ပ္ဍဲရးဒေသဇၞော်လ္ဂုၚ်ဂှ် ဟိုတ်နူကဵု ယဲကိုဝ်ဝေဒ် (၁၉) ကၠောံထၞာန်ဂၠိုၚ်မံၚ်ဂှ်ရ သွက်ဂွံရီုဗၚ်ဗပေၚ်ဇြဟတ်မာန် သၞာဲဒဴပရေၚ်ထတ်ယုက် ကေုာံ ဒပ်ဇိုၚ်ခ္ဍာ်ဗ္ကေတ် (Red Cross) နူတွဵုရးဍုၚ်မန် လၟိဟ်မၞိဟ် (၈၀) တၠပြၚ်ဂှ် ပလံၚ်ဗစိုပ်လဝ် ရးလ္ဂုၚ် နွံမံၚ်ရောၚ် ဂွံတီကေတ် နူကဵုဌာနက္ဍိုက်ပ်ပရေၚ်ထတ်ယုက်တွဵုရးရ။
ပ္ဍဲရးလ္ဂုၚ် ယဲကိုဝ်ဗေတ်(၁၉) ကၠောံထၞာန်ဂၠိုၚ်မံၚ်ဂှ်ရ သွက်ဂွံရီုဗၚ်ဗပေၚ်ဇြဟတ်တုဲ အဃောဂိတုသေပ်တေမ်ဗာဂှ် ပလံၚ်ကဵုဏာလဝ် သၞာဲဒဴပရေၚ်ထတ်ယုက် (၄၀) တၠတုဲ လၟုဟ် ဂိတုအံက်တဝ်ဗာ (၁၂) ဏံဂှ် ထပ်ပလံၚ်ကဵုဏာ သဂံၚ်ဒပ်ဇိုၚ်ခ္ဍာ်ဗ္ကေတ် (Red Cross) (၄၁) တၠရောၚ် ဂွံတီကေတ်ရ။
“သၞာဲဒဴပရေၚ်ထတ်ယုက်ကဵု ဒပ်ဇိုၚ်ခ္ဍာ်ဗ္ကေတ်တအ် ပံၚ်တောဲတုဲ သွက်ဂွံလွဳလွတ် မၞိဟ်ဒးလေဝ်ယဲကိုဝ်ဝေဒ်ဂှ် ပလံၚ်ဏာရ။ သွက်ပလံၚ်ဏာ ဂွံပိုဲရုဲစှ်မၞိဟ်ဂှ် ပိုဲကဵုဏာပရိုၚ် သီု (၁၀) ပွိုၚ်ဍုၚ်တုဲ ဆန္ဒဍေံကဵုဍေံ မိမဍေံတအ် တုပ်စိုတ်တုဲ ဍေံတအ်ကၠုၚ်ဟီုကဵုပိုဲရ” သာ်ဝွံ နူကဵုဒပ်ဇိုၚ်ခ္ဍာ်ဗ္ကေတ် တွဵုရးဍုၚ်မန် ဥုကျဝ်မျေအ် ဟီုရ။
ကောန်ဒပ်ဇိုၚ်ခ္ဍာ်ဗ္ကေတ်တံဂှ် ဒဵုကဵုဂိတုနဝ်ဝေမ်ဗာ (၁) တေံ ဒးမၚ်မွဲရံၚ်စံၚ် လွဳလွတ်အာမၞိဟ်ယဲ ပ္ဍဲကဵုရုၚ်ဂဥုဲလှိုၚ် ဍုၚ်လ္ဂုၚ်တေံရောၚ် ဂွံတီကေတ်ရ။
“ပ္ဍဲဍုၚ်လ္ဂုၚ်ဂှ် ဒၞာဲစွံမၞိဟ်ယဲကိုဝ်ဝေဒ်တံ သိုၚ်ဗပေၚ်လဝ်ရ။ အေဇှ်ရ နူကဵုရးကဵုတွဵုရး ညံၚ်ဂွံကဵုရီုဗၚ်ဂှ် ညးတံကော်လဝ်ရ။ ပ္ဍဲကဵုစမ်ၜတ်ဂှ်လေဝ် မၞိဟ်ဆဵုစၟယဲဂှ်လေဝ် ရ၅% ဂှ် ရးလ္ဂုၚ်ရ။ အတေံဂှ် ဂၠိုၚ်နူကဵုတွဵုရးမန်ဏီ။ ပ္ဍဲကဵုတွဵုရးမန်ဂှ် ဂၠိုၚ်မံၚ်ကီုလေဝ် ကေတ်မာန်မံၚ်ဏီရ” သာ်ဝွံ အ္စာသဝ်ပါလုပ်အာ ပ္ဍဲကဵုရီုဗၚ် ဒံက်တာအေမျာတ်မန် ဟီုရ။
နူကဵုဒေသတၞဟ်ဟ်တံ သွက်ဂွံဒးဘိုၚ်ကဵုရးလ္ဂုၚ်ဂှ် ကံက်ကေတ်မာဲတုဲ ဒးကၠုၚ်လဝ်နွံကီုလေဝ် တွဵုရးဍုၚ်မန်ဂှ် ဆန္ဒညးကဵုညးဟေၚ် ကၠုၚ်လဝ်ရောၚ် ညးထပ်ဟီုရ။
“အာဂှ်တှ်ေ ပိုဲတအ် ဟွံပိုၚ်ခြာလဝ် အခိၚ်ပုဟ်။ မွဲဂိတုပေၚ်တှ်ေ ဒးသၟာန်စမ်ရံၚ်ဍေံတအ် ဍေံတအ်လေဝ် မိက်ဂွံစဴကီုဟာ။ ပြဟ်ဟ်ဏံဂှ်တှ်ေ မၞိဟ်အာလဝ်တအ်ဂှ် ဒၞာဲလ္ၚဵုဂှ်တှ်ေ အခက်ခုဲ နွံညိညိကီုလေဝ် ပ္တိုန်ထ္ၜးနၚ်တၟေၚ်ၚ်တၟဟ်ဟ် ဟွံမွဲဏီ” သာ်ဝွံ နူကဵုဌာနက္ဍိုက်ပ်ပရေၚ်ထတ်ယုက်တွဵုရး ဒု-ညးစၞောန်ပ္ညုၚ် ဒံက်တာဝတ်မှုၚ် ဂးရ။
ပ္ဍဲကဵုရးဒေသဇၞော်လ္ဂုၚ်ဂှ် ယဲကိုဝ်ဝေဒ် (၁၉) ကၠောံထၞာန်ဂၠိုၚ်အိုတ်တုဲ သၞာဲဒဴပရေၚ်ထတ်ယုက်ရီုဗၚ်ဗပေၚ်ဇြဟတ်ဂှ်ရ ရးတၞဟ်ဟ်တံလေဝ် ဗလးဏာ သၞာဲဒဴပရေၚ်ထတ်ယုက်ကီု ဂွံတီကေတ်ရ။
