Categories
ပရိုၚ်

အဃောဗၠာဲသၟိၚ်တအ်ဂေတ်ဒၟံၚ်ကၚ်ဂှ် ရပ်ဂွံဂဥုဲၜူမာဲ ပ္ဍဲကွာန်ဒဒန်ချေတ် ပွိုၚ်ဍုၚ်ဇြပ်ဗု

ဌာန်ပရိုၚ်မန်၊ ဒဳဇြေန်ဗာ ၈၊ ၂၀၂၀

ပ္ဍဲသၞာံ (၂၀၂၀) ဂိတုဒဳဇြေမ်ဗာ၊ စၟတ်တ္ၚဲ (၈) အခိၚ်သဝ်တ္ၚဲဂှ် အဃောဗၠာဲသၟိၚ် လ္တူဍုၚ်ဇြပ်ဗုတအ် ဂေတ်ဒၟံၚ်ကၚ်ဂှ် ရပ်ဂွံ ဂဥုဲၜူမာဲ (WY) နူကဵုညးဗက်ကၠုၚ်ကွဳၜါတၠ ပ္ဍဲကဵုကွာန်ဒဒန်ချေတ် ပွိုၚ်ဍုၚ်ဇြပ်ဗုဂှ်ရ။
ပ္ဍဲကဵုအကြာဂၠံၚ်ကွဳစက် ဍုၚ်ဇြပ်ဗုကဵု ကွာန်ပ္ၚ ဂတမုက်သုသာန်ဂှ် မျေတ်တုၚ် (က) အာဂျဳ မံၚ်ဒၟံၚ်အရာပ်ခိုၚ်ကၠိုက် ဗက်ကၠုၚ်လဝ်ကွဳလိုန်ဓာတ် နကဵုဂကူ Honda Wave 100 အရံၚ်သာ်ဗတေၚ်မွဲမဂှ် ဗၠာဲသၟိၚ်လ္တူဍုၚ်ဇြပ်ဗုတအ် ဂၠိုက်ဂၠဲါပ္ဍဲကဵုထိုၚ်ပံၚ်မဳလ္ပါ်ပဲါဂှ်တုဲ ရပ်ဂွံဂဥုဲၜူမာဲ (WY) ၁၇ မ ဂွဳလဝ်ကဵု ထိုၚ်ပလက်သတေတ် အရံၚ်သာ်တ္ၚေက် နကဵုၚုဟ်မးသြန် (၈၅၀၀၀) ဒကေဝ်ရ။
“အခိၚ်ပိုယ်တအ်ဂေတ်မံၚ်ကၚ်ဂှ် ဂွံပရိုၚ်တုဲ ဗက်စၟဳစၟတ်ဟဂှ်ရ၊ ရပ်ဂွံဂဥုဲၜူမာဲလဝဲါဂှ်ရ၊ မၞိဟ်တအ်ဏံဂှ် ဒှ်မၞိဟ်သွံဒၟံၚ်ဂဥုဲၜူမာဲရ၊ ရပ်ဂွံလၟုဟ်ဂှ်တှေ် (၁၇) မ၊ ဟိုတ်ဒှ်သာ်ဂှ်ရ ပိုယ်တအ်ပံက်လဝ်ဂဗုတ် အတိုၚ်သၞောဝ်ရ” သာ်ဝွံ ဒုသ္ကိုပ်ဗၠာဲသၟိၚ်ရုၚ်လ္တူဍုၚ်ဇြပ်ဗု နာဲဂျဝ်နာၚ် ဟီုရ။
မၞိဟ်သွံရာန်ဒၟံၚ်ဂဥုဲၜူမာဲ နာဲမျေတ်တုၚ် (က) အာဂျဳ အယုက် (၄၃) သၞာံဝွံ နကဵု မယ(ပ)၆၆/၂၀၂၀ ဂဥုဲၜူမာဲ ကေုာံ စဵုဒၞာဂဥုဲပရေၚ်ပြံၚ်သၠာဲစိုတ် နကဵုၝောံပိုဒ် ၁၆(ဂ)/၂၀ ဂှ် ပံက်လဝ်ဂဗုတ် နွံဒၟံၚ်ရောၚ် ဂွံတီကေတ်လဝ် နူကဵုရုၚ်ဗၠာဲသၟိၚ် လ္တူဍုၚ်ဇြပ်ဗုရ။
“ရပ်ဂွံဂၠိုၚ်ဂၠိုၚ်တှေ် ပဵုတုဲခိုဟ်ရ၊ ညံၚ်ဂွံအိုတ်အးအာမာန်ဂှ် ဒးပံၚ်တောဲကၠောန်ညးသ္ကအ်ရ၊ မၞိဟ်ဒးဒုၚ်ရပ်လဝ်လၟုဟ်ဂှ်လေဝ် နူကဵုအရာပ်ပိုယ်ရ၊ မၞိဟ်ဒးဒုၚ်ရပ်လဝ် နကဵုဂဗုတ်ဂဥုဲၜူမာဲဂှ် ပ္ဍဲကဵုအရာပ်ပိုယ်ဂှ်တှေ် ဒှ်အာ (၃) ဂဗုတ်ယျ၊ မၞိဟ်ဍောတ်ဍောတ်တအ်လေဝ် ဝေၚ်ပဲါနူကဵုဂဥုဲၜူမာဲဏံ ကဵုသ္ၚောဲညိ၊ သုၚ်စောဲအောန်အောန်၊ သုၚ်စောဲဂၠိုၚ်ၚ် ဟွံမွဲပုဟ်။ ရပ်ဂွံတှေ် ဒးစုတ်ထံၚ်ဏောၚ်၊ လ္ပသုၚ်စောဲအိုတ်ညိ” သာ်ဝွံ ညးအုပ်ဓုပ်အရာပ်ခိုၚ်ကၠိုက် လ္တူဍုၚ်ဇြပ်ဗု နာဲတုၚ် ဟီုရ။
ပ္ဍဲသၞာံ (၂၀၂၀) ဏံဝွံ ပရေၚ်ရပ်စပ်ကိစ္စဂဥုဲၜူမာဲ ပ္ဍဲရုၚ်ဗၠာဲသၟိၚ်လ္တူဍုၚ်ဇြပ်ဗုဂှ် (၆၆) ဂဗုတ်၊ ပ္ဍဲကဵုရုၚ်ဗၠာဲသၟိၚ် တိဍာ်ကျာ်ခမဳဂှ် (၁၄) ဂဗုတ်နွံတုဲ အပံၚ်သီုဖအိုတ်ဂှ်မ္ဂး ရပ်စပ်ဂွံလဝ် (၈၀) ဂဗုတ်ရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.