သဓီု ဖျာၝောံဍုၚ်တံ ကဵုလဝ်အခေါၚ်သွံရာန် ဆေၚ်စၞစသုၚ်သၟးရောၚ် ဂွံတီကေတ်ရ။